Iren Mahsen en Padahk en Pas, Pepweri 2012

Silepe Kan en Wasahn Kousoan

Onopiki iren mahsen wet oh, ni eh pahn konehng, koasoaiahkihieng lih akan me komw kin pwarek. Doadoahngki peidek kan pwehn seweseikomwi kakehlailih riomw lih akan oh pwehn wiahda Pwihn en Sawas en Lih en wiahla pali kesempwal en pein ahmw mour.

Pwoson, Peneinei, Sawas

“Kumwail me wia silepe kan en wasahn kousoan,” mahsanih President Gordon B. Hinckley (1910–2008) ni ah ketkihda “Peneinei: Kalohk Ehu Ong Sampah” nan mihting lap en Pwihn en Sawas en Lih nan 1995. “Kumwail me kin kaipwihdi serihkan. Kumwail me pahn kin apwalih irail oh kairada rehrail mwohmw kan me re pahn ahniki oh kapwaiada nan arail mour. Sohte doadoahk tohrohr me karanih nanleng duwehte apwalihada sapwellimen Koht pwutak kan oh serepein kan.”¹

Kereniengehr sounpar 17 met me kalohk wet wie kakehlailki me atail pwukoa keieu kesempwal kan poahsoankihda kakehlaka peneinei oh nan ihmw kan—sohte lipilipil irair dah me kitail mih loale. Barbara Thompson, me met wia keriaun sounsawas nan presidency lap en Pwihn en Sawas en Lih, mihmi nan Salt Lake Tabernacle ni ansou me President Hinckley tepin wadekada kalohko. “Rahno wia rahn kapwuriamwei,” e taman. “I kehn duwen kesempwalpen mahseno. I pil tehkada me I pein wie medemedewe, ‘Met wia mehn kaweid mwahu ong pahpa nohno kan. E pil wia lapalahn pwukoa ehu ong pahpa nohno kan.’ I medewe ansou kis me e sohte nohn dokeie pwehki ahi sohte pwopwoud oh sohte nainiki seri. Ahpw kerenieng pil ansouohte I mwadangete medewe, ‘Ahpw soh pwe e pil dokeie. Ngehi wia kisehn peneinei ehu. Ngehi nein emen serepein, rien emen serepein, me emen pahn nohnohki, me emen pahn rianiki, me rien ei pahpa de nohno pahn nainiki, oh me nohno pahpa kahlap pahn nainiki. Mie ahi pwukoa—oh kapai pwehki—I wia kisehn peneinei ieu. Mendahte ma ngehi te kelehpw me momour nan ahi peneinei, I wiahte tohn sapwellimen Koht peneinei, oh I ahniki pwukoa en sewese kakehlailih peneinei teikan.’”

Me paiamwahu, kitail sohte kelehpwla nan atail doadoahk kan. “Sawas keieu laud,” Sister Thompson koasoaia, “me kitail pahn ahniki ni atail pahn kin kakehlaka peneinei iei en ese oh idawehn padahk kan en Krais oh kin kehliki Ih pwehn seweseikitail.”²

Sang Pwuhk Sarawi Kan

Lepin Padahk Audapan Kan 22:6;1 Nephi 1:1;2 Nephi 25:26; Alma 56:46–48; Doctrine and Covenants 93:40

Sang Atail Poadoapoad

“Ni ansou me Sister Bathsheba W. Smith papah ni duwen kapahmen en president lap en Pwihn en Sawas en Lih [sang 1901 lel 1910], e tehkada anahn en kakehlaka peneinei, ih eri koasoanehdi padahk kan me pid duwen wia nohno ong lih akan en Pwihn en Sawas en Lih. Padahk kan iangahki kaweid me pid duwen nan pwopwoud, epwel ni ansoun liseian, oh kakairada seri. Padahk pwukat utung ahn President Joseph F. Smith ah padahk kan me pid duwen Pwihn en Sawas en Lih ahr kin sewese lih akan nan arail pwukoa kan en nan ihmw:

“Wasa sohte lipilipil kan me kin mie salelepek de sawehwe me pid duwen peneinei, pwukoa kan en nan peneinei, me pid duwen pwukoa kan me konehng mie oh me kin mie ni pwung nanpwungen pwopwoud oh nanpwungen pahpa nohno oh serihkan, iet pwihn wet koasoandihier de kerenohng irail, oh sang ni kisakis kan sang powe oh kamarain me mie ong pwihn wet irail kaunop oh onop en kihda kasukuhl me doke pwukoa kesempwal pwuko.’”³

Dahme I Kak Wia?

Ia duwen ahi pahn kak sewese riei lih akan me I kin tetehk en kakehlailih arail peneinei kan?
Ia duwen ahi kak wia kaweid en mour pwung nan ahi peneinei?