Yut

Long Medel blong Taem we Yu Stap Rere long Wan Misin

Presiden Ukdof i bin talem long ol misineri blong oli tingting long olgetawan olsem se oli stap long medel blong misin blong olgeta. Yu save yusum tingting ia long taem we yu stap rere blong go long misin: nomata yu gat 12 o 18 yia, yu save rere blong go long wan misin.

Wanem nao sam samting yu save mekem “long medel” blong taem yu stap rere blong go long misin?

Oltaem stap klin inaf blong go long tempol.
Lanem blong luksave ol toktok blong Tabu Spirit taem yu raetem daon ol toktok ia we yu kasem mo yu tekem aksen folem olgeta.
Prea from ol misinari.
Askem ol misinari long eria blong yu long wanem kaonsel nao bae oli givim long yu blong mekem yu rere blong go long wan misin.
Lanem blong yusum moa gud taem blong yu, mo tu, ol impoten aktiviti olsem seves, skripja stadi mo blong raet long jenol.
Taem yu stap toktok wetem wan memba blong famle, serem wan skripja we yu jes ridim we i tajem yu. Eksplenem wanem nao tingting blong yu abaot skripja ia.
Askem ol fren blong yu abaot ol rilijin blong olgeta mo wanem nao oli biliv long hem. Yu mas rere blong serem ol bilif blong yu. Invaetem olgeta blong kam long jos mo ol aktiviti.

Taem yu luksave se yu stap long medel blong rere blong go long misin blong yu, bae yu save laef long wan laef blong stap klin inaf moa, blong Lod i trastem yu mo blong Spirit i stap olsem kompanion blong yu.