Mensahe iti Visiting Teaching, Abril 2012

Ayaten, Bantayan, ken Papigsaen

Sikakararag nga adalenyo daytoy a material ken, no maitutop, paglilinnawaganyo daytoy kadagiti kakabsat a babbai a sarungkaranyo. Usarenyo dagiti saludsod a mangtulong kadakayo a mangpapigsa kadagiti kakabsatyo a babbai ken mangaramid iti Relief Society nga aktibo a paset iti bukodyo a biag.

Pammati, Pamilia, Tulong

Kas iti Mangisalakan, agserbi dagiti visiting teacher a saggaysa (kitaen iti 3 Nephi 11:15). Ammotayo nga agballigitayo iti panagserbitayo a kas visiting teacher no maisao dagiti kakabsattayo a babbai ti: (1) tultulongannak ti visiting teacherko a dumur-as a naespirituan; (2) ammok a ti visiting teacherko ket ipatpategnak ken ti pamiliak; ken (3) no adda dagiti problemak, ammok nga agtignayto ti visiting teacherko a saanna nga urayen a makiddaw.¹

Kasano a maayat, mabantayan, ken mapapigsatayo kas visiting teacher ti maysa a kabsat a babai? Sumaganad dagiti siam a singasing a masarakan iti kapitulo 7 iti Daughters in My Kingdom: The History and Work of Relief Society tumulong kadagiti visiting sister nga agserbi kadagiti kakabsatda a babbai:

Agkararag iti inaldaw para kenkuana ken ti pamiliana.
Agkalikagum a maaddaan iti pammaregta a mangam-ammo kenkuana ken ti pamiliana.
Kanayon a sumarungkar kenkuana a mangkumusta ken mangliwliwa ken mangpapigsa kenkuana.
Pagtalinaeden ti masansan a pannakikontak babaen ti isasarungkar, itatawag iti telepono, surat, e-mail, text message, ken simple nga aramid ti kinaimbag.
Kumablaaw kenkuana kadagiti miting ti Simbaan.
Mangtulong kenkuana no adda pettat a panagkasapulan, sakit, wenno dadduma pay a madagdagus a panagkasapulanna.
Isuro kenkuana ti ebanghelio manipud kadagiti nasantuan a kasuratan ken dagiti Mensahe iti Visiting Teaching.
Mangparegta kenkuana babaen iti panangipakita iti nasayaat a pagwadan.
Ireport iti lider ti Relief Society maipapan iti panagserbida ken ti naespirituan ken temporal a pagsayaatan ti kabsat a babai.

Manipud kadagiti Nasantuan a Kasuratan

Lucas 10:38–39; 3 Nephi 11:23–26; 27:21

Manipud iti Pakasaritaantayo

“Ti visiting teaching ket nagbalinen a wagas para kadagiti babbai a Santa iti Ud-udina nga Aldaw iti sangalubongan tapno agayat, agtaripato, ken agserbi—tapno ‘agtignay a mayannurot kadagiti pannakipagrikna nga immulan ti Dios iti barukong[tayo]’, kas insuro ni Joseph Smith.”²

Kinuna ti maysa a kabsat a babai a nabalo itay nabiit maipapan kadagiti visiting teacherna: “Dimngegda. Liniwliwadak. Nakipagladingitda kaniak. Ken inarakupdak. … Tinulongan[dak] a makalung-aw iti napalalo a pannakapaay ken panagladingit kadagiti immuna a sumagmamano a bulan ti panagmaymaysak.”³

Ti itutulong maipapan kadagiti aramid a temporal ket maysa pay a wagas ti panagserbi. Iti sapasap a komperensia idi Oktubre 1856, impakaammo ni Presidente Brigham Young a dagiti nagkauna a kameng nga agguyguyod iti karison [handcart pioneer] ket simmadsadda iti nauneg a niebe a 270 –370 a milia (435–595 kilometro) ti kaadayona. Inawaganna dagiti Santo iti Ud-udina nga Aldaw iti Salt Lake City tapno tumulongda kadakuada ken “mangipaay a naan-anay kadakuada kadagiti banag nga aw-awagantayo iti temporal.”⁴

Inrekord ni Lucy Meserve Smith nga inuksob dagiti babbai dagiti napudot nga akin-uneg a paldada ken medias iti mismo a tabernakulo ket impempenda dagitoy kadagiti bagon tapno ipatulod kadagiti malamlammin unay a nagkauna a kameng [pioneer]. Kalpasanna nagurnongda kadagiti ules ken lupot para kadagiti sumangpet a bassit laeng ti aruatenda. Idi makasangpet dagiti bunggoy nga agguyguyod iti karison, “napno kadagiti abasto para kadakuada” ti maysa a pasdek iti ili.⁵

© 2012 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/11. Pannakaanamongna a maipatarus: 6/11. Pannakaipatarus ti Visiting Teaching Message, April 2012. Ilokano. 10364 864

Ania ti Maaramidko?

Kasano a maammuak no ania ti kasapulan dagiti kakabsatko a babbai?
Kasano a maammuanto dagiti kakabsatko a babbai nga ipatpategko unay ida?