Klumech er a Roldingel e Olisechakl, Ongerung el Buil 2012

Mengkerengel a Telungalk

Mosuub er tial klumech, ea di lungil, e msodii lobengterir a rodos el moldingel er tir. Mousbech aikel ker el smisicheterir a rodos e dirrek el rullii a Cheldebechel er a Rolngeseu meng mo klou a belkul er a klengar kau.

Klaumerang, Telungalek, Ngeseu

“Kau a mengkerengel a telungalk,” a President Gordon B. Hinckley (1910–2008) a dilung er sera louchais el kirel “A Telungalk: Chais el mora Beluulechad” ra cherrengelel a miting ra Relief Society ra 1995. “Kau a omtebechel er a rengalk. Kau ngkel omekeroul er tir e kudmokl a ungil kse ra klengar tir. Ng diak a ngodech el ureor el chedaol el uaia ulekerulir a resechal ma redil el ngelekel a Dios.”¹

Ng mocha kmeed el teruich ma euid el rak e tial chais a mla lmuut el mo mesisiich el kirel aikel meklou a belkul el ngercheled el ngii a melisiich a telungalk ma blai—el diak el iior ra teletael ra klengar el de ngara chelsel. A Barbra Thompson, el ongeru el counselor er a cherrengelel omerreder ra Relief Society, a mlara Salt Lake Tabernacle ra President Hinckley a lechiuii tial klumech. “Ng kmal mle klou el teletael,” el ngii a medengelii. “Ak mlo melchesuar a klou el belkul tial klumech. Ak miltik er ngak el omdasou el kmo, ‘Tia kmal klou a belkul el ngesou el mora rechedam ma rechedil. Ng ta er a kmal klou el ngerchelir a rechedam me a rechedil.’ A kulemdasou el kmo ng diak a kmal belkul el mei er ngak ele ng dimlak bechiil e diak kuungalk. Eng di a kmal di mle mereched el mo omdasou el kmo, ‘Ng melutk el bedul ngak. Ngak a chedal a telungalek. Ngak a redil, odos, anti, e cousin, e niece, e ngelekel a mechas ma rubak. Ngarngii a ngerchelek—lobengkel a klengeltengat—ele ngak el chedal a telungalk. Malsekum eak di chimong el chedal a telungalk er ngak, eak dirrek el uldimukl er a telungalk er a Dios, e ngarngii a ngerchelek el olngeseu el melisiich a bebil ra telungalk.’”

Kede ngeltengat, el diak el dil kid el tang ra blak el reng er kid. “A kot el kou el ngesou,” ng melekoi a Sister Thompson, “sel bo dolisiich a telungalk a mo medengei e oltirakl a osisecheklel a Kristo e ultuil er Ngii me le ngesukid.”²

Ngara Chedaol llechukl

Osisechakl 22:6; 1 Nephi 1:1; 2 Nephi 25:26; Alma 56:46–48; Doctrine and Covenants 93:40

Ngara Reksi er Kid

“A Sister Bathsheba W. Smith a mle ongeuang el merreder ra cherrengelel a Relief Society [ra 1901 el mora 1910], eng milsang a klou el belkul omelisiich ra telungalk, meng kildmeklii a teltael ra omesuub ra klechedil el mora rodos ra Relief Society. A suobel a uldimukl er ngii omellach el kirel a chebechiil, siungel a kldiull, ma ulekerulir a rengalk. Aikal suobel a smisichii osischeklel a President Joseph F. Smith el kirel a Relief Society el ngosuterir a redil ra ikel ngerchelir ra blai:

“Me sel sekum e ngarngii a rrau el reng malechub e ngelsonges ra klemedengei el kirel a telungalk, ngerachel ra telungalk, el kirel aikel ngerachel ra delongelel a sechal ma redil ma rechedam ma rengalk, e ngarngii a chelechad el di kmeed, el okiu chedaol ulekrael er tial chelechad ete kldmokl el mo ouchais el kirel aikaikid el meklou a belkul el ngerachel.’”³

© 2012 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/11. Kengei er a oidel: 6/11. Oidel a Visiting Teaching Message, February 2012. Palauan. 10362 881

Ngerang Sebechek el Rulii?

Ng mekerang e sebechek el ngosuterir a rodos er ngak el omes e melisiich a telungalk?
Ng mekerang e sebechek el mo melemalt el okesiu el mora telungalk er ngak?