Klumech er a First Presidency, Ongelolem el buil 2012
Mokedong er a Dios e Modubech er a Rechad
Sel de chad er a Ikelesia, e te blechoel el mengemedaol er kid el mo oldubech er a rechad el ngar er a okedong el mo mesiou. Sesei el rak er a mla memong e a teruich me a eai a rekil el ngalek er a skuul a ulechotii er ngak el kmo ngera belkul sel bo doldubech er a remesiungel a Rubak. Ak dirk oba klengeltengat lokiu sel mle ungil okesiul.
Ng kmal dirk mlo omuchel er a kot el rak er ngii er a daingak. Ng miltecholb er a kedeb er a ta el rak er a uchei er a letobed er a delengcheklel el mo omuchel er a omesubel er a daingak. Ng mla er sei e ak mle mesiou el bisop er ngii.
Tia el bocha lomuchel a skuul, e ak milengedecheduch er ngii el telkib el taem er a obis er a bisop. Ng diak sal dobedebek a cheldechedechemam eng di ng millekoi el kirel a ringelel a klengar er a beches el basio, eng di ng kmal diak kubes er sel ongingil tial cheldechedemam.
Ng ulengit mel be lesekak er a obis er ngak. Ak kmal mle rrau a renguk er a le du, “Ng sebeched el tmak el meluluuch, e kulengit me le ngak a meluluuch?” Ak di mle kmeed e ak kmu ak mla meluluuch e mengerechir er ngii el mla meluluuch. Eng di ak kilengei.
Ng ulemuchel er a nglunguchel el olecholt er a klaumerang el kmo ng medengei el kmo a bisop a mlokedong er a Dios. Ng ullengit er a Dios mel sbedak el kmo ng ngerang mo rulii el kirel a tekoi er a reng el chelbangel er ngii. Ng ka el kekerel chad a millekoi er a Dios el kmo ng kmal medengei el kmo a bisop a mla mo medengelii a lousbech er ngii meng mo msang a omellach el ngii a kirel rongesii.
Me se er a longedecheduch, ea bebil er a kengaol el omeruul el ngii a mo obangel a mlei er a uldesuek. Tia el omellach a kmal mle beot eng di ng ulechotii el ngar sel kmal betengel: blechoel el meluluuch, moltirakl a llach, e diak ko medakt.
Ng ka el kekere el chad, el ta el rak er a Ikelesia, a ulsisechakl lokiu okesiu el kmo a Dios ngerang sebechel rulii el obengkel oungerachel sel modubech el oba klaumerang me a nglunguchir tirkel ngii a mlokedong el mo oungerachel er tir. Ng ka el kekerel chad a ulechotii el me er ngak a klisichel a llach er a melai er a kengei er a chelsel a Ikelesia (mesa D&C 26:2). Meng uaisei el Rubak a omekedong er a remesiungel lokiu ocholt, e tir a mochu sebecherir el oureor er a uriul er a lemengai a kengei er tirkel tir a bo losiou er tir.
Me ngokiu a kengei er kid er a sengkio, e kede ngmai a yaksok. Ke de mo yaksok el mo meluluuch el kirir a remesiungel a Rubak e Ngii a mo omekrael e melisiich er tir (mesa D&C 93:51). Kede kongei el kmo ke de mo omes e mengerechir el mo melchesuar a ulekrael el tekoi el ngar er a Dios lokiu osisecheklir me a ngii di el ngerang el tir a meruul el ngar tia el okedong el mlo er tir (mesa D&C 1:38).
Tia el yaksok a kired el blechoel lomekbeches er ngii er a chelsel a rengud. A sensei er kau er a Sandei Skuul a mo melasem el olsisechakl loba Chedaol Reng, el kmal di uai kau, el sensei er kau a sebechel mo mecheuid a le ngara mederir a klass. E ng di, kau, a sebechem el melilt el mo orrenges e omes aikel taem el kau a mo sebechem el melchesuar aikel merael mei el ulekrael el tekoi. Chelsel a taem e ke mo diak kom sal mes a cheleuid e mo mes a betok el omeruul el ochotii el kmo a Dios a oldubech er ng ka el sensei.
Me chelechal dodersii chimad el mo er bab el mo oldubech er ngika el chad, e ke de kongei el mo oureor el kirel a ngii di el ngerang el moktek er a Rubak ng ka el chad a mlokedong el mo mengedmokl. Se er a le mekekerei a rengelekam, e a bechik a mlo kedong el mo olsisechakl er a remekekerei el ngalek er a ward er kemam. Ng dimlak di kuldersii a chimak el mo oldubech er ngii, ak dirrek el mlo meluluuch el kirel e olengit me bol sebechek el ngoseuir. A suobel el ngak a ngiluu er a omereng el saul el kirel aikel sebecherir a redil el remuul me a beltik el reng er a Rubak el mo er a rengelekel a dirk omekngeltengat er a telungalek er ngak me a klengar er ngak.
Ak mal dirk milengedecheduch er ng ka el kekerel chad el mle oldubech er a bisop er ngii er a kmal ngar er a mong. Ak mlo medengei el kmo a Rubak me a rechad a mle kongei loldubech er ngii er a mo misionari er ngii, el meredel er a stake, e dirrek el chedam. Ng millekoi er a ki bocha merek el chadecheduch, “Ak mo meluluuch el kirem er a bek el sils.”
Ng sebeched el mo blak a rengud el mo meluluuch er a bek el sils el kirel a chad el mlokedong er a Dios el mo mesiou er kid. Ng sebeched el mereng a sulel a chad el ngii a mla meskid a klengeltengat lokiu omesiou. Ng sebeched el melilt el mo olngeseu er a chad el ngii a doldubech er ngii el olengit a ngeseu.1
Tirkel tir a olengeseu er a remesiungel a Rubak er a Rengedel a mo modubech lokiu a klisichel. Ke de rokui el ousbech er tia el klengeltengat.
© 2012 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/11. Kengei er a oidel: 6/11. Oidel a First Presidency Message, June 2012. Palauan. 10366 881
Osischeklel Tial Klumech
A uriul er a omouchais er tia el klumech, e bo monguiu a ikal beldukl el cheldecheduch: “A Rubak a mo rullau el mo dongu er a Chimal alsekum koba ngariou el reng, me a blak el reng. … E kau a mo nguu a klisiich sel blal kengei el oldubech er kau a rechedal a ikelesia e bocha moterkokl er a ngerchelem” (Teaching, No Greater Call [1999], 20). Momekedong er tirkal ongalek el mo iliuekl er a oberaod el klalo e molengit er a ta er tir el mo mengider er ngii. E bom dechelii er a ta er a chad er a ta el taem, e momekedong er a rebebil er tirkal ongalek me bo lolengeseu el mengider er tia el oberaod el klalo. Bo mosaod el kmo ng mlo ua ngera se er a lolengeseu a rokui el chad. Momdasu el melisiich aikel osisecheklel a President Eyring el kirel a meral rael el sebeched el mo oldubech er a kuk rebebil er a okedong el mo er tir.