Mulwol ko Bin Somm’on e Presidency, June 2012
Got e ke pong ma Gidii’ e ke Tay u Loen
Gadad ni memba ko galasia, ma baga’ ni yima pining dad ni ngad tayed e gidii’ u loen ko pong rorad ni ngar murwel gaed. Bukun e duw kafram ma ba bitir nib ragag nge meruk e duw rok e dag ngog ko mang e be yup fan ni ngan tay e tapigpig rok Somoel u loey. Kab fal’ wa’athag ko kanawo’ rok nib yul’yul’.
Kafin ni tabab nag e bin somm’on e duw u college. Kan tawfe nag ni boech e duw nga tomur um’on nike chuw u tabinaew ni nge tabab nag e sikul rok ko ba university nib ga’. Urom mug murwel ni gag e bisof rok.
Napan ni tabab e sikul biyay, mug interview nag u lane ofis ko bisof. Ku gu manang boch’uw ko bin somm’on e sabathin kemus nibe weliy mornga’agen e pi magawon rok ko gin nib bi’ech ngak, machane ri dabug pagtilin e bin migid e sabathin romow.
Ke yoeg ni nge guyeg u lane ofis rog. Mug gin’ ngay napan ni ga’ar, “Rayog ni ngad meybil gow u ta’abang, ma rayog ni ngug fek e meybil?” Baen ni ngug goeg ni kug mu’ ko meybil ma gube lemnag ni ki mu’. Machane mug goeg ni rayog.
Ke tabab nag e meybil rok ko mich ni manang ni Got e ke pining e bisof. Me fith Got ni nge yoeg ngog e tin ni nge rrin’ ko pi magawon rok. Fare pagael ke yoeg ngak Got ni manang ni manang fare bisof e tin nib tu’uf rok ma ra pi’ e ayuw nib tu’uf ni nge rung’ag.
Napan ke non, e pi magawon ni ra aw nga fithik e yib nga lanin’ug. Fare ayuw e rib moem machane kan pi’ u fithik e tin man gil: meybil ni gubin ngiyal’, fol ko pi motochiyel, ma dam rus.
Re mo’on nem, e yaen ta’areb e duw u lane Galasia, e ke fil u fithik e kanawo’ e n’en ni rayog ni nge rrin’ Got ko toygang’ napan ni kan tay u loen u fithik e mich nge meybil ko picha’en ni kar pininged ni nge gagyeg. Re mo’on nem nib fel’ yangren e ke dag ni fan ngog gelngin fare motochiyel tawa’ath u lane Galasia (muguy ko D&C 26:2). Mus ni ra pining Somoel e pi tapigpig Rok u dakean e yi’iy, ma rayog ni ngar cheg gaed ni kemus ni napan ni picha’aen ni yaed e kar pininged ni nge muruwel.
Gadad ra vote ni kad ted u loen, ma dabid thilyeged. Kad yoeged ni ngad meybil gad ni fan e pi tapigpig rok Somoel me gagyeg me gel nag raed (muguy ko D&C 93:51). Kad yoeged ni gadad ra sap nag ma gadad be athapeg ni ngad thamiyed e thogthog rok Got ko ayuw rorad nge napan ni yaed be mithmith ko muruwel rorad (muguy ko D&C 1:38).
Re micheg nem e ba tu’uf ni ngad sul u dakean u lan gumircha’dad ni gubin ngiyal’. Sensey rom ko Sunday School e ra gay rogon ni nge sensey u fithik fare Kan Thothup, machane rogon karam rrin’, ma sensey rom e ra i ngongliy e oloboch u m’on ko clas. Machane, gur, e rayog ni ngam motoyil mag sap ko pi n’en nibe buch napan ni rayog ni ngam thamiy e thogthog nike yib. Ngiyal’ ma gara poey ni boch’uw e oloboech ma n’en nibe buch ni Got e be tay fare sensey u loen.
Napan ni gadad ra tingiy pa’ dad ngalang ni ngad ted bee’ u loen, ma kad yoeged ni gadad ra murwel ko re muruwel ku Somoel ni kan pining facha’ ni nge rrin’. Napan nib achig e bitir romow, ppin rog e kan pining ni nge sensey nag e bitir nib achig u lane ward romad. Gathi kemus ni kug tingiy pa’ag ngalang ni ngug tay u loen, machane kugu meybil ni fan ngak mug fith ni ngug ayuweg. Pi n’en ni yibe fil e ma yib ngog u fithik e falfalen’ ko n’en nike rrin’ e ppin nge tu’ufeg rok Somoel ngak e bitir e kuma fal’eg wa’athan e tawbinaew rog nge yafas rog.
Kug non’ow ni fin’ ney fare mo’on nib fel’ yangren nike tay e bisof rok u loen. Ku fil ni Somoel nge gidii’ e rayog ni nge tay u loen ko murwel rok nib tamachib, ma ba stake president, ma kuba papa’. Ke yog napan ni kug mu’ gow ko numon, “Kugma meybil ni fam ni gubin ngiyal’.”
Rayog ni ngad meybil gaed ni fan ngak bee’ ni Got e ke pining ni nge ayuweg dad. Rayog ni ngad pininged e magar ngak bee’ ni nike fal’eg wa’athan dad ko murwel rok. Rayog ni ngad pi’yed e ayuw napan ni kan tay bee’ u loen nibe ning e ayuw.1
Picha’an nima pi’ e ayuw ngak e tapigpig rok Somoel u lane gililungun e ran tay u loen ko Gelngin. Gadad gubin ma ba tu’uf e binem e tawa’ath ngodad.
© 2012 ko Intellectual Reserve, Inc. Gubin ni mat’won ma bay. Nni yoloey u Mariken. Kan micheg nag ko thin nu Ngalis: 6/11. Micheg nag i pilyeg : 6/11. Ni pilyeg ko First Presidency Message, June 2012. Yapese. 10366 905
Rogon ni ngan Fil ko Biney e Mulwol
Napan ni kan mu’ i weliy e biney e mulwol, mag bi’eg e bin ba’aray e buguthin: “Somoel e ra n’angginem ni ngam mang e tapigpig u lane Pa’ fa’anra gab sobutaen’, yul’yul’, ma gama murwel nib alamrin. … Ra yib gelngin napan ni kan tayem e gidii’ u lane fare mo’olung u loen ma an meybil ni fam” (Teaching, No Greater Call [1999], 20). Tabinaew ni nge mukun nikan liyeg ban’en ni rib tomal mag fith ngak bee’ ni nge gay rogon ni nge chubiy. Yaen e tata bee’ nibe ayuw, mag pining boech gothon fare tabinaew ni ngan chubiy fare n’en. Mu puruy niged e n’en nike buch napan nibe ayuw gubin e gidii’. Moeg e n’en nike yoeg President Eyring mornga’agen e pi kanawo’ ni rayog ni ngad tayed boech e gidii’ u loen rad ko muruwel rorad.