Iren Mahsen en Presidensi Keieu, Pepweri 2012
Kangoangih Irail en Kapakap
Ni ansou me I kisin seri, ahi pahpa nohno padahkihieng ie sang ni ara karasaras duwen kapakap. I tepikihda medewehda ni mwomwen kilel me Sahm Nanleng ketiket wasa doh. Ni ei koahieklahr, irair me I ahniki me pid kapakap wekilahr. Kilel en nan ahi madamadau wiahlahr kilel en Sahm Nanleng me kerendo, me ketiket nan marain, oh me mwahngihie ni unsek.
Wekideklao kohdohngie ni ansou me I alehdi kadehde mehlel me pid duwen en Joseph Smith ah koasoaia dahme e lelohng nan 1820 nan Manchester, New York, me mehlel:
I kilangada uhr en marain ehu me pohnanginte moangeie, marainsang lingen en ketipin, me kohdihdo lao e sereiehda.
“Sohte pwand mwurin eh pwarada I diarada me I saledeksangehr ngehn suwed me koliehdio. Ni ansou me maraino sereiehda I kilangada Kahlap riemen, me ara lingan oh kilohri sohte kak kawehwehdi, keskesihnen pohi nan wehwe. Emen ira mahsendohng ie, lukwerihkinie edei oh mahsanih, idilahng mehteio— Met Nei Pwutak Kempoake. Rong Ih!” (Joseph Smith—History 1:16–17).
Sahm Nanleng ket nan welin tuhkeo ni rahn kaselel wo en spring de ansoun maiaudahsang ansoun lemwlemwur. E ketin malipehki Joseph edeo. Oh E ketin pohnesehki Sounkomour iasadahro en sampah duwen Sapwellime “Pwutak Kempoake.” Ni ansou oh wasa sohte lipilipil me komw kin kapakap, ahmw kadehde en mehlelpen irair lingan wo kak kapaiiukada.
Sahm me kitail kin kapakapohng iei Koht lingan me ketin kapikadahr sampah kan sang Sapwellime Pwutak Kempoakeo. E kin ketin karonge atail kapakap kan duwehte Eh ketin karonge ahn Joseph kapakapo—ni uwen sansal me duwehtehte ma re kohda pahn Kupwure. Uwen Eh ketin poakohng kitail e ketikihdo Sapwellime Iehros en wia atail Sounkomour. Sang ni kisakiso E ketin wiahda kitail en kak alehdi mour soutik oh mour kohkohlahte. Oh E kin ketikiong kitail, sang ni kapakap ni mwaren Sapwellime Iehroso, ansou mwahu en ehuong Ih nan mour wet ansou koaros me kitail pilada.
Me kol priesthood nan Mwomwohdiso en Sises Krais en Souleng en Imwin Rahn Akan ahniki likilik sarawi en “pwarek imwen emenemen towe, oh kangoange irail en kapakap ni sansal oh ni rir” (D&C 20:47; lipw tohrohr kapatapatehng).
Mie soangen wiepe tohto kitail kak kangoangehki aramas emen en kin kapakap. Ni karasaras, kitail kak kadehdehki me Koht ketkihieng kitail kosonned en kin kapakap ansou koaros, de kitail kak kihda karasaras kan sang nan pwuhk sarawi oh sang irair me kitail pein lelohng me pid kapai kan me kin kohdo sang ni kapakap kan en kaping kalahngan, pekipek, oh peidek. Ni karasepe, I kak kadehdehki me I ese me Sahm Nanleng kin ketin sapeng atail kapakap kan. I alehdier kaweid oh kaloalamwahu sang ni lepin mahsen kan me kin peidohng nan ahi madamadau, oh I ese pwehki Ngehno me lepin mahsen pwukat pwilisang rehn Koht.
Soukohp Joseph Smith ahniki soangen irair pwuko, oh komw pil kak iang ahniki. E alehdi pasapeng wet sang ni ah kapakap mehlel:
“Nei pwutak, meleilei en mie nan ngenomwen; ahmw kasongosong oh ahmw lokolok pahn wia ansou mwotomwot te.
“Oh eri, ma ke pahn dadaurete ni mwahu, Koht pahn ketin kalapalapihkomwihla nan sapwellime wehio” (Tehk D&C 121:7–8).
Met iei kaudiahl sang Sahm limpoak ong pwutak loaloapwoat men nan eh kahpwal laud. Sapwellimen Koht seri koaros kak patohieng Ih ni kapakap. Sohte kangoang en kapakap kin laudsang ahi kin ahniki pepehm en limpoak oh marain me kin iangodo pasapeng kan en kapakap karakarahk.
Kitail kin alehdi kadehde en sohte lipilipil kosonned en Koht sang ni kapwaiada kosonnedo (tehk Sohn 7:17). Met mehlel ong me pid kosonned me kitail alehdier en kin kapakap ansou koaros ni sansal oh ni rir. Ni ahi wia amwail sounpadahk oh kempoakapahmwail, I inouki me Koht pahn ketin sapeng amwail kapakap kan oh sang ni manaman en Ngehn Sarawi, kumwail kak ese ong pein kumwail me pasapengo pwilisang Reh.
© 2012 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/11. Kamanaman ong kawehwe: 6/11. Kawehwehpen First Presidency Message, February 2012. Pohnpeian. 10362 885
Padapadahk sang Iren Mahsen Wet
-
“Kilel wia dipwisoun kasukuhl kesempwal pwehn kin kakehlailih ire oaralap en padahk ehu” (Teaching, No Greater Call [1999], 176). Kasalehda mahlen me litopw en Joseph Smith de Kasansal Keieu. Koasoaiahda irair me Joseph Smith lelohng me pid kapakap. Ia duwen ahmw kapakap kan ahr kak en ahpwete katapan ong uhk ma ke pahn medewe me “Sahm Nanleng … karanihiuk,” ni duwen me President Eyring kin wia?
-
Ni duwen me President Eyring kaweidki, medewe en ehukihda ahmw kadehde duwen kapakap, kawehwe duwen kapai kan me komw alehdihier pwehki ahmw kin kapakap, de ehukihda iren pwuhk sarawi kan me pid duwen kapakap.