Mensahe ti Umuna a Panguluen, Abril 2012
“Nagungaren”
Pammaneknek ti Maysa a Propeta
“Ti nalawag a mensahe ti Sangakristianoan,” impakdaar ni Presidente Thomas S. Monson, ket ti panagungar ni Jesus a taga Nazaret manipud kadagiti natay. “Ti kinapudno ti Panagungar ket mangted iti maysa ken amin iti talna a mangdaeg iti pannakaawat” (kitaen iti Taga Filipos 4:7).1
Kadagiti sumaganad a binatog, imburay ni Presidente Monson ti pammaneknekna ken ti panagyamanna iti Panagungar ti Mangisalakan ken ipakdaarna a gapu ta ti Anak ket pinarmekna ti patay, amin nga annak ti Ama nga umay iti daga ket agbiagto manen.
Biag iti labes ti Mortalidad
“Mamatiak nga awan kadatayo ti makailadawan iti naan-anay a kaipapanan ti no ania ti inaramid ni Cristo para kadatayo iti Getsemani, ngem agyamanak iti inaldaw ti biagko para iti pangsubbot a sakripisiona para kadatayo.
“Iti maudi a kanito, mabalinna koma ti nagsanud. Ngem dina inaramid. Napasaranna ti kakaruan amin a banag tapno maispalna ti amin a banag. Iti panangaramidna iti daytoy, Isu ket nangted kadatayo iti biag iti labes daytoy a mortal a biag. Inispalnatayo manipud iti Pannakatnag ni Adan.
“Iti kaunggan ti kararuak, agyamanak Kenkuana. Sinuruannatayo no kasano ti agbiag. Sinuruannatayo no kasano ti matay. Impatalgedna ti pannakaisalakantayo.”2
Panangiwaksi iti Kinasipnget ti Ipapatay
“Kadagiti masinunuo a kasasaad, kas iti nakaro a panagsagaba ken sakit, umay ti ipapatay a kas maysa nga anghel ti kaasi. Ngem iti kaaduan a paset, ipapantayo daytoy a kas kabusor ti kinaragsak ti tao.
“Ti kinasipnget ti ipapatay ket mabalin a maiwaksi babaen ti silaw ti naipalgak a kinapudno. ‘Siak ti panagungar, ken ti biag,’ kinuna ti Maestro. ‘Ti mamati kaniak, uray no matay, agbiagto pay: Ket siasino man nga agbiag ken mamati kaniak, saanto a matay iti kaano man.’
“Daytoy a naipanamnama—wen, uray ti nasantuan a pammatalged—ti biag iti labes ti tanem ket makaipaay a naimbag iti talna nga inkari ti Mangisalakan idi impanamnamana kadagiti disipulona: ‘Ti talna ibatik kadakayo, ti talnak itdek kadakayo: saan a kas iti panangited ti lubong ti panangitedko kadakayo. Saan koma nga agpulkok ti pusoyo, ken di agbuteng.’”3
“Awan Ditoy”
“Nagbiag manen ti Mangisalakantayo. Ti kadayagan, makaliwliwa, ken makapanamnama iti amin a pasamak iti pakasaritaan ti tao ket napasamaken—ti balligi iti ipapatay. Napunasen ti sakit ken saem iti Getsemani ken Kalbario. Napatalgedanen ti pannakaisalakan ti sangkataw-an. Naispalen ti Pannakatnag ni Adan.
“Ti awan nagyanna a tanem iti dayta umuna a Paskua ti Panagungar ti sungbat iti saludsod ni Job, ‘No matay ti tao, agbiagto aya manen?’ Kadagiti amin a tao a makangngeg iti timekko, ipakdaarko, No matay ti tao, agbiagto manen. Ammotayo, gapu ta addaantayo iti silaw ti naipalgak a kinapudno. …
“Patpatgek a kakabsatko, iti oras ti kinalidaytayo, makaawattayo iti naindaklan a talna manipud kadagiti balikas ti anghel iti dayta umuna nga agsapa ti Paskua ti Panagungar: ‘Awan ditoy: gapu ta nagungaren.’”4
Agbiagto Manen ti Amin a Tao
“Agkatawatayo, agsangittayo, agtrabahotayo, agay-ayamtayo, agayattayo, agbiagtayo. Ket kalpasanna mataytayo. …
“Ket agtalinaedtayo koma a matay no saan a gapu iti maysa a Tao ken ti misionna, ni Jesus ti Nasaret. …
“Iti amin a pusok ken nasneban a kararuak, itag-ayko ti timekko iti pammaneknek kas maysa a naisangsangayan a saksi ket ipakdaarko a sibibiag ti Dios. Ni Jesus ti Anakna, ti Bugbugtong ti Ama iti lasag. Isu ti Mannubbottayo; Isu ti Mangibabaettayo iti Ama. Isu ti natay iti krus tapno subbotennatayo gapu kadagiti basoltayo. Isu ti nagbalin nga umuna a bunga ti Panagungar. Gapu ta natay, amin a tao ket agbiagto manen.”5
Maysa a Bukod a Pammaneknek
“Ipakdaarko ti bukodko a pammaneknek a naparmeken ti ipapatay, nagun-oden ti balligi iti tanem. Agbalin koma a pudno a pannakaammo iti amin dagiti balikas nga inaramidna a sagrado Isu a nangipatungpal kadagitoy. Laglagipenyo dagitoy. Ipategyo dagitoy. Dayawenyo dagitoy. Nagungaren!”6
© 2012 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/11. Pannakaanamongna a maipatarus: 6/11. Pannakaipatarus ti First Presidency Message, April 2012. Ilokano. 10364 864
Panangisuro manipud iti Daytoy a Mensahe
Kalpasan iti panangiburay kadagiti adaw manipud iti mensahe ni Presidente Monson, panunoten ti pammaneknek nga iburayna maipapan iti pudno a kaipapanan ti Paskua ti Panagungar. Mabalinyo a saludsoden kadagiti miembro ti pamilia dagiti sumaganad a saludsod: “Ania ti kaipapananna kadakayo a ti maysa a sibibiag a propeta ket nagpaneknek kadagitoy a kinapudno ita nga agdama? Kasano a mayaplikaryo dagitoy iti biagyo?” Ibilangyo ti pananginayonyo iti pammaneknekyo.