Mensahe iti Visiting Teaching, Marso 2012

Annak a Babbai iti Pagariak

Adalenyo daytoy a material, ken no maitutop, paglilinnawaganyo daytoy kadagiti kakabsat a babbai a sarungkaranyo. Usarenyo dagiti saludsod a mangtulong kadakayo a mangpapigsa kadagiti kakabsatyo a babbai ken mangaramid iti Relief Society nga aktibo a paset iti bukodyo a biag.

Pammati, Pamilia, Tulong

Annaknatayo a babbai iti Amatayo iti Langit. Am-ammonatayo, ay-ayatennatayo, ken adda planona para kadatayo. Paset dayta a plano ket iramanna ti yaay iti daga tapno mangsursuro a pumili iti nasayaat manipud iti dakes. No pilientayo ti agtungpal kadagiti bilin ti Dios, dayawentayo Isuna ken bigbigentayo ti pakaam-ammuan kas annak a babbai ti Dios. Tulongannatayo ti Relief Society a manglagip iti daytoy nadiosan a tawid.

Ti Relief Society ken ti pakasaritaanna ket mangpapigsa ken mangsuporta kadatayo. Ni Julie B. Beck, sapasap a presidente ti Relief Society, kinunana: “Kas annak a babbai ti Dios, agsagsaganakayo para kadagiti agnanayon a pannakaawag, ken addaan ti tunggal maysa kadakayo iti agnanayon a pakaam-ammuan, nakaparsuaan, ken pagrebbengan kas babbai. Ti balligi dagiti pamilia, dagiti komunidad, daytoy a Simbaan, ken ti napateg a plano ti pannakaisalakan ket agpannuray iti kinapudnoyo. …Insangrat ti [Nailangitan nga Amatayo] ti Relief Society a mangtulong a mangbuangay kadagiti taona ken mangisagana kadakuada para kadagiti bendision ti templo. Impasdekna ti [Relief Society] a mangisilpo kadagiti annakna a babbai iti aramidna ken tapno agtultuloy ti tulongda iti panagbangon iti pagarianna ken panangpapigsa kadagiti pagtaengan ti Zion.”¹

Inikkannatayo ti Nailangitan nga Amatayo iti masinunuo nga aramiden a tumulong a mangbangon iti pagarianna. Binendisionannatayo pay kadagiti naespirituan a sagut a kasapulantayo tapno mangileppas iti daytoy masinunuo nga aramid. Babaen ti Relief Society, addaantayo kadagiti gundaway a mangusar kadagiti sagsaguttayo a mangpapigsa kadagiti pamilia, mangtulong kadagiti agkasapulan, ken mangsursuro no kasano ti agbiag kas disipulo ni Jesucristo.

Ni Presidente Dieter F. Uchtdorf, Maikadua a Mammagbaga iti Umuna a Panguluen, kinunana maipapan iti kinadisipulo: “Babaen iti siaanus a panangsurottayo iti dalan ti kinadisipulo, ipakitatayo iti bagbagitayo ti tukad ti pammatitayo ken ti kinatallugodtayo a mangawat iti pagayatan ti Dios imbes a ti pagayatantayo.”²

Laglagipentayo koma nga annaknatayo a babbai ti Dios ket ikarigatantayo ti agbiag a kas disipulona. No aramidentayo daytoy, tumulongtayo a mangbangon iti pagarian ti Dios iti daga ken agbalintayo a maikari nga agsubli iti sidongda.

Manipud kadagiti Nasantuan a Kasuratan

Zacarias 2:10; Doktrina ken Katulagan 25:1, 10, 16; 138:38–39, 56; “Ti Kaamaan: Maysa a Waragawag ti Lubong” (Liahona ken Ensign, Nob. 2010, 129)

Manipud iti Pakasaritaantayo

Idi maika-28 ti Abril 1842, kinuna ni Propeta Joseph Smith kadagiti kakabsat a babbai iti Relief Society: “Naipankayo itan iti maysa a kasasaad a pakabalinanyo ti agtignay a mayannurot kadagita a panagrikna nga inkabil ti Dios [kadakayo]. … No agbiagkayo a nasayaat a mayannurot kadagiti karbenganyo, saan a mapengdan dagiti anghel iti panangkadkaduada kadakayo.”³

Iti panangbigbig iti bileg ti Relief Society nga agserbi kadagiti dadduma ken mangtulong kadagiti indibidual a mangpapigsa iti pammatida, ni Zina D. H. Young, maikatlo a sapasap a presidente ti Relief Society, ket inkarina kadagiti kakabsat a babbai idi 1893, “No agsapulkayo a nasayaat iti bukodyo a puspuso masarakanyonto, babaen iti tulong ti Espiritu ti Apo, ti perlas a kapatgan, ti pammaneknek maipapan iti daytoy nga aramid.”⁴

© 2012 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/11. Pannakaanamongna a maipatarus: 6/11. Pannakaipatarus ti Visiting Teaching Message, March 2012. Ilokano. 10363 864

Ania ti Maaramidko?

Kasano a matulongak dagiti kakabsatko a babbai a mangragpat iti potensialda kas annak a babbai ti Dios?
Kasano a mayaplikarko iti biagko ti balakad ken dagiti ballaag a naited kadagiti babbai iti Doktrina ken Katulagan 25?