Mensahe sang Unang Panguluhan, Pebrero 2012
Laygayi Sila nga Magpangamuyo
Sang gamay pa lang ako, gintudloan ako sang akon mga ginikanan paagi sa ehemplo nga magpangamuyo. Nagsugod ako paagi sa paghunahuna sa akon kaisipan sang Amay nga Langitnon nga malayo. Sa akon pag-edad, ang akon eksperiyensya sa pagpangamuyo nagliwat. Ang larawan sa akon kaisipan nangin ang Amay nga Langitnon nga malapit lang, nga nalikopan sang kasanag, kag nakakilala gid sa akon.
Ina nga pagliwat nag-abot sa akon pag-angkon sang isa ka pat-od nga panaksihon nga ang pahayag ni Joseph Smith sang iya eksperiyensya sang tuig 1820 sa Manchester, New York, matuod:
“Nakita ko ang isa ka haligi nga kasanag nga halin gid nayon sa ibabaw sang akon ulohan, nga ang kasilaw labaw pa sa adlaw, nga nag-amat-amat paidalom tubtob nga ini nagtupa sa akon.
“Wala madugay sang magtuhaw ini, natalupangdan ko ang akon kaugalingon nga naluwas gikan sa kaaway nga naggapos sa akon. Sang magtupa sa akon ang kasanag, nakakita ako sang duha ka mga Tinuga, nga ang kasilaw kag himaya indi masaysay, nga nagatindog sa hangin sa ibabaw ko nayon. Ang isa sa ila naghambal sa akon, nga ginatawag ako sa akon ngalan kag nagsiling, nga nagatudlo sa isa—Ini ang Akon Hinigugma nga Anak. Pamatii Sia!” (Joseph Smith—History 1:16–17).
Ang Amay nga Langitnon yara sa kakahuyan sa sina nga matahum nga adlaw sang tigpamulak. Gintawag Niya si Joseph sa iya sini ngalan. Kag ginpakilala Niya ang nabanhaw nga Manluluwas sang kalibutan bilang Iya “Hinigugma nga Anak.” Kon san-o man kag kon diin man kamo magpangamuyo, ang inyo panaksihon sang kamatuoran sinang mahimayaon nga eksperiyensya sarang magbugay sa inyo.
Ang Amay nga aton ginapangamuyuan amo ang mahimayaon nga Dios nga nagtuga sang mga kalibutan paagi sa Iya Hinigugma nga Anak. Ginapamatian Niya ang aton mga pangamuyo subong nga ginpamatian Niya ang pangamuyo ni Joseph—subong kaathag nga daw nagapangamuyo kita sa Iya presensya. Tuman ang Iya paghigugma sa aton nga Iya ginhatag ang Iya Anak nga mangin aton Manluluwas. Paagi sinang dulot ginhimo Niya nga posible para sa aton nga makaangkon sang pagkawala’y kamatayon kag kabuhi nga wala’y katapusan. Kag Iya ginatanyag sa aton, paagi sa pangamuyo sa ngalan sang Iya Anak, ang oportunidad sa pagkomunikar sa Iya sa sining kabuhi sa kasunson nga luyag naton.
Ang mga nagakapot sang priesthood sa Ang Simbahan ni Jesucristo sang mga Santos sa Ulihing mga Adlaw may yara sang sagrado nga katungdanan sa pagduaw sa balay sang tagsa ka miyembro, kag paglaygay sa ila sa pagpangamuyo sing hayag kag sing sekreto kag sa pagtuman sang tanan nga mga katungdanan sang pamilya (tan-awa sa D&C 20:47).
Madamo sang mga paagi sa paglaygay sa isa ka tawo nga magpangamuyo. Halimbawa, sarang kita magpamatuod nga ang Dios nagmando sa aton nga magpangamuyo pirme, ukon sarang kita maglaragway sang mga halimbawa gikan sa balaan nga kasulatan kag gikan sa aton kaugalingon nga eksperiyensya sang mga bugay nga nagahalin sa mga pangamuyo sang pagpasalamat, pagpangabay, kag pagpangayo sang paghangop. Halimbawa, sarang ako magpamatuod nga nakahibalo ako nga ang Amay nga Langitnon nagasabat sang mga pangamuyo. Nakabaton ako sang direksyon kag pagpasulhay gikan sa mga pulong nga nag-abot sa akon hunahuna, kag nakahibalo ako paagi sa Espiritu nga ang mga pulong gikan sa Dios.
Ang Propetang si Joseph Smith nakaangkon sang subong nga mga eksperiyensya, kag gani sarang man kamo. Iya nabaton ining sabat sa iya hugot nga pagpangamuyo:
“Anak ko, ang paghidaet mangin yara sa imong kalag; ang imong kabudlayan kag imong mga kasakit mangin sa malip-ot lamang nga tion;
“Kag nian, kon mabatas mo ini sing maayo, ang Dios magapahitaas sa imo sa kahitaasan” (tan-awa sa D&C 121:7–8).
Ina isa ka pahayag gikan sa isa ka mapinalanggaon nga Amay sa isa ka tampad nga anak nga yara sa tuman nga kasakit. Ang tagsa ka anak sang Dios sarang makakomunikar sa Iya paagi sa pangamuyo. Wala sang laygay sa pagpangamuyo ang may nangin subong kadako nga epekto sa akon pareho sang mga balatyagon sang paghigugma kag kasanag nga nagaabot upod sa mga sabat sa mapainubuson nga mga pangamuyo.
Nagaangkon kita sang panaksihon sang bisan ano nga kasuguan sang Dios paagi sa pagtuman sinang kasuguan (tan-awa sa Juan 7:17). Matuod ini sa mando nga magpangamuyo kita pirme sing hayag kag sing sekreto. Bilang inyo manunudlo kag inyo abyan, ginasaad ko nga ang Dios magasabat sang inyo mga pangamuyo kag nga paagi sa gahum sang Balaan nga Espiritu, sarang ninyo mahibaloan sa inyo kaugalingon nga ang mga sabat naggikan sa Iya.
© 2012 iya sang Intellectual Reserve, Inc. Tanan nga mga kinamatarong ginahuptan. Ginbalhag sa USA. Petsa sang pagtugot sa Ingles: 6/11. Petsa sang pagtugot sa paglubad: 6/11. Paglubad sang First Presidency Message, February 2012. Hiligaynon. 10362 861
Pagtudlo gikan sa Sining Mensahe
-
“Ang mga larawan importante nga mga pamaagi sa pagpabakod sang mayor nga ideya sang isa ka leksyon” (Teaching, No Greater Call [1999], 176). Magpakita sang isa ka larawan ni Joseph Smith ukon sang Unang Palanan-awon. Hambali ang eksperiyensya ni Joseph Smith parte sa pangamuyo. Paano mangin mas makahulugan ang inyo mga pangamuyo kon inyo ginahunahuna ang “Amay nga Langitnon … nga malapit lang,” pareho kay Pangulong Eyring?
-
Subong nga ginapanugyan ni Pangulong Eyring, binagbinaga ang pagpaambit sang inyo panaksihon parte sa pangamuyo nga ginalaragway ang mga bugay nga inyo nabaton bangod sang pangamuyo, ukon ginapaambit ang balaan nga mga kasulatan parte sa pangamuyo.