Mensahe sa Visiting Teaching, Pebrero 2012

Mga Tagbantay sang Puluy-an

Tun-i ining materyal kag, sa nagakaigo, hambali ini upod sang mga sister nga inyo ginabisita. Gamita ang mga pamangkot agud buligan kamo sa pagpabakod sang inyo mga sister kag himuon ang Relief Society nga aktibo nga bahin sang inyo mismo kabuhi.

Pagtuo, Panimalay, Bulig

“Kamo ang mga tagbantay sang puluy-an,” siling ni Pangulong Gordon B. Hinckley (1910–2008) sa iya pagpresentar sang “Ang Panimalay: Isa ka Proklamasyon sa Kalibutan” sa pangkabilugan nga miting sang Relief Society sang 1995. “Kamo ang mga nagabun-ag sang mga kabataan. Kamo amo ang nagabatiti sa ila kag nagapahamtang sa ila mga kaugalingon sang mga kinabatasan sang ila mga kabuhi. Wala na sang iban pa nga buluhaton nga subong kadiosnon sangsa pagbatiti sang mga anak sang Dios.”¹

Sa halos 17 katuig na karon ining proklamasyon nagadagmit nga ang aton labing importante nga mga responsibilidad nasentro sa pagpabakod sang mga pamilya kag mga puluy-an—wala’y sapayan sang aton mga sirkumstansya sa karon. Si Barbara Thompson, karon ika-duhang manuglaygay sa pangkabilugan nga panguluhan sang Relief Society yara sa Salt Lake Tabernacle sang si Pangulong Hinckley una nga nagbasa sang proklamasyon. “Yadto isa ka dako nga okasyon,” iya nadumduman. “Nabatyagan ko ang kaimportante sang mensahe. Namarasmasan ko man ang akon kaugalingon nga nagahunahuna, ‘Ini isa ka dako nga giya para sa mga ginikanan. Isa man ini ka dako nga responsibilidad para sa mga ginikanan.’ Naghunahuna ako sing makadali nga wala ini nagatumod gid sa akon bangod indi ako kasado kag wala ako sang kabataan. Apang halos subong kadasig ako naghunahuna, ‘Pero nagatumod gid ini sa akon. Isa ako ka miyembro sang isa ka pamilya. Isa ako ka anak, isa ka utod, isa ka tiya, isa ka pakaisa, isa ka hinablos, kag isa ka apo. May yara ako sang mga responsibilidad—kag mga bugay—bangod isa ako ka miyembro sang isa ka pamilya. Bisan pa nga ako na lang ang nagaisahanon nga buhi nga miyembro sang akon pamilya, isa gihapon ako ka miyembro sang pamilya sang Dios, kag may responsibilidad ako sa pagbulig nga pabakuron ang iban nga mga pamilya.’”

Maayo lang kay wala kita nagaisahanon sa aton mga paghimud-os. “Ang pinakadako nga bulig,” siling ni Sister Thompson, “nga maangkon naton sa pagpabakod sang mga pamilya amo ang hibaluon kag sundon ang mga doktrina ni Cristo kag magsalig sa Iya nga buligan kita.”²

Gikan sa Balaan nga mga Kasulatan

Mga Hulubaton 22:6; 1 Nefi 1:1; 2 Nefi 25:26; Alma 56:46–48; Doctrine and Covenants 93:40

Gikan sa Aton Kasaysayan

“Sang si Sister Bathsheba W. Smith nag-alagad bilang ikaapat nga pangkabilugan nga pangulo sang Relief Society [humalin 1901 tubtob 1910], nakita niya ang kakinahanglanon sa pagpabakod sang mga pamilya, kag gani nagpahamtang sia sang mga leksyon sa pag-edukar sang mga iloy para sa mga kauturan sang Relief Society. Ang mga leksyon naglakip sang laygay parte sa pag-asawahay, pagtatap sang nagabusong nga mga babayi, kag pagbatiti sang mga kabataan. Ining mga leksyon nagsakdag sang mga pinanudlo ni Pangulong Joseph F. Smith parte sa Relief Society nga nagabulig sa mga babayi sa ila mga papel sa puluy-an:

“‘Kon sa diin nga may yara sang pagkaignorante ukon bisan kakulang sang paghangop parte sa pamilya, mga katungdanan sang pamilya kag mga obligasyon nga dapat magluntad kag nagaluntad sing husto sa tunga sang bana kag asawa kag sa tunga sang mga ginikanan kag mga kabataan, dira ining organisasyon nagaluntad ukon malapit lang, kag paagi sa natural nga espirituhanon nga mga dulot kag inspirasyon nga kabahin sang organisasyon handa sila sa paghatag sang panulin parte sinang importante nga mga katungdanan.’”³

© 2012 iya sang Intellectual Reserve, Inc. Tanan nga mga kinamatarong ginahuptan. Ginbalhag sa USA. Petsa sang pagtugot sa Ingles: 6/11. Petsa sang pagtugot sa paglubad: 6/11. Paglubad sang Visiting Teaching Message, February 2012. Hiligaynon.10362 861

Ano ang Sarang Ko Mahimo?

Paano ko mabuligan ang kauturan nga babayi nga akon ginabantayan nga pabakuron ang mga pamilya?
Paano ako mangin isa ka matarong nga impluwensya sa akon pamilya?