Fas Presidensi Mesej, Maj 2012
From Wanem Yumi Nidim Ol Profet?
From se Papa long Heven i lavem ol pikinini blong Hem, Hem i no bin lego olgeta oli go tru long laef blong wol ia nomo olsem, mo no daerektem o lidim olgeta. Ol tijing blong Papa blong yumi long Heven oli no ol kaen ia we oli defren, we oli talem fastaem wanem bae i hapen, we oli no givim inaf we yu save faenem long wan smol buk long bukstoa. Ol tijing ia, oli ol waes blong wan selestial Man we i gat evri paoa, we i gat evri save, mo we i lavem ol pikinini blong Hem. Insaed long ol toktok blong hem, i gat sikret ia we i stap truaot laef—we i ki blong stap glad long laef ia mo long wol blong kam.
Papa long Heven i talemaot waes ia long ol pikinini blong Hem long wol tru ol wokman blong Hem, ol profet (luk long Amos 3:7). Long ol dei blong Adam, God i bin toktok long ol pikinini blong Hem tru ol mesenja we wok blong olgeta i blong talemaot tingting blong Hem mo givim kaonsel long ol nara man. Ol profet oli ol tija we oli kasem insperesen mo, oltaem, oli ol spesel witnes blong Jisas Kraes (luk long D&C 107:23). Ol profet oli no toktok long ol pipol long taem blong olgeta nomo, be tu, oli toktok long ol pipol truaot wol evri taem. Yu save harem voes blong olgeta truaot long plante handred yia i go, olsem wan testeman blong tingting blong God i go long ol pikinini blong Hem.
Tedei i no defren long ol yia we oli bin pas. Lod i no lavem yumi smol nomo long dei blong yumi tedei bitim olgeta blong ol taem bifo. Wan long ol gudfala mesej blong Restoresen blong Jos blong Jisas Kraes i we God i gohed blong toktok long ol pikinini blong Hem! Hem i no haed long ol heven be Hem i toktok tedei olsem we Hem i bin stap mekem long ol taem bifo.
Plante long wanem we Lod i bin talemaot long ol profet blong Hem, hem i blong protektem yumi long harem nogud olsem wanwan man mo olsem ol sosaeti. Taem God i toktok, Hem i mekem blong tijim, givim insperesen, wonem, mo mekem ol pikinini blong Hem oli kam moa gud. Taem wanwan man mo ol sosaeti oli no wantem save long ol instraksen blong Papa blong olgeta long Heven, bae oli no save ronwe long hadtaem, safaring, mo hadwok.
God i lavem ol pikinini blong Hem. From hemia nao Hem i askem samting strong long yumi tru long ol profet blong Hem. Olsem we yumi wantem wanem we i gud moa blong olgeta we yumi lavem, Papa long Heven i wantem wanem we i moa gud blong yumi. Taswe, ol instraksen blong Hem oli impoten tumas mo i nidim blong oli go aot kwik. From hemia nao, Hem i no livim yumi tedei, be Hem i gohed blong soemaot tingting blong Hem long yumi tru long ol profet blong Hem. Fiuja blong yumi mo hemia blong wol bae i dipen nomo long olsem wanem yumi stap lisin mo olsem wanem yumi stap folem toktok we God i talemaot long ol pikinini blong Hem.
Ol instraksen blong God, we mane i no save pem, i go long ol man long wol oli stap long Baebol, Buk blong Momon, Doktrin mo Ol Kavenan, mo Perel blong Bigfala Praes. Antap long hemia, Lod i toktok long yumi tru long ol wokman blong Hem, olsem we bae Hem i mekem bakegen long jeneral konfrens we i stap kam ia.
Long evriwan we i ting se samting ia i save hapen—mo save askem, “I tru se God i toktok long yumi tedei?”—wetem evri hat blong mi, mi invaetem yufala blong “kam mo luk” ( Jon 1:46). Ridim toktok blong God we i stap long ol skripja. Lisin long jeneral konfrens wetem wan sora we i glad blong harem voes blong God we i givim tru long ol profet blong Hem long ol las dei ia. Kam, harem, mo luk wetem hat blong yu! From sapos yu lukaotem “wetem wan tru hat, wetem tingting we i tru blong wantem save, wetem fet long Kraes, bae [God] i soemaot trutok blong ol samting ia long yufala, tru long paoa blong Tabu Spirit” (Moronae 10:4). Mo tru long paoa ia, mi save se Jisas Kraes i laef mo i lidim Jos blong Hem tru long wan profet we i laef, we i Presiden Tomas S. Monson.
Ol brata mo sista, God i stap toktok long yumi tedei. Mo Hem i wantem tumas se evri pikinini blong Hem oli mas lisin mo mas folem voes blong Hem. Taem yumi mekem olsem, Lod bae i blesem mo sapotem yumi bigwan long ol gud samting, tugeta long laef ia mo truaot long ol wol we oli stap kam.
© 2012 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/11. Oli letem translesen: 6/11. Translesen blong First Presidency Message, March 2012. Bislama. 10363 852