Parau poro‘i na te mau tuahine hahaere, Mati 2012

E Mau Tamarii Tamahine i roto i To’u Basileia

A tai‘o i teie haapiiraa, e mai te mea e tano, a aparau i te reira i te mau tuahine o ta outou e hahaere ra. A faaohipa i te mau uiraa no te tauturu ia outou ia haapuai i to outou mau tuahine e ia faariro i te Sotaiete Tauturu ei tuhaa itoito no to outou iho oraraa.

Te Faaroo, Te Utuafare, Te Totauturu

E mau tamarii tamahine tatou na to tatou Metua i te Ao ra. Ua ite Oia ia tatou, ua here ia tatou, e e faanahonahoraa ta’na no tatou. Hoê tuhaa no taua faanahonahoraa ra oia ho‘i te haereraa mai i te fenua nei no te haapii i te ma‘iti i te maitai i ni‘a i te ino. Ia ma‘iti ana‘e tatou ia haapa‘o i te mau faaueraa a te Atua, te faatura ra ia tatou Ia’na e te ite ra ia tatou i to tatou ti‘araa ei mau tamarii tamahine na te Atua. Te tauturu nei te Sotaiete Tauturu ia tatou ia haamana‘o i taua faufaa ai‘a hanahanaha ra.

E haapuai e e paturu te Sotaiete Tauturu e to’na aamu ia tatou. Ua parau o Julie B. Beck, peresideni rahi no te Sotaiete Tauturu e : « Ei mau tamarii tamahine na te Atua, ua ineine outou no te mau titauraa mure ore, e e ti‘araa vahine, e natura e e hopoi‘a ta outou tata‘itahi. Te manuïa o te mau utuafare, o te mau oire, o teie Ekalesia, e o te faanahoraa faufaa rahi o te faaoraraa tei te huru ia o to tatou haapa‘oraa. … ua faataa [to Tatou Metua i te Ao ra] i te Sotaiete Tauturu no te tauturu i te patu i To’na nunaa e ia faaineine ia ratou no te mau haamaitairaa o te hiero. Ua haamau Oia i te [Sotaiete Tauturu] no te ana‘i i Ta’na mau tamarii tamahine e Ta’na ohipa e no te faaô mai i ta ratou tauturu no te paturaa i To’na basileia e no te haapuairaa i te mau nohoraa no Ziona. »¹

Ua horo‘a mai to tatou Metua i te Ao ra ia tatou i te hoê ohipa taa ê no te tauturu i te patu i To’na basileia. Ua haamaitai atoa Oia ia tatou i te mau horo‘araa pae varua o ta tatou e titau no te faaotiraa i taua ohipa taa ê ra. Na roto i te Sotaiete Tauturu, e mau rave‘a ta tatou no te faaohipa i ta tatou mau horo‘araa no te haapuai i te mau utuafare, no te tauturu i te feia i roto i te ati e no te haapii mai e nahea ia ora mai te mau pĭpĭ a Iesu Mesia.

Ua parau o te peresideni Dieter F. Uchtdorf, taururu piti i roto i te Peresideniraa matamua, no te aupĭpĭraa : « Ia haere tatou ma te faaoroma‘i na ni‘a i te e‘a o te ti‘araa pĭpĭ, te faaite ra ïa tatou ia tatou iho i te puai o to tatou faaroo e to tatou hinaaro ia farii i to te Atua hinaaro eiaha râ i to tatou.^»2

Ia haamana‘o tatou e e mau tamarii tamahine tatou na te Atua e te tutava nei ia ora mai Ta’na mau pĭpĭ. A na reira ai tatou, te tauturu ra tatou ia patu i te basileia o te Atua i onei i ni‘a i te fenua nei e ia riro ei mea ti‘amâ no te ho‘i i mua i To’na aro.

No roto mai i te mau papa‘iraa mo‘a

Zekaria 2:10 ; Te Parau Haapiiraa e te mau Parau Fafau 25:1, 10, 16 ; 138:38–39, 56 ; « Te Utuafare : E Poro‘i i to te Ao nei » (Liahona e Ensign, Novema 2010, 129)

No roto mai i to tatou aamu

I te 28 no eperera 1842, ua parau te peropheta Iosepha Semita i te mau tuahine i roto i te Sotaiete Tauturu e : « Ua tuuhia outou i teie nei i roto i te hoê ti‘araa i reira outou e nehenehe ai e ohipa mai te au i teie mau aroha o ta te Atua i tanu i roto ia [outou]—mai te mea e ora outou mai te au i to outou faufaa taa ê, eita ïa te mau melahi e tape‘ahia ia riro ei mau hoa ohipa no outou ».³

Te iteraa i te mana o te Sotaiete Tauturu no te tavini ia vetahi ê e no te tauturu i te mau taata ia tupu rahi i roto i te faaroo, ua fafau o Zina D. H. Young, te toru o te peresideni rahi o te Sotaiete Tauturu, i te mau tuahine i te matahiti 1893, « Mai te mea e ŏ outou i roto i te hohonuraa o to outou iho aau, e ite outou na roto i te tauturu a te Varua o te Fatu, te poe tao‘a rahi, te iteraa papû no taua ohipa ra ».⁴

© 2012 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo peretane : 6/11. Parau faati‘a no te iritiraa : 6/11. Iritiraa no Visiting Teaching Message, March 2012. Tahitian. 10363 895

Eaha ta’u e nehenehe e rave ?

Nahea vau ia tauturu i ta’u mau tuahine ia imi i to ratou faufaa ei mau tamarii tamahine na te Atua ?
Nahea vau ia faaohipa i roto i to’u oraraa i te a‘o e te mau faaararaa tei horo‘ahia mai e te mau vahine i roto i te Parau Haapiiraa e te mau Parau Fafau 25 ?