Fas Presidensi Mesej, Julae 2012
I Stap Oltaem long Medel
Long plante kalenda long wol, Julae i makem medel blong yia. Nomata, oli stap selebretem mo oli stap tingbaot ol stat mo en blong ol samting, be medel blong ol samting, plante taem oli no stap luksave.
Ol stat, oli ol taem blong mekem sam tingting, blong mekem ol plan, blong gat fulap paoa. Ol en, oli ol taem blong slodaon, mo tu, bae i save gat ol filing blong glad blong finisim wan samting o filing blong harem nogud blong lusum wan samting. Be sapos yumi stap aot mo luklukgud long hemia, mo tekem se yumi wanwan i bin stap long medel blong ol samting, hemia, bae i save helpem yumi; i no blong andastanem gud smol moa nomo abaot laef, be tu, blong laef long laef ia wetem moa mining.
Medel blong Misinari Wok
Taem mi toktok long ol yangfala misinari, plante taem mi stap talem long olgeta se oli stap long medel blong misin blong olgeta. Nomata oli jes kam long misin blong olgeta wan dei i pas, o bae oli go hom wan dei afta, mi askem olgeta blong tingting abaot olgeta wanwan olsem se oli stap long medel oltaem.
Ol niu misinari, bae oli filim se oli no gat inaf eksperiens blong save wok gud mo afta oli slo blong toktok o tekem aksen wetem tras, mo blong toktok wetem paoa. Ol misinari we oli bin gat ol eksperiens mo oli stap kam kolosap blong finisim misin blong olgeta, bae oli filim sore se misin blong olgeta i stap kam long wan en, o bae oli sloem daon wok blong olgeta, taem oli stap tingting long wanem bae oli mekem taem bae oli finisim misin blong olgeta.
Nomata ol situesen mo weaples oli stap long misin long hem, wanem we i tru, i we ol misinari blong Lod ia, evri dei, oli stap planem plante sid blong gud nius. Taem ol misinari oli tingting long olgetawan bakegen olsem se oli stap oltaem long medel blong misin blong olgeta, bae i mekem olgeta oli gat tras mo gat paoa blong stap olsem ol fetful misinari we oli stap ripresentem Lod. I olsem blong ol fultaem misinari, semmak, i olsem blong yumi evriwan.
Yumi Stap long Medel Oltaem
Jenis ia blong wei blong luk samting, i moa bitim wan trik long tingting. I gat wan trutok we i naes tumas biaen long tingting ia se yumi stap long medel oltaem. Sapos yumi lukluk weaples yumi stap long hem long wan map, yumi wantem tumas blong talem se yumi stap long stat. Be sapos yumi lukluk kolosap moa, nomata weaples yumi stap long hem, yumi stap nomo long medel blong wan moa bigfala ples.
Olsem we yunives i stap, i semmak wetem taem. Ating yumi stap filim se yumi stap long stat o long en blong laef blong yumi, be taem yumi lukluk long ples we yumi stap long hem komperem long taem we i no save finis—taem yumi luksave se spirit blong yumi i bin stap finis long wan taem bifo we yumi no save skelem naoia, mo, from sakrifaes we i stret evriwan mo Atonmen blong Jisas kraes we i mekem se bae sol blong yumi i stap long wan taem we i no save finis we bae i kam yet—nao, yumi save luksave se, i tru, yumi stap long medel.
I no longtaem i pas, mi filim se i impoten blong mekem bakegen simen blong gref blong papa mo mama blong mi. Taem i no gat sore long ples we gref i stap long hem mo mi filim se blong putum wan niufala simen long gref blong tufala bae i moa stret from gudfala eksampol blong laef blong tufala. Taem mi lukluk long ol deit we tufala i bon mo ol deit we tufala i ded long hem long simen blong gref blong tufala, mo ol deit ia oli joen from wan smol laen nomo, smol simpol laen ia we i saen blong laeftaem i fulumap maen mo hat blong mi wetem plante gudgudfala memori. Wanwan long ol gudgudfala memori ia i ripresentem wan sot taem long medel blong laef blong papa mo mama blong mi, mo long medel blong laef blong mi.
Nomata ol yia blong yumi, nomata weaples yumi stap long hem, taem we ol samting i hapen long laef blong yumi, yumi stap long medel oltaem. Wanem moa, bae yumi stap long medel blong oltaem.
Hop blong Stap Stap long Medel
Yes, bae i gat ol sot taem blong ol stat mo ol sot taem blong ol en blong ol samting truaot long ol laef blong yumi, be hemia oli ol mak, long saed blong rod blong yumi, blong bigfala medel blong laef blong yumi we i no save finis. Nomata yumi stap long stat o long en, nomata yumi yang o olfala, Lod i save yusum yumi long ol stamba tingting blong Hem, sapos yumi putumaot long saed ol tingting we i mekem se yumi no gat tumas paoa blong givim seves mo yumi letem tingting blong Lod i stretem laef blong yumi.
Man we i raetem Ol Sam i talem se: “Dei ia, hemi dei we hem i win long hem, i gud yumi glad, yumi mekem lafet. (Ol Sam 118:24). Amulek i mekem yumi tingbaot se “laef ia hem i taem blong ol man blong mekem rere blong mitim God; yes luk dei blong laef ia i dei blong ol man blong mekem ol wok blong olgeta” (Alma 34:32; oli ademap italik). Wan man we i raetem poem i talem se: “Taem ia we i blong oltaem—insaed long hem, i gat plante Taem blong Naoia.”1
Blong stap stap long medel oltaem, i minim se gem i neva finis, hop i neva lus mo wan faet i neva gat faenol. Nomata long ples we yumi stap long hem, o wanem situesen blong yumi, wan taem long stat we i no save finis mo wan taem long en we i no save finis bae i kamaot yet long fored blong yumi.
Yumi Stap long Medel Oltaem.
© 2012 i kam long Intellectual Reserve, Inc. Oli letem long Inglis: 6/11. Oli letem translesen: 6/11. Translesen blong First Presidency Message, July 2012. Bislama. 10367 852
Blong Tijim Mesej Ia
Tingting hevi blong toktok raon wetem ol famle olsem wanem nao oli “stap long medel oltaem,” nomata sapos oli stap statem o endem wan samting. Leftemap tingting blong olgeta blong mekem moa gud long ol aktiviti we oli stap mekem naoia, mo no stap tingbaot bakegen ol samting we i pas finis, o wet from nekis aktiviti o projek. Bae yu save givim tingting blong oli jusum wan samting we oli save mekem olsem wan famle blong oli putum kaonsel ia long aksen, mo oli putum wan dei we bae oli hop blong kasem gol blong olgeta long hem.