Cov Mus Saib Xyuas tom Tsev tsab Xov, Ob Hlis Ntuj 2012
Cov Neeg Zov lub Tsev
Cia li kawm tej yam no thiab, thaum tsim nyog ua, sib tham txog tej no nrog cov viv ncaus uas koj mus xyuas. Siv tej lus nug no pab koj txhawb koj cov viv ncaus lub zog thiab ua kom lub Koom Haum Niam Tsev muaj feem hauv koj lub neej.
Kev Ntseeg, Tsev Neeg, Kev Pab
“Nej yog cov zov lub tsev,” Thawj Tswj Hwj Gordon B. Hinckley tau hais (1910–2008) thaum nws qhia txog “Tsev Neeg: Ib txoj Kev Tshaj Tawm rau lub Ntiaj Teb” hauv lub tuam rooj sab laj rau lub Koom Haum Niam Tsev thaum xyoo 1995. “Nej yog cov uas muaj tau cov me nyuam. Nej yog cov uas yuav tu lawv thiab qhia lawv kom lawv txawj ua tej yam uas lawv yuav tsum ua hauv lawv lub neej. Tsis muaj dua lwm txoj hauj lwm uas nyob ze dua ntuj ceeb tsheej tshaj txoj uas tu Vajtswv tej tub thiab tej ntxhais.”1
Twb tau yuav luag 17 xyoo lawm es zaj lus tshaj tawm no tau qhia tias peb tej hauj lwm uas tseem ceeb tshaj plaws yog los ntxiv dag zog rau tsev neeg thiab hauv tej tsev—txawm hais tias peb ua neej nyob zoo li cas los xij. Barbara Thompson, uas tam sim no yog tus pab cuam thib ob hauv lub Koom Haum Niam Tsev pawg thawj tswj hwj, tau nyob hauv Salt Lake lub Tsev Kheej thaum Thawj Tswj Hwm Hinckley nyeem zaj lus tshaj tawm no thawj zaug. Nws nco tau hais tias “lub sij hawm ntawd yog ib lub sij hawm zoo kawg li.” “Kuv pom tau qhov tseem ceeb ntawm zaj lus ntawd. Kuv kuj tau xav hais tias, ‘Nov yog ib txoj kev qhia uas zoo kawg rau cov niam txiv. Kuj yog ib lub luag hauj lwm loj heev rau cov niam txiv thiab.’Kuv muab xav ib pliag ces kuv txawm xav tias qhov no tsis yog hais txog kuv vim kuv twb tsis tau muaj txiv thiab tsis muaj me nyuam. Tab sim ua rau kuv xav kiag tias, ‘Tab sis yeej hais rau kuv. Kuv yog ib tug neeg ntawm ib tse neeg. Kuv yog ib tug ntxhais, ib tug viv ncaus, ib tug niam tais los sis phauj, ib tug viv ncaus kwv tij, thiab ib tug ntxhais xeeb ntxwv. Kuv muaj tej luag hauj lwm—thiab tej koob hmoov—vim kuv yog ib tug neeg ntawm ib tse neeg. Txawm hais tias kuv yog tib tug neeg ntawm kuv tsev neeg xwb, los kuv tseem yog ib tug neeg ntawm Vajtswv tsev neeg, thiab kuv muaj lub luag hauj lwm los pab ntxiv dag zog rau lwm tsev neeg.’”
Yog ib qho zoo heev, uas peb tsis tas ua tej no peb ib leej xwb. Viv Ncaus Thompson hais tias “Txoj kev pab loj tshaj plaws uas peb yuav muaj ntawm kev ntxiv dag zog rau tsev neeg yog los paub thiab ua raws li tej lus qhuab qhia ntawm Khetos thiab cia siab kom Nws pab peb.”2
Los ntawm cov Vaj Lug Kub
Paj Lug 22:6; 1 Nifais 1:1; 2 Nifais 25:26; Amas 56:46–48; Doctrine and Covenants 93:40
Los ntawm Peb zaj Keeb Kwm
“Thaum Viv Ncaus Bathsheba W. Smith yog tus tuam thawj tswj hwm thib plaub rau lub Koom Haum Niam Tsev [thaum 1901 mus txog 1910], nws pom tau hais tias tsev neeg xav tau kev pab ntxiv dag zog, ces nws thiaj li txhim tsa zaj lus qhia cov niam tsev rau lub Koom Haum Niam Tsev cov viv ncaus. Tej zaj lus qhia no qhia txog kev sib yuav, kev tu yus tus kheej zoo thaum xeeb tub lawm, thiab kev tu me nyuam. Tej zaj lus qhia no kuj txhawb nqa Thawj Tswj Hwm Yauxej F. Xamiv tej kev qhuab qhia txog lub Koom Haum Niam Tsev txoj kev pab cov poj niam ntawm lawv tej hauj lwm hauv tsev:
“‘Nyob txhua qhov txhia chaw uas tib neeg tsis paub zoo los sis tsis to taub zoo hais txog tsev neeg, uas hais txog tej hauj lwm uas yuav tsum ua ntawm tus txiv thiab tus poj niam thiab ntawm niam txiv thiab me nyuam, ces lub koom haum no nyob ntawd los yog nyob ze, thiab dhau los ntawm lawv tej txuj ci thiab tej kev tshoov siab uas lub koom haum no muaj, cov poj niam no npaj lawm kom los qhia txog tej hauj lwm tseem ceeb no.’”3
© 2012 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/11. Pub txhais ua lus Hmoob: 6/11. Kev txhais Visiting Teaching Message, February 2012. Hmong. 10362 295
Kuv Yuav Pab Li Cas?
-
Kuv yuav ua li cas thiaj pab tau cov viv ncaus uas kuv saib xyuas txog kev ntxiv dag zog rau tsev neeg?
-
Kuv yuav ua li cas ua ib tug yam ntxwv uas coj ncaj ncees hauv kuv tsev neeg?