Mensahe ti Umuna a Panguluen, Marso 2012
Apay a Kasapulantayo dagiti Propeta?
Gapu ta ay-ayaten ti Nailangitan nga Ama dagiti annakna, saanna a pinanawan ida nga agbiag iti daytoy a biag nga awan ti pangiturong ken pannarabayna. Dagiti pannursuro ti Nailangitan nga Amatayo ket saan a ti ordinario, mapadtuan, gagangay a kita a kas iti naingpis ti ti akkubna a libro a maalayo iti lokal a pagtagilakuan iti libro. Isuda ti pagsiriban ti kabilgan iti amin, mannakaammo ti amin a celestial a Nabiag a mangipatpateg kadagiti annakna. Maseknan kadagiti balikasna ket ti kasayaatan a palimed dagiti panawen—ti tulbek ti kinaragsak iti daytoy a biag ken iti umay a lubong.
Ipalgak ti Nailangitan nga Ama daytoy a pagsiriban kadagiti annakna iti daga babaen kadagiti katulonganna a propeta (kitaen iti Amos 3:7). Manipud kadagiti aldaw ni Adan, nakisaon ti Dios kadagiti annakna babaen kadagiti orakulo a nabilin a mangipalgak iti pagayatan ken balakadna kadagiti dadduma. Dagiti propeta ket naparegta a mannursuro ken kanayon a naisangsangayan a saksi ni Jesucristo (kitaen iti DkK 107:23). Kasao dagiti propeta saan laeng dagiti tao iti panawenda, ngem kasaoda pay dagiti tao iti amin a panawen. Isasaoda pay laeng aginnga ita dagiti balikasda kadagiti napalabas a siglo kas maysa a tulag ti pagayatan ti Dios kadagiti annakna.
Saan a maiduma ita nga agdama kadagiti panawen a napalabas. Maipada ti panagayat ti Apo kadagiti tao iti panawentayo kadagiti napalabas a panawen. Maysa kadagiti nagloriaan a mensahe ti Pannakaisubli ti Simbaan ni Jesucristo ket ti panagtultuloy ti Dios a pannakisao kadagiti annakna! Saan a nailemmeng kadagiti langit ngem makisasao ita kas iti pannakisaona kadagiti un-unana nga aldaw.
Kaaduan iti ipalgak ti Apo kadagiti propetana ket naisangrat a manglapped iti panagladigittayo kas indibidual ken kas kagimongan. No makisasao ti Dios, Isu ket mangisuro, mangparegta, manggugor, ken mangballaag kadagiti annakna. No saan nga ikankano dagiti indibidual ken kagimongan dagiti pammilin ti Nailangitan nga Ama, ar-aramidenda ngarud ti panagpeggad ti pannubok, panagrigat, ken panagbannogda.
Ay-ayaten ti Dios ti amin nga annakna. Dayta ti gapu no apay a sipapasnek nga agpakpakaasi kadatayo babaen kadagiti propetana. Kas iti panagtarigagaytayo iti no ania ti kasayaatan para kadagiti ipatpategtayo, kasta met iti panagtarigagay ti Nailangitan nga Ama iti no ania ti kasayaatan para kadatayo. Dayta ti gapu no apay nakapatpateg unay dagiti pammilinna ken no dadduma kasapulan unay. Dayta ti gapu no apay a saannatayo a binaybay-an iti agdama no di ketdi itultuloyna nga ipalgak ti pagayatanna kadatayo babaen kadagiti propetana. Ti gasattayo ken ti gasat ti lubongtayo ket agpannuray iti panagdengngeg ken panagtudio iti naipalgak a balikas ti Dios kadagiti annakna.
Dagiti saan a magatadan a pammilinna iti sangkataw-an ket masarakan iti Biblia, iti Libro ni Mormon, iti Doktrina ken Katulagan, ken iti Perlas a Kapatgan. Mainayon pay, makisasao ti Apo kadatayo babaen kadagiti katulonganna, kas iti pannakisaonanto manen iti umay a sapasap a komperensia.
Iti amin nga agsiddaaw no maaramid ti kasta a banag—a mabalin nga agsaludsod, “Posible kadi a kasaonatayo ti Dios iti agdama?”—iti amin a pusok awisenkayo nga “umay ken mangkita” (Juan 1:46). Basaenyo ti balikas ti Dios a masarakan kadagiti nasantuan a kasuratan. Dumngegkayo iti sapasap a komperensia nga addaan lapayag a natallugod a mangdengngeg iti timek ti Dios a naited babaen kadagiti propetana kadagiti ud-udina nga aldaw. Umaykayo, dumgngegkayo, ken kitaenyo a sipupuso! Ta no agkalikagumkayo a manggun-od a “naimpusuan, nga addaan iti pudno a panggep, ken addaan iti pammati ken ni Cristo, iparangarang ti [Dios] ti kinapudnona kadakayo, babaen ti pannakabalin ti Espiritu Santo” (Moroni 10:4). Babaen daytoy a pannakabalin, ammok a sibibiag ni Jesucristo ket iturturongna ti Simbaanna babaen ti maysa a sibibiag a propeta, a kas ken ni Presidente Thomas S. Monson.
Kakabsat, makisasao ti Dios kadatayo iti agdama. Ket tarigagayanna a dumngeg ken agtungpal ti amin nga annakna. No aramidentayo daytoy, nawadwad a bendisionan ken itandudonatayonto, agpada iti daytoy a biag ken iti umay a lubong.
© 2012 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/11. Pannakaanamongna a maipatarus: 6/11. Pannakaipatarus ti First Presidency Message, March 2012. Ilokano. 10363 864