Visiting Tijing Mesej, Maj 2012
Ol Gel Insaed long Kingdom blong Mi
Stadi long toktok ia, mo olsem we i stret, toktok raon long hem wetem ol sista we yu stap visitim. Yusum ol kwestin blong helpem yu blong mekem ol sista blong yu oli kam strong moa mo blong mekem Rilif Sosaeti i kam wan aktiv pat long laef blong yuwan.
Fet, Famle, Help
Yumi ol gel blong Papa blong yumi long Heven. Hem i save yumi, i lavem yumi, mo i gat wan plan blong yumi. Pat blong plan ia, i blong kam long wol ia blong lanem blong jusum gud aot long nogud. Taem yumi jusum blong kipim ol komanmen blong God, yumi givim ona long hem mo soem aedentiti blong yumi olsem ol gel blong God. Rilif Sosaeti i helpem yumi tingbaot tabu laen ia.
Rilif Sosaeti mo histri blong hem i mekem yumi kam strong moa mo i sapotem yumi. Juli B. Bek, Rilif Sosaeti jeneral presiden, i bin talem: “Olsem ol gel blong God, yufala i stap rere from ples we oli mekem blong yufala blong ol taem we i no save finis, mo wanwan long yufala i gat wan aedentiti blong wan woman, tabu fasin, mo responsabiliti. Sakses blong ol famle, blong ol komuniti, blong Jos ia, mo spesel plan blong fasin blong sevem man i dipen long hamas bae yufala i stap fetful. … [Papa blong yumi long Heven] i krietem Rilif Sosaeti blong help blong bildim ol pipol blong Hem mo rere long olgeta from ol blesing blong tempol. Hem i putum [Rilif Sosaeti] blong laenemap ol gel blong Hem long level blong wok blong Hem mo blong kasem help blong olgeta blong bildim kingdom blong Hem mo mekem ol hom blong Saeon oli kam strong moa.”1
Papa blong yumi long Heven i bin givim yumi sam spesel wok blong help blong bildim Kingdom blong Hem. Hem i bin blesem yumi tu wetem ol presen long saed blong spirit we yumi nidim blong finisim ol spesel wok ia. Tru long Rilif Sosaeti, yumi gat ol janis blong yusum ol presen ia blong mekem ol famle oli kam strong moa, blong helpem olgeta we oli stap long nid, mo blong lanem olsem wanem blong laef olsem ol disaepol blong Jisas Kraes.
Presiden Dita F. Ukdof, Seken Kaonsela long Fas Presidensi, i bin talem abaot fasin blong kam wan disaepol: “Taem yumi wokbaot wetem fasin blong save wet longtaem long rod ia blong kam wan disaepol, yumi soem long yumiwan level blong fet blong yumi mo hamas yumi glad blong akseptem tingting blong God bitim hemia blong yumi.”2
Bae yumi mas tingbaot se yumi ol gel blong God mo yumi traehad blong laef olsem ol disaepol blong Hem. Taem yumi mekem olsem, bae yumi help blong bildim kingdom blong God long wol ia mo kam klin inaf blong gobak long ples blong Hem.
I Kamaot long Ol Skripja
Sekaraea 2:10 Luk long Doctrine and Covenants 25:1, 10, 16; 138:38–39, 56; “Famle: Wan Ofisol Toktok I Go long Wol” (Liahona mo 35538 852,
I Kamaot long Histri blong Yumi
Long 28 Epril 1842, Profet Josef Smit i bin talem long ol sista long Rilif Sosaeti: “Yufala i stap naoia long wan situesen we yufala i save tekem aksen folem olgeta filing ia we God i bin putum long [yufala]. … Sapos yufala i laef folem ol standet, bae oli no save stopem ol enjel blong kam ol man blong givhan blong yufala.”3
Taem hem i bin luksave paoa blong Rilif Sosaeti blong givim seves long ol narafala man mo blong helpem wanwan man o woman blong mekem fet blong hem i kam antap, Sina D. H. Yang, nambatri Rilif Sosaeti jeneral presiden, i bin promesem ol sista long 1893, “Sapos yufala i dig i go dip insaed long hat blong yufalawan, bae yufala i faenem, wetem help blong Spirit blong Lod, perel blong bigfala praes, testemoni blong wok ia.”4
© 2012 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/11. Oli letem translesen: 6/11. Translesen blong Visiting Teaching Message, March 2012. Bislama. 10363 852
Wanem Mi Save Mekem?
-
Olsem wanem mi save helpem ol sista blong mi blong kasem wanem oli save mekem olsem ol gel blong God?
-
Olsem wanem mi save yusum, insaed long laef blong mi, kaonsel mo ol woning ia we oli givim long ol woman long Doctrine and Covenants 25?