Pweng sin Prestuhnsi Se Met, Eprel 2012
“El Moulyak”
Sie Fahkwack Luhlahlfongi luhn Mwet Pahluh
“Puhsrwen pahng lal Christendom,” Prestuhn Thomas S. Monson el fahkwack, lah Jisus luhn acn Nazareth el moulyak liki misac. “Ac ma pwacye ke Moulyak sac sang nuh sin sie ac mwet nuh kwewa mihslac ma yohk likina ma kuh in kahlwem uh” (liye Philippi 4:7).1
Ke ma itucklac ke ma ten inge, Prestuhn Monson el akacsruhi ke fahkwack luhlahlfongi lal kac ac tarilacna ke Moulyak luhn Mwet Lahngo uh ac fahkwack lah ke srihpen Wen el kuhtanglah misac, tuhlihk nuh kwewa nuhtin Pahpah suc ma tuhkuh nuh facluh fah sifil moul.
Moul tukun Moul fin Facluh
“Nga luhlahlfongi lah wacngihn sie sesr kuh in sramtweack orwaclah fohn se ke ma Kraist el oruh nuh sesr fin acn Gethsemane ah, tuhsruhk nga tarilacna lwen nuh kwewa ke moul luhk ke kihsackuhnlah luhn iwaclah Lal kacsr uh.
“Ke pacl sahflah sac, El kuh in forlah. Tuhsruhktuh El tiac. El ahluhkwelah ye ma nuh kwewa Elan muh kuh in molwelah ma nuh kwewa. Ke oruh ma ingacn, El acse nuh sesr moul tukun moul in ikoac se inge. El sifil eis kuht ke Puhtatlac se lal Adam ah.
“Ke loaliyacn nguhnihk nohfohn, nga tarilacna Sel. El luti kuht ohiyacn moul. El luti kuht ohiyacn misac. El karihngihn molwelah lasr.”2
Kuhnahoslah Lohsr luhn Misac
“Ke kain ohiyac uh, oacna ke kweok ac mas upac uh, misac uh tuhkuh oacna sie lihpufacn luhn pahkomuhta. Tuhsruhk nuh ke ip yohk se emet an, kuht nuhnkuh kac oacna sie mwe lokoalok ke engan luhn mwet uh.
“Lohsr ke misac uh kuh in kuhnausyucklac ke kahlwem luhn ma pwacye fwackyak uh. ‘Nga pa moulyak, ac moul,’ Mwet Kol Fuhlwact el fahk. ‘El suc luhlahlfongiyuc, finne el misac, el fah srwackna moul: Ac el suc moul ac luhlahlfongi in nga fah tiacna misac.’
“Mwe ahkpwacye se inge—ahok, finne ahkkweyeyucklac muhtahl—ke moul ye kuclyuck uh kuh in sang wo mihs ma uliyuckme sin Mwet Lahngo ke El ahkkweye nuh sin mwet tuhma lutlut Lal ah: ‘Nga fihliyac mihs yuruwos, mihs luhk nga usot nuh suwos: tiac oacna ke facluh usot, tuh ke nga usot nuh suwos uh. Tiac lwelah insiyowos in elyah, kuh tiac lwelah in sahngweng.’”3
El Wacngihn Inge
“Mwet Lahngo lasr el sifil moul. Sie ma wolacna, fokoko, ac sifil ahkkweye emet ke ma mahtuh luhn mwet uh oreklac—kuhtanglah liki misac. Ngal ac kweok fin acn Gethsemane ac Calvary iyucklac. Molwelah luhn mwet uh ahkohnkohnuh wo. Puhtatlac lal Adam fohlohkihnyuckme.
“Kuclyuck oalal se ke lututacng in Istuh sac pa top nuh ke kihsen siyuck lal Job ah, ‘Fin sie mwet misac, yac el fah sifil moul?’ Nuh sin mwet nuh kwewa ma kuh in lohng puhsrwek, nga fahkwack, Fin sie mwet misac, el fah sifil moul. Kuht etuh, tuh kuht fah eis kahlwem ke ma pwacye fwackyak uh. …
“Tamuhlwel ac tahmtahel sacohk wiyuck, ke ao in ahsor loal lasr, kuht kuh in eis mihs yohk ke kahs luhn lihpufacn ke lututacng in Istuh sac: ‘El wacngihn inge: tuh el moulyak.’”4
Mwet Nuh Kwewa Fah Sifil Moul
“Kuht isrwacsr, kuht tuhng, kuht orekma, kuht sritacl, kuht luhngse, kuht moul. Na kuht ac misac. …
“Na kuht fah misac na tuhsruhk ke sie Mwet ac misin Lal, finne Jisus luhn Nazareth. …
“Ke insiyuck nohfohn ac luhpan puhla luhn nguhnihk, nga sruhkwack puhsrwek ke fahkwack luhlahlfongi oacna sie mwe lohoh ac fahkwack lah God el moul. Jisus Wen Nahtuhl, Kuloh Sefanna nuhtin Pahpah ke ikoac. El Mwet in Molwelah lasr; El pa Mwet in Nuhnuhnkuh se yurin Pahpah. El pa misac fin sahksin soko in iwaclah ma koluk lasr ah. El pa fahko se emet ke Moulyak se. Ke srihpen El misac ah, mwet nuh kwewa fah sifil moul.”5
Mwe Lohoh Se La Sifacna
“Nga fahkwack mwe lohoh luhk sifacna lah misac kuhtangyucklac, kuhtanglah kuclyuck uh oreklac. Lwelah kahs uh in ahkmuhtahlyeyuck sin El suc ahkfalyelah in eklac mwe etweyuck pwacye nuh sin mwet nuh kwewa. Esamuhlos. Luhngse elos. Ahkfuhlwactyaclos. El moulyak.”6
© 2012 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/11. Ahkkweyeyucklac ke lweng: 6/11. Lwenglah luhn First Presidency Message, April 2012. Kosraean. 10364 868
Luti ke Pweng Se Inge
Tukun akacsruhi ke pohloh kahs ke pweng sel Prestuhn Monson an, liye fahkwack luhlahlfongi ma el oruh ke kalmac pwacye luhn Istuh uh. Kowos kuh in siyuck sin mwet ke sucu an kihsen siyuck ten inge: “Meac kalmeyac nuh suwos ke sie mwet pahluh moul el fahkwack ke ma pwacye mihsenge uh? Kowos kuh in kapsra ma ingacn fuhkah nuh ke moul lowos an?” Nuhnkuh in oruh fahkwack luhlahlfongi lowos an.