Agtutubo
Makitakto Manen Isuna
Imparikna ti amak a tunggal maysa kadakami nga annak ket naisangsangayan. Impategnakami ken nadaras a mamakawan. Inaramidna ti amin a kabaelanna tapno masinunuona a tunggal maysa kadakami ket naragsak, ken inlawlawagna a kayatna ti kasayaatan para kadakami. Impategko unay isuna.
Idi addaak iti maikanem a grado, natay ti amak iti maysa nga aksidente iti lugan. Napalalo unay ti ladingitko ken ti pamiliak. Adda dakkel a giwang iti pamiliami. Ti amak ti tao a nagsadagak, ti maysa a tao nga inasitgak no adda idi dagiti problemak. Imbes nga agsapulak iti tulong kalpasan ti ipapatayna, binay-ak ketdi nga agtalinaed ti pungtot ken sakit. Inkeddengko iti kamaudiananna a basol ti Dios daytoy. Insardengko ti agbasa kadagiti nasantuan a kasuratak ken agkararag. Napanak laeng iti simbaan gapu ta kayat ni Nanang a mapanak. Pinadasko ti umadayo iti Nailangitan nga Amak.
Kalpasanna napanak iti Young Women camp iti umuna a gundaway. Kinayatko ti makiam-ammo kadagiti baro a gagayyem, ngem diak pay laeng nagbasa kadagiti nasantuan a kasuratak. Iti maudi a rabii, naaddaankami iti miting ti panagpaneknek. Nariknak ti maysa a banag nga awan kaniak iti nabayagen a panawen: ti Espiritu. Dinayawko dagiti babbalasitang a timmakder ken nangiburay kadagiti pammaneknekda, ngem nagtalinaedak a nakatugaw gapu ta impagarupko nga awan pammaneknekko. Kellaat a nariknak a masapul a tumakderak. Inungapko ti ngiwatko, a masmasdaawan no ania ti sawek. Isu nga insaok a naragsakak para iti Young Women camp. Kalpasanna natakuatak ti bagik nga agsasao nga ammok a natay ni Jesucristo para kaniak ken ay-ayatennak ti Nailangitan nga Amak ken pudno ti Simbaan.
Napnuanak iti naisangsangayan a talna. Agyamanak iti daytoy a padas a masaok nga ammok a makitakto manen ti amak gapu iti Pannubbot ken Panagungar ti Mangisalakan.