Parau poro‘i a te Peresideniraa Matamua, Mati 2012
No te aha tatou e hinaaro ai i te mau peropheta ?
No te mea ua here te Metua i te Ao ra i Ta’na mau tamarii, aita Oia i vaiiho noa ia ratou ia haere na roto i teie oraraa tahuti nei ma te avei‘a e ma te arata‘i ore. E ere te mau haapiiraa a to tatou Metua i te Ao ra i te mea matau-noa-hia, o tei faaara-a‘e-na-hia, i te mea faufaa ore o ta outou e ohi noa mai i roto i te mau buka iti i te fare vairaa buka o te fenua iho. E mau haapiiraa no te paari a te hoê mana hope, te hoê Taata tiretiera tei ite i te mau mea atoa o tei here i Ta’na mau tamarii. Haaputuhia i roto i Ta’na mau parau ua riro ei ohipa huna no te mau tau—te taviri no te oaoa i roto i teie oraraa e i roto i te ao amuri atu.
Ua heheu mai te Metua i te Ao ra i teie paari i Ta’na mau tamarii i te fenua nei na roto mai i Ta’na mau tavini te mau peropheta (a hi‘o Amosa 3:7). Mai te tau mai â o Adamu, ua paraparau te Atua i Ta’na mau tamarii na roto i te mau nao ma‘itihia o te faauehia ia heheu atu i To’na hinaaro e te a‘o ia vetahi ê. Ua faaûruhia te mau peropheta i te mau haapiiraa e ua riro tamau noa ei mau ite taa ê no Iesu Mesia (a hi‘o PH&PF 107:23). Aita te mau peropheta e parau noa no te mau taata o to ratou anotau, te parau atoa ra ratou no te mau taata no te mau tau atoa. E tavevo to ratou reo na te mau anotau atoa mai te hoê fafauraa no te hinaaro o te Atua i Ta’na mau tamarii.
Aita teie mahana i taa ê i te mau tau i ma‘iri. Aita te Fatu i here iti i te feia o to tatou anotau i te feia i te mau tau i ma‘iri na. Hoê o te mau parau poro‘i hanahana o te Faaho‘iraa mai o te Ekalesia a Iesu Mesia oia ho‘i te tamau noa nei te Atua i te paraparau i Ta’na mau tamarii ! Aita Oia i taponi i roto i te mau ra‘i, te paraparau mai nei râ i teie mahana mai Ta’na i na reira i te mau tau i ma‘iri.
E rave rahi o te mau mea ta te Fatu i heheu i Ta’na mau peropheta ua faataahia ei faaararaa mamae no tatou ei mau taata e ei mau sotaiete. Ia parau ana‘e te Atua, te haapii ra, te faaûru ra, te tamâ ra e te faaara ra Oia i Ta’na mau tamarii. Ia tau‘a ore ana‘e te mau taata e te mau sotaiete i te mau haapiiraa a to ratou Metua i te Ao ra, te rave ra ia ratou i te ati o te tamataraa, o te mamae e o te pe‘ape‘a.
Ua here te Atua i Ta’na mau tamarii atoa. No reira Oia i titau rahi ai ia tatou na roto i Ta’na mau peropheta. Mai ia tatou e hinaaro i te mea maitai a‘e no te feia o ta tatou i here, ua hinaaro te Metua i te Ao ra i te mea maitai a‘e no tatou. No reira e mea faufaa roa Ta’na mau haapiiraa e i te tahi mau taime e mea rû. No reira aita Oia i vaiiho otare noa ia tatou i teie mahana, te tamau noa nei râ i te heheu i To’na hinaaro ia tatou na roto mai i Ta’na mau peropheta. To tatou hopea e te hopea o to tatou ao tei te huru o to tatou faarooraa e to tatou tau‘araa i te parau heheu a te Atua i Ta’na mau tamarii.
Tei roto te mau haapiiraa faufaa rahi a te Atua no te mau taata i te Bibilia, te Buka a Moromona, te Parau Haapiiraa e te mau Parau Fafau, e te Poe Tao‘a Rahi. A taa’tu ai te reira, te paraparau nei te Fatu ia tatou na roto mai i Ta’na mau tavini, mai Ta’na e na reira i te amuiraa rahi i muri nei.
No te feia atoa o te ui maere nei e mai te mea ra e tupu mau anei te reira ohipa—o te ui nei e, « e mea papû anei e te paraparau mai nei te Atua ia tatou i teie mahana ? »—ma to’u aau atoa te ani manihini nei au ia outou « a haere mai, a hi‘o » (Ioane 1:46). A taio i te parau a te Atua o te itehia i roto i te mau papa‘iraa mo‘a. A faaroo i te amuiraa rahi ma te hoê tari‘a ua ineine i te faaroo i te reo o te Atua e horo‘ahia mai na roto mai i Ta’na mau peropheta no te mau mahana hopea nei. A haere mai, a faaroo, e a hi‘o ma to outou aau ! Mai te mea e imi outou « ma te aau hinaaro mau, ma te mana‘o papu, e ma te faaroo i te Mesia, na’na ïa e faaite mai i te parau mau ia outou na roto i te mana o te Varua Maitai » (Moroni 10:4). Na roto i teie mana, ua ite au e te ora nei Iesu Mesia e te arata‘i nei i Ta’na Ekalesia na roto i te hoê peropheta ora, oia ho‘i te peresideni Thomas S. Monson.
Te mau taea‘e e te mau tuahine, te paraparau nei te Atua ia tatou i teie mahana. E te hinaaro nei Oia e ia faaroo Ta’na mau tamarii atoa e ia faaroo papû i To’na reo. A na reira noa ai tatou, e haamaitai mai e e paturu rahi mai te Fatu ia tatou, i roto anei i teie oraraa e na roto i te mau ao amuri atu.
© 2012 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo peretane : 6/11. Parau faati‘a no te iritiraa : 6/11. Iritiraa no First Presidency Message, March 2012. Tahitian. 10363 895