Agtutubo
Idauluan ti maysa a Sibibiag a Propeta
Idi agtawenak iti 16, naaddaanak iti gundaway a dimmar-ay a personal iti sapasap a komperensia iti umuna a gundaway. Agnanaed idi ti pamiliak iti akinlaud nga Oregon, USA, ket nagmanehokami a napan iti Utah tapno dumar-ay iti komperensia ken tapno idagasmi ni manongko iti missionary training center.
Napanak iti komperensia nga addaan iti tarigagay a masuruan babaen ti Espiritu Santo. Kas bungana, immawatak iti parangarang manipud iti Espiritu a nalabit a saanko koma a naawat no diak insagana ti bagik.
Kabayatan ti maysa kadagiti sesion, timmakder ti amin ket kinanta ti himno ti kongregasion, “Guide Us, O Thou Great Jehovah.” Bayat ti panagkantami, naawis ti riknak a mangilawlaw iti panagkitak iti Conference Center. Inaramidko ket naawis ti imatangko iti bileg ti panagkaykaysa ti rinibu a tattao sadiay bayat ti panangitag-aymi iti timekmi nga agdaydayaw iti Dios.
Kalpasanna naaddaanak iti padas a nakariknaak kas iti narikna ni Nephi iti nakitana ti parmata maipapan iti kayo ti biag, gapu ta imbaga kaniak ti Espiritu, “Kitaem” (kitaen iti 1 Nephi 11–14). Kinitak ni Presidente Thomas S. Monson ket nariknak nga adda panagkaykaysa ti Simbaan gapu ta idadauluannatayo ti maysa a sibibiag a propeta. Babaen iti saksi ti Nasantuan nga Espiritu, ammok a ni Presidente Monson ket pudno a propeta para iti aldawtayo, ken ammok nga idadauluan ni Jesucristo daytoy a Simbaan babaen kenkuana.