Poraus seni ewe Aewin Presetensi, April 2012
“A Manaueta”
Kapasen Pwaratan emon Soufos
“Ewe kokkon meinisin chon Kraist.” Preseten Thomas S. Monson a kapas, ina pwe Jises seni Nazareth a manaueta seni an mano. “Ennetin ewe Manausefan a awora ngeni aramas meinisin ewe kinamwe mi nap seni ach weweiti” (nengeni Philippi 4:7).1
Non ekkei kapas mi nom fan, Preseten Monson a aporausa an we kapasen pwaratan kinisou ren an ewe Chon Amanau we Manausefan me a apasa pwe pokiten ewe Nau a pworacho ngeni mano, meinisin noun Semach won Nang kewe semirit ra feito ngeni ewe fonufan repwe manau sefan.
Manau mwirin ei Manau
“Ua nuku pwe ese wor emon neich mi tongeni weweiti unusan auchean met Kraist a fori fan itach non Gethsemane, nge ua kinisou iteitan ranin manauei ren An we asoren achasefan fan itach.
“Nesoponon chok, A tongeni kunu seni. Nge Ese fori. A feino fan mettoch meinisin pwe Epwe tongeni amanaua mettoch meinisin. Non an fori ekkei, A ngenikich manau mwirin ei manau won fonufan. A amanaua kich seni an Atam we Turutiw.
“Seni anonnonun nguni, ua ennetin kinisou ngeni I. A aitikich ifa usun sipwe manau. A aitikich ifa usun sipwe mano. A awora ach manau ese much.”2
A asueno ewe Kirochun Mano
“Fan ekkoch, usun non watte riaffou me samau, mano a feito usun chok emon chon nangin umoumoch. Nge napengeni, sia ekieki pwe ina ewe chon u ngeni pwapwan aramas.
“Ewe saramen pwaratan ennet epwe asueno ewe kirochen mano feinfeino chok. ‘Ngang ewe manausefan, o ewe manau,’ ewe Masta a kapas. ‘Ion a nuku ei epwe manau, ina mo ika a mano. Iwe ion mi manau o nuku ei, esap tongeni mano.’
“Ei pwarata mi pochokun—ewer, pwan pwarata mi pin—usun manau mwirin ewe peias a tongeni awora ewe kinamwe minne ewe Chon Amanau a pwon nupwen A ereni Noun kewe chon kuno: ‘Upwe ngeni kemi kinamwe, upwe fang ngeni kemi pwisin ai kinamwe. Ai fang ngeni kemi esap usun an fonufan fang ngeni kemi. Ousap noninen are tipemwaramwar; ousap pwan nuokus.’”3
I Ese Nom
“Ach Chon Amanau a manau sefan. A fis ewe mettoch mi unusen ning, ekinamwe, me apwapwa non uruon fisitan mettoch meinisin—ewe pworachoen mano. Ewe riaffouen me feingauen Gethsemane me Calvary mi awesano. Ewe amanauen aramas mi tufich. Ewe Turutiwen Adam mi pworacho.
“Ewe peias mi po mi pwonueni kapas eisen Job, ‘ika aramas ra mano, met repwe manausefan?’ Ngeni meinisin mi rongorong mongunguei ua pwarata pwe, ika emon mi mano, epwe manau sefan. Sia sinei pun mi wor ewe saramen pwaratan ennet mi nom rech. …
“Pwi me fefinei mi achengicheng, non fansoun ach watten noninen, sia tongeni angei kinamwe seni kapasen ewe chon nang non ena aeuwin nesesoren Easter: ‘I ese nom: pun a manausefanita.’”4
Aramas Meinisin Repwe Manau Sefan
“Sia takir, sia kechiw, sia angang, sia urumot, sia tong, sia manau. Me mwirin sia mano. …
“Iwe sipwe mano fochofoch ika esap punun emon Mwan me An angang, itan Jises seni Nazareth. …
“Ren unusen netipei me ennetin nguni, ua neumong ne kapasen pwarata pwe emon chon pwarata me ua apasa pwe Kot mi manau. Jises i Noun we At, ewe Anamon Chok noun ewe Sam non pekin futuk. I ach Chon Amanau; I ach Chon Aninis ren ewe Sam. I ewe emon a mano won ewe irapenges ne achasefanni ach kewe tipis. A winiti ewe akkaewin ne angei niwinin ewe Manausefanita. Pokiten A mano, aramas meinisin repwe manau sefan.”5
Eu Pwisin Pwarata
“Ua apasata ai pwisin pwarata pwe mano a kuf, pworacho ngeni ewe peias a winnino. Amo ita ekkewe kapas mi pin seni I ewe a apwonuetar epwe winiti an aramas meinisin mirit. Oupwe chechemenir. Oupwe tongeir. Oupwe sufonitir. A manaueta.”6
© 2012 seni Intellectual Reserve, Inc. Meinisin pung mi kawor. A for non Merika. Kapungunon non fosun Merika: 6/11. Kapungunon chiakun: 6/11. Chiakun ewe First Presidency Message, April 2012. Chuukese. 10364 901
Afanafan seni Ei Poraus
Mwirin ka aporausa ekkoch kapas seni an Preseten Monson we poraus, kopwe nengeni an we kapasen pwarata usun ennetin wewen Easter. Ka tongeni eisini chon famini ekkei kapas eis: “Met wewen ngonuk pwe emon soufos mi manau a kapasen pwarata usun ekkei ennet ikenai? Ifa usun ka tongeni anganga ir me non manauom?” Kopwe ekiekin pacheta om we kapasen pwarata.