Yut
Wan Profet we I Laef I Lidim Yumi
Taem mi bin gat 16 yia, mi bin gat janis blong go long jeneral konfrens miwan blong fas taem. Famle blong mi i bin stap long Wes Oregon, YSA, mo mifala i bin draev i go long Yuta blong go long konfrens mo blong putum bigfala brata blong mi long misinari trening senta.
Mi bin go long konfrens wetem wan tingting blong wantem kasem tijing we i kam long Tabu Spirit. Olsem wan risal, mi bin kasem tru long Spirit we i soemaot wan samting we ating mi no save kasem sapos mi no bin rere gud long miwan.
Long taem blong wan long ol sesen, evriwan i bin stanap mo singsing tugeta hym blong kongregesen, “Lukaot Gud Mifala, O Yu we Yu Hae Jehova.” Taem mifala i stap singsing, mi gat filing ia stret blong lukluk raon long Konfrens Senta. Mo mi bin mekem mo mi bin filim paoa blong yuniti blong ol taosen man we oli stap ia taem mifala evriwan i bin leftemap ol voes blong presem God.
Afta mi bin gat wan eksperiens we mi bin filim olsem Nifae taem hem i bin luk visen blong tri blong laef, from Spirit i bin talem long mi, “Luk” (luk long 1 Nifae 11–14). Mi bin luk i go long Presiden Tomas S. Monson mo mi bin filim se yuniti blong Jos i stap oltaem from wan profet we i stap laef i stap lidim yumi. Tru long witnes blong Tabu Spirit, mi bin save se Presiden Monson i wan tru profet blong dei blong yumi, mo mi bin save se Jisas Kraes i lidim Jos ia tru long hem.