2012
Forfor Luti, Kunohkohn Muhtahl se
Jun 2012

Pweng ke Forfor Luti, Jun 2012

Forfor Luti—Kunohkohn Muhtahl se

Pruhe in lutlutkihn kuhfa inge, ac ke pacl fal, sramsramkihn yurin tahmtahel ma kowos muhtwacta nuh yohroh an. Orekmakihn kihsen siyuck an in kahsrwekowos ahkkweye tahmtahel wiyowos an ac in oruh Rilif Sosaiti in ip utuftuf se ke moul lowos sifacna an.

Akucl luhn Rilif Sosaiti

Luhlahlfongi, Sucu, Kahsruh

Mwet forfor luti an, oasr misin nguhnnguhn yohk srihpac se lasr in ahkfalye. “Pisap se, suc akmuhsraiyucklac in pa mwet karihngihn sip ke ward se, koflah na karihngihn nohfohn sip nuhtin Leum ke pacl sefanna. El epahl nuh sin mwet forfor luti mokleyuck uh in kahsrwel.”1 Suk kuh eis fwackyuck sin suc srihsrngiyucki in karihngihn kais sie tahmtahel pa yohk srihpac uh.

Mokleyuck uh muhtwacwacack ke mwet luhn prestuhnsi ke Rilif Sosaiti uh pruhe in sramsramkihn enenuh luhn kais sie mwet kuh sucu an. Na, ke ahkkweyeyucklac luhn pisap, prestuhnsi ke Rilif Sosaiti an fah sang kunohkohn ke inkacnek se ma kahsruh tahmtahel an in elangwack kac lah forfor luti uh pa kunohkohn nguhnnguhn yohk srihpac se.2

Mwet forfor luti uh etwaclah ac luhngse kais sie tahmtahel ke inse pwacye, kahsrwel ahkkweye luhlahlfongi lal, ac sang kahsruh ke pacl enenuh. Elos suk mokleyuck in etuh ohiyacn srokackihn nuh ke moul in nguhn ac ikoac luhn tahmtahel elos fahsri an.3

“Forfor luti uh orwaclah orekma luhn Leum ke finsrak uh ma nuh sin mwet uh liki na pihsen mwet uh. Ke ma pwacye uh, forfor luti uh wacngihn sahflahiyac. Pa inkacnek in moul se liki na orekma se.”4

Ke Ma Suhmuhslah uh

Mattu 22:36–40; Jon 13:34–35; Alma 37:6–7

Ke Sramsram Mahtuh Lasr

Eliza R. Snow, prestuhn luhlahp se ahkluo ke Rilif Sosaiti el luti, “Nga fihliyac sihk muh ohfohs luhn mwet luti se ohfohs na fuhlwact ac muhtahl se.” El sang kahs in kahsruh nuh sin mwet forfor luti “in sesseslah ke Nguhn luhn God, ke lahlmwetmwet, ke puhsisacl, ke luhngse” met liki elos muhtwacta ke lohm an elos in muh kuh in puhla na pwacye ac sun enenuh luhn moul in nguhn ac oacyacpac moul in ikoac an. El fahk, “Kowos fah puhla in fahk kahs in mihslac ac ahkmuhlahlah, ac kowos fin konwacack sie tahmtahel in puhla mihsrihsr, usaclwacng nuh insiowos oacna ke kowos oruh nuh sin sie tuhlihk nuh ke monuwos ac ahkfucsrfucsryaclwack.”5

Ke kuht ahkwot nuh met ke luhlahlfongi oacna ke Rilif Sosaiti emet ah oruh ah, Nguhn Muhtahl fah oasr yohrohsr ac fah mokle kuht in etuh ohiyacn kahsruh nuh sin tahmtahel kuht fahsri an. “Lwelah [kuht] in suk ke lahlmwetmwet liki na kuh,” Tahmtahel Snow el fahk, “ac [kuht] fah eis kuh nuh kwewa [kuht] fah eis lahlmwetmwet in orekmakihn.”6

© 2012 sin Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/11. Ahkkweyeyucklac ke lweng: 6/11. Lwenglah luhn Visiting Teaching Message, June 2012. Kosraean. 10366 868

Mwe kahsruh

  1. Julie B. Beck, “Relief Society: A Sacred Work,” Liahona, November 2009, 114.

  2. Liye Handbook 2: Administering the Church (2010), 9.5; 9.5.2.

  3. Liye Handbook 2, 9.5.1.

  4. Julie B. Beck, Liahona, November 2009, 114.

  5. Eliza R. Snow, lun Daughters in My Kingdom: The History and Work of Relief Society (2011), 108.

  6. Eliza R. Snow, lun Daughters in My Kingdom, 45–46.