Fal’ Yangaren
Raguy Biyay
Papa’ e ma n’anggin dad e bitir ni nge thamiy rok nib tu’uf. Gadad ba tu’uf rok ma yugma n’ag fan e tin kireb ni kad rrin’ed nib moem rogon. Ma rrin’ ni gelngin ni rayog rok ni nge n’anggin dad ngad falfalen’ gaed, ma n’anggin nge tomilang ni ba adag e tin tha’abi mangil ni fan ngodad. Rib tu’uf rog.
Napan ni gub grade six, me yim’ e papa’ rog u karo nike accident. Tabinaew rog nge gag e kari kireb rogon maed. Bay ba loew ni gathiba achig u lane tabinaew rog. Kemus ni papa’ rog e guma pagan’ ngak, ma ir e cha’ ni guma yaen ngak napan ni kug magawon. Mus ni ngug fith e ayuw ma dariy, mug paer u fithik e damomow me paer e amith. Me aram mug tay ni kireb rok Got. Mug taleg i bi’eg e chep nib thothup rog nge meybil. Guma yaen nga galasia ni bachane ni ba adag Nina’ ni ngug waen. Guma gaey rogon ni ngug palog rok e Chitamangig nu Tharmiy.
Me aram mug waen ko camp ko Ppin ni Rugod ni somm’on rog. Gu ba adag ni kug fagar gaed boech e gidii’, machane ku dag ma bi’eg e chep nib thothup rog. Ko bin tomur e nep, ma gamad be mo’olung nag e mich. Mug thamiy ban’en ni daworug thamiy nike n’uw napan: fare Kan Thothup. Mug adag e pi ppin ni kar ranod ngalang ngar yoeged e mich rorad, machane gube paer u but bachane gube leam nag ni dariy rog. Tumgin mug thamiy rog ni ngug waen ngalang. Mug bing langag ni gube leam nag ko mang e nggog. Ere mugoeg ni gub falfalen’ ko camp ko Ppin ni Rugod. Me aram mug pir’eg neg ni gube yoeg ni gumanang ni Yesus Kristus e ke yim’ ni bachag ma Chitamangig nu Tharmiy e gub tu’uf rok ma fare Galasia e ba riyul’.
Kug sug ko ba gapas ni rib falel’. Ke magar e biney e n’en nike buch ni keyog ni nggog ni gumanang ni gura guy e papa’ rog biyay ni bachan e Bayul nge foskoyam’ rok e Tathapeg.