2012
Stap Soemaot Fasin blong Yumi blong Stap Olsem Disaepol Tru long Lav mo Seves
Julae 2012

Visiting Tijing Mesej, Julae 2012

Stap Soemaot Fasin blong Yumi blong Stap Olsem Disaepol Tru long Lav mo Seves

Wetem prea, stadi long toktok ia, mo olsem we i stret, toktok raon long hem wetem ol sista we yu stap visitim. Yusum ol kwestin blong helpem yu blong mekem ol sista blong yu oli kam strong moa mo blong mekem Rilif Sosaeti i kam wan aktiv pat long laef blong yu.

Fet, Famle, Help

Truaot long laef blong Hem long wol ia, Jisas Kraes i bin soem lav blong Hem long ol narawan taem Hem i stap givhan long olgeta. Hem i talem: “Nao from we yufala i stap lavlavem yufala, bambae olgeta man oli luksave se yufala i man blong mi” (Jon 13:35). Hem i soem eksampol mo Hem i wantem yumi blong “helpem olgeta we oli nidim help [blong yumi]” (Mosaea 4:16). Hem i singaotem ol disaepol blong Hem blong wok wetem Hem long ministri blong Hem mo givim long olgeta janis blong wok blong ol narawan mo blong kam moa olsem Hem.1

Wok blong yumi olsem ol visiting tija, i semmak olsem ministri blong Sevya blong yumi taem yumi soem lav blong yumi long olgeta we yumi stap visitim mo tijim. Yumi soem lav taem yumi:2

  • Tingbaot ol nem blong olgeta mo nem blong ol memba insaed long famle blong olgeta mo blong savsave gud olgeta.

  • Lavem olgeta mo no jajem olgeta.

  • Lukaotgud olgeta mo mekem fet blong olgeta i kam strong “wan afta narafala wan,” olsem we Sevya i bin mekem (3 Nifae 11:15)

  • Developem tru frensip wetem olgeta mo visitim olgeta insaed long ol hom blong olgeta mo ol narafala ples.

  • Kea long wanwan sista.Tingbaot ol deit we oli bon long hem, ol graduesen, ol mared, ol baptaes o ol narafala taem we i impoten long sista ia.

  • Go aot mo helpem ol niu memba mo lesaktiv memba.

  • Go aot mo helpem olgeta we oli stap olgetawan, o olgeta we oli nidim kamfot.

I Kamaot long Ol Skripja

3 Nifae 11; Moronae 6:4; Doctrine and Covenants 20:47

I Kamaot long Histri blong Yumi

“Long Niu Testeman i gat tu stori blong ol woman, olgeta we oli gat nem mo nogat nem we oli bin praktisim fet blong olgeta long Jisas kraes. … Ol woman ia oli kam ol eksampol blong fasin blong stap olsem ol disaepol … [oli] bin wokbaot wetem Jisas mo olgeta Twelef Aposol blong Hem. Oli bin givim ol samting we oli bin gat blong helpem ministri blong Hem. Afta long ded mo laef bageken blong Hem, [oli] bin gohed blong stap olsem ol fetful disaepol.”3

Pol i bin raet abaot wan woman we nem blong hem Fibi, we hem i “stap givhan long wok blong jos” (Rom 16:1). Hem i bin askem ol pipol blong “givhan long hem: from we hem i givhan gud long plante man” (Rom 16:2). “Semfala kaen seves we Fibi mo ol narafala impoten woman long Niu Testeman i bin mekem blong givhan i stap gohed tedei wetem ol memba blong Rilif Sosaeti—ol lida, visiting tija, ol mama, mo ol narawan—we oli stap olsem ol woman blong givhan, o blong stap helpem plante man.”4

© 2012 i kam long Intellectual Reserve, Inc. Oli letem long Inglis: 6/11. Oli letem translesen: 6/11. Translesen blong Visiting Teaching Message, July 2012. Bislama. 10367 852

Ol Not

  1. Luk long Daughters in My Kingdom: The History and Work of Relief Society (2011), 105.

  2. Luk long Handbook 2: Administering the Church (2010), 3.2.3.

  3. Daughters in My Kingdom, 3.

  4. Daughters in My Kingdom, 6.

Wanem Mi Save Mekem?

  1. Olsem wanem nao mi save leftemap paoa blong mi blong stap kea long ol narawan?

  2. Wanem nao mi stap mekem blong meksua se ol sista we mi stap lukaot long olgeta bae oli save se mi lavem olgeta?