Fas Presidensi Mesej, Jun 2012
God I Singaotem Hem mo Ol Pipol Oli Sastenem Hem
Olsem ol memba blong Jos, oli invaetem yumi oltaem blong sastenem ol pipol long ol koling blong yumi mekem wok. Sam yia i pas, wan studen blong 18 yia i bin soem long mi wanem i minim blong sastenem ol wokman blong Lod. Mi stil kasem blesing tru long simpol eksampol blong hem we hem i soem wetem tingting we i stap daon.
Hem i jes statem fas yia blong hem long kolej. Hem i bin baptaes, mo i no kasem wan yia yet, be hem i lego haos blong statem ol stadi blong hem long wan bigfala yunivesiti. Long yunivesiti ia, mi bin stap olsem bisop blong hem.
Taem skul yia i stat, mi bin gat wan smol intaviu wetem hem long ofis blong bisop. Mi tingbaot smol nomo long fas konvesesen blong mitufala we hem i stap tokbaot ol jalenj blong hem long wan niu ples, be bae mi neva fogetem nambatu konvesesen blong mitufala.
Hem i bin askem blong luk mi long ofis blong mi. Mi bin sapraes taem hem i talem, “Yumitu save prea tugeta, mo bae i oraet sapos mi prea?” Mi stap rere blong talem se mi bin prea finis mo mi ting se hem tu i bin prea. Be mi bin agri.
Hem i statem prea blong hem wetem wan testemoni se hem i save se God i singaotem bisop. Hem i askem God blong talem long mi wanem hem i mas mekem abaot wan samting we bae i save jenisim laef blong hem long saed blong spirit. Yangfala man ia i bin talem long God se hem i sua se bisop i save finis ol nid blong hem mo bae hem i givim kaonsel we hem i nidim blong harem.
Taem hem i stap toktok, ol stret denja we bae hem i fesem i kam long maen blong mi. Kaonsel ia i bin simpol be i bin klia gud: prea oltaem, obei olgeta komanmen, mo no mas fraet.
Yangfala man ia, we i stap wan yia nomo long Jos, i bin tij tru long eksampol blong hem abaot wanem God i save mekem wetem wan lida taem oli sastenem hem tru long fet mo prea blong olgeta we God i singaotem hem blong lidim. Yangfala man ia i soem long mi paoa blong ful sapot insaed long Jos (Luk long D&C 26:2). Nomata we Lod i singaotem ol wokman blong Hem tru long revelesen, oli save wok nomo afta we ol pipol we bae oli wok from olgeta, oli sastenem olgeta.
Tru long sastening vot blong yumi, yumi mekem ol tabu promes. Yumi promes blong prea from ol wokman blong Lod mo se bae Hem i lidim mo mekem olgeta oli kam strong (luk long D&C 93:51). Yumi promes se bae yumi lukaotem moa insperesen mo yumi luk fored blong filim insperesen we bae i kam long God insaed long olgeta kaonsel blong olgeta, mo long evri taem we oli stap wok insaed long ol koling blong olgeta (luk long D&C 1:38).
Promes ia, bae yumi nidim blong mekem i kam niu bakegen insaed long hat blong yumi oltaem. Sandei skul tija blong yu bae i traem blong tij wetem Spirit, be semmak olsem we yu save mekem, tija blong yu i save mekem ol mistek long fored blong klas.Be yu, yu save disaed blong lisin mo lukaotem ol smol taem, taem yu save filim insperesen we i stap kam. Wetem taem, bae yu luksave sam mistek nomo, be bae yu luk moa pruf se God i stap sastenem tija ia.
Taem yumi leftemap wan han blong sastenem wan man, yumi komitim yumi blong wok blong eni stamba tingting blong Lod we Hem i singaotem man ia blong mekem. Taem ol pikinini blong mitufala oli bin smol, oli bin singaotem waef blong mi blong tijim ol smol pikinini long wod blong mifala. Mi no bin leftemap han blong mi nomo blong sastenem hem, be mi bin prea from hem tu, mo afta, askem raet blong helpem hem. Ol lesen we mi bin kasem blong luksave wanem ol woman oli stap mekem mo blong luksave lav we Lod i gat long ol pikinini blong Hem, i stil blesem famle blong mi mo laef blong mi.
Mi bin toktok, i no longtaem i pas, wetem yang man ia we i bin sastenem bisop blong hem sam yia i pas. Mi bin lanem se Lod mo ol pipol oli bin sastenem hem long koling blong hem olsem wan misinari, olsem wan stek presiden, mo olsem wan papa. Taem storian blong mitufala i stap go blong finis, hem i talem: “Mi stap prea yet from yu evri dei.”
Yumi save disaed blong prea evri dei from wan man we God i singaotem hem blong wok from yumi. Yumi save talem tangkyu long wan we i bin blesem yumi wetem lav mo seves blong hem. Yumi save disaed blong putum wan step fored taem wan we yumi bin sastenem i askem blong yumi givhan fri nomo.1
Olgeta we oli sapotem ol wokman blong Lod insaed long Kindomblong Hem bae oli kasem sapot tru long bigfala paoa blong Hem.
© 2012 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/11. Oli letem translesen: 6/11. Translesen blong First Presidency Message, June 2012. Bislama. 10366 852
Yusum Mesej Ia blong Tij
Afta we yu serem mesej ia, tingting blong ridim kwot ia: “Lod bae i mekem yu wan tul long han blong Hem sapos yu stap putum tingting blong yu i stap daon, sapos yu stap fetful, mo yu stap wok strong wetem strong tingting… Bae yu kasem moa paoa taem kongregesen i sastenem yu mo setem yu apat” (Teaching, No Greater Call [1999], 20). Gat evri famle i kam tugeta raon long wan samting we i hevi mo askem wan man blong traem blong leftemap. Ademap wan man long taem, invaetem ol narafala memba blong famle blong help blong leftemap samting ia. Toktok raon long wanem bae i happen sapos evriwan i help. Tingting blong tokbaot bigwan kaonsel blong Presiden Aering abaot ol gudfala wei blong sastenem ol narafalawan long ol koling blong olgeta.