Thawj Pawg Thawj Tswj Hwm tsab Xov, Ob Hlis Ntuj 2012
Ntuas Kom Lawv Thov Vajtswv
Thaum kuv tseem yog ib tug me nyuam me, kuv niam thiab kuv txiv nkawd qhia kuv thov Vajtswv los ntawm nkawd tus yam ntxwv. Kuv pib xav hauv kuv lub siab ces pom Leej Txiv Saum Ntuj Ceeb Tsheej nyob deb heev li. Thaum kuv loj hlob tuaj, kuv txoj kev thov Vajtswv hloov lawm. Qhov uas nyob hauv kuv lub siab rais los pom tau tias Leej Txiv Saum Ntuj Ceeb Tsheej nyob ze heev, uas yog ib tug nyob ntawm qhov kaj nrig, thiab nws paub kuv zoo heev li.
Txoj kev hloov no muaj thaum kuv muaj lus tim khawv tias Yauxej Xamiv zaj lus qhia txog tej yam uas nws pom muaj thaum 1820 hauv lub zos Manchester, New York, muaj tseeb tiag:
“Kuv txawm pom ib qho kaj nyob kiag saum kuv taub hau, ci ntsa iab tshaj lub hnub, qhov kaj nqis zuj zus txog thaum nws nyob ntawm kuv.
“Thaum pom qhov kaj tawm los kuv tau dim tus yeeb ncuab uas tau muab kuv khi lawm. Thaum qhov kaj txog ntawm kuv, kuv tau pom ob Tug Neeg, uas ci ntsa iab thiab muaj yeeb koob uas kuv tsis paub piav txog, nkawd nyob saum ib nta ntuj. Ib tug hais lus rau kuv, tuav kuv lub npe thiab taw tes rau tus ntawd—Nov yog Kuv tus Tub uas Kuv Hlub. Cia Li Mloog Nws Lus!” (Joseph Smith—History 1:16–17).
Leej Txiv Saum Ntuj Ceeb Tsheej yeej nyob hauv koog ntoo ntawd rau hnub zoo heev ntawd. Nws hu Yauxej tuav nws lub npe. Thiab Nws tau qhia tias lub ntiaj teb tus Cawm Seej uas tau sawv rov los lawm yog Nws tib “Leeg Tub uas Nws Hlub.” Txawm yog thaum twg thiab nyob qhov twg los thaum koj thov Vajtswv, koj zaj lus tim khawv txog tej yam tseeb uas tau muaj no yeej yuav foom tau koob hmoov rau koj.
Leej Txiv uas peb thov txog twb yog Vajtswv tus uas zoo uas tau tsim lub ntiaj teb los ntawm Nws Leej Tub uas Nws Hlub. Nws yeej hnov peb tej lus thov Vajtswv yam li Nws tau hnov Yauxej cov lus thov Vajtswv—zoo npaum nkaus li peb thov kiag ntawm Nws xub ntiag ntag. Nws hlub peb heev ces Nws thiaj li tau muab Nws Leej Tub los ua peb tus Cawm Seej. Los ntawm qhov khoom plig no Nws ua kom peb thiaj li tau txoj kev tsis txawj tuag thiab muaj txoj sia nyob mus ib txhis. Thiab Nws muab txoj kev thov Vajtswv los ntawm Nws Leej Tub lub npe pub rau peb kom peb thiaj li nrog Nws sib tham tau thaum twg peb xav tham los tau.
Cov uas tuav lub Pov Thawj Hwj hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg muaj txoj hauj lwm dawb ceev mus “xyuas txhua tus neeg hauv tsev, thiab ntuas kom lawv thov Vajtswv rau sawv daws hnov thiab thov Vajtswv yus tus kheej” (D&C 20:47; ntxiv cov tsiaj ntawv uas qaij lawm).
Muaj ntau yam kev ntuas kom ib tug neeg twg kom thov Vajtswv. Piv xam hais tias, peb ua tim khawv hais tias Vajtswv tau txib kom peb thov Vajtswv txhua lub sij hawm, los sis peb qhia txog tej yam uas tau muaj los hauv vaj lug kub los sis ntawm peb lub neej uas qhia txog tej koob hmoov uas tau thaum thov Vajtswv nrog kev ris txiaj, thov kom tau kev pab, thiab teb cov lus nug. Xws li, kuv ua tim khawv hais tias kuv paub tias Leej Txiv Saum Ntuj Ceeb Tsheej yeej teb peb tej lub thov. Kuv yeej tau txais kev coj qhia thiab kev nplij siab uas los rau hauv kuv lub siab, thiab kuv paub los ntawm tus Ntsuj Plig hais tias cov lus no yog los ntawm Vajtswv los.
Twb tau muaj li no rau tus Yaj Saub Yauxej Xamiv, ces nej los yeej muaj tau thiab. Nws tau cov lus teb rau nws txoj kev ua tib zoo thov Vajtswv:
“Kuv tus tub, cia koj sab ntsuj plig nyob kaj siab lug; koj tej kev txom nyem thiab koj tej kev cov nyom yuav yog ib nyuag pliag nkaus xwb;
“Thiab thaum ntawd, yog koj ua ib siab ntev nyiaj, Vajtswv mam li tsa koj nto” (D&C 121:7–8).
Qhov no yog ib txoj kev tshwm sim los ntawm Leej Txiv rau ib tug tub uas muaj siab ntseeg uas muaj kev ntxhov siab heev. Vajtswv cov me nyuam txhua tus yeej nrog Nws sib tham tau los ntawm kev thov Vajtswv. Yeej tsis tau muaj dua ib co lus ntuas uas zoo tshaj rau kuv npaum li thaum uas muaj kev hlub thiab pom qhov kaj lug uas yog lus teb rau tej kev ua zoo txo hwj chim thov Vajtswv li.
Peb yuav tau lus tim khawv txog Vajtswv ib zaj lus txib twg thaum peb ua raws li zaj lus txib ntawd (saib Yauhas 7:17). Qhov no muaj tseeb tiag hais txog zaj lus txib kom peb thov Vajtswv txhua lub sij hawm txawm yog rau sawv daws hnov los sis rau peb tus kheej. Ua nej ib tug xib hwb thiab ib tug phooj ywg, kuv cog lus hais tias Vajtswv yeej yuav teb nej tej lus thov thiab los ntawm lub hwj chim ntawm tus Vaj Ntsuj Plig Dawb Huv, nej yuav paub tau rau nej tus kheej hais tias tej lus teb yeej los ntawm Nws los tiag tiag.
© 2012 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/11. Pub txhais ua lus Hmoob: 6/11. Kev txhais First Presidency Message, February 2012. Hmong. 10362 295
Qhia los ntawm tsab Xov No
-
“Cov duab yog tej yam zoo heev los pab qhia tau lub ntsiab ntawm ib zaj lus qhia” (Teaching, No Greater Call [1999], 176). Muab ib daim duab txogYauxej Xamiv los sis txog Thawj Zaj Ua Yoog Toog Pom rau lawv saib. Sib tham txog tej yam uas Yauxej Xamiv tau muaj txog kev thov Vajtswv. Nej tej kev thov Vajtswv puas yuav muaj nqis me ntsis yog nej pom tau hauv nej lub siab tias, “Leej Txiv Saum Ntuj Ceeb Tsheej … nyob ze ze,” li Thawj Tswj Hwm Eyring pom?
-
Ua li Thawj Tswj Hwm Eyring tau hais lawm, ntshe yuav tau hais nej tej lus tim khawv txog kev thov Vajtswv, piav txog tej koob hmoov uas nej tau txais vim yog kev thov Vajtswv, los sis qhia txog tej vaj lug kub uas hais txog kev thov Vajtswv.