iTukutuku ni Mataveiliutaki Taumada, Julai 2012
Dau tu ga e Lomadonu
Ena vuqa na ivolanivula e vuravura, e kena lomadonu tiko ni yabaki na Julai. Sa dau vakavuqa na kena sega tu ni kauwaitaki na lomadonu, ni sa dau solevuti ka vakananumi ga na itekitekivu kei na itinitini ni veika.
Na gauna ni noda dau yalataki keda ena so na ka, e gauna ni itekitekivu, e gauna ni tuvatuvanaki, ka dau tu vinaka kina na icegu. Ia na gauna me cava kina na ka, sa gauna ni dau vakamalua sobu ka rawa me vakilai kina ni sa oti se sa yali. Ia ena kena irairai dina, na noda dau vakasamataki keda meda tu e lomadonu ni ka, e rawa ni vukei keda, sega walega meda dau kila vakavinaka cake na veika ni bula ia me na dau vakaibalebale talega kina na kena bulataki.
Na Lomadonu ni Cakacaka ni Daukaulotu
Niu dau vosa vei ira na noda daukaulotu itabagone, au dau kaya vakawasoma ni ra sa tu sara ga ena lomadonu ni nodra kaulotu. Se ke ra se qai yaco ga mai ni bera na siga o ya, se mera sa na biubiu sara tiko ga ena siga ka tarava, au dau kerei ira mera dau nanuma tiko ga me vaka ga ni ra sa tu sara ga ena kena lomadonu.
O ira na daukaulotu vou era na nanuma beka ni ra se sega sara ni kila vinaka na ka, me rawa ni mana kina na nodra veiqaravi, ka ra sega soti kina ni dau vosa se veiqaravi ena yalodei kei na yaloqaqa. O ira era sa matau ena daukaulotu ka sa vakarau oti nodra kaulotu era na yalorarawa ni sa vakarau me cava na nodra kaulotu, se era sa na malumu mai ni ra sa tekivu veinanuyaka na ka mera na cakava ni oti nodra kaulotu.
Ia se vakacava sara na ka e yaco, se evei sara era veiqaravi kina, na kena dina sa ikoya ni sa dau kaburaka sara tiko ga e veisiga yadua na daukaulotu ni Turaga na sore ni itukutuku vinaka. Ena dau vakayaloqaqataki ira ka vakaukauwataki ira na mata, ni Turaga oqo na nodra dau nanuma tu ga ni ra sa tu sara ga ena lomadonu ni nodra kaulotu. Me vaka ga na kena yaco tiko vei ira na daukaulotu, sa vakakina vei keda kece talega.
Eda Na Dau tu ga e Lomadonu
Na veisautaki ki na ivakarau ni rai vakaoqo, ena rawata e levu sara na ka mai na dua na kena lawakitaki ga vakalailai na vakasama. E tiko e dua na dina veivakauqeti ena noda dau nanuma tu ga ni da na dau tu ga e lomadonu. Ke da raica na vanua eda tu kina ena mape, eda na temaki meda kaya ni da sa tu ena dua na itekitekivu. Ia kevaka meda raica sara vakavoleka, se evei ga eda tu kina eda tu dina ga ena lomadonu ni dua na vanua levu cake.
Me vaka ga ena maliwalala, sa vaka talega kina kei gauna. Eda na rairai vakila beka ni da sa tu ena itekitekivu se icavacava ni noda bula, ia ena gauna eda raica kina na vanua eda sa tu kina kei na ituvatuva ena tawamudu—ena gauna eda vakila mai kina ni da a bula tu mai vakayalo ena dua na gauna ka da sega ni na rawa ni vakarautaka rawa na kena cecere, ia ena vuku ni dua na taucoko ni solibula kei na Veivueti i Jisu Karisito, sa na rawa ni yacova kina na yaloda e dua na ituvaki tawamudu—eda na qai kila kina ni da sa tu dina e lomadonu.
Se qai oti wale tiko ga oqo na noqu luvuci vakalevu sara ena noqu mai veisautaka yani na vatu ivakananumi ni nodrau ibulubulu na noqu itubutubu. Sa yaco me vakacacani vakalevu na ibulubulu ena balavu ni gauna e tu mai kina, kau vakila ni na veirauti vinaka kei na nodrau bula ivakaraitaki vinaka na kena vatu ivakananumi vou. Ena gauna au raica kina na itoqa rairai matau ka mamada wale tu ga ka mai semati rau toka na tikinisiga ni sucu kei na siga ni mate ena vatu ivakananumi, sa dua na ka na vuabale ni kena vakasinaiti na noqu vakasama kei na yaloqu ena vakanananu vutuniyau, ni itoqa lailai oqo. Era ivakananumi lesu ni dua na tiki ni gauna ena lomadonu ni nodrau bula na noqu itubutubu, vakakina ena lomadonu ni noqu bula, o ira vakayadudua na veivakanananu talei oqo.
Se da yabaki vica, se evei eda vakaitikotiko kina, ena gauna e yaco kina vei keda eso na ka, eda na dau tu ga e lomadonu. Se cava tale, eda na dau tu ga e lomadonu.
Na iNuinui ni da Tu e Lomadonu
Io, era na dau tu na gauna ni itekitekivu kei na gauna ni icavacava ena noda bula taucoko, ia oqo era itoqa wale tu ga ena sala ni lomadonu cecere ni noda bula tawamudu. Se da tu ena itekitekivu se ena kena icavacava, se da gone se qase, e rawa ni vakayagataki keda ena Nona inaki na Turaga kevaka eda biuta vakatikitiki na vakasama era dau vakalatilati tu ena noda rawa ni veiqaravi ka vakatara me tulia noda bula na Nona lewa.
E kaya na Daunisame, “Oqo na siga sa lesia ko Jiova; e [da] na reki ka marau kina” (Same 118:24). E vakadreta vei keda o Amuleki “me vakarautaki koya na tamata ena bula oqo me na lesu tale vua na Kalou; ia oqo na bula me kitaka kina na tamata na nona cakacaka kece ga” (Alama 34:32; vakasama vakaikuritaki). Vakakina na vakanananu ni dua na serekali, “Na Tawamudu—e okati kina na gauna sara ga Oqo.”1
Na noda na dau tu ga e lomadonu, e kena ibalebale ni na sega ni oti rawa na qito, sega ni yali na inuinui, sega ni kena itinitini na druka. Baleta ni veitalia sara se evei eda tu kina se cava eda sota kaya tu, ena dau tu ga e matada e dua na tawamudu ni itekitekivu vakakina e dua na tawamudu ni itinitini.
Eda na dau tu ga e lomadonu.
© 2012 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/11 Vakadonui me vakadewa: 6/11 iVakadewa ni First Presidency Message, July 2012. Fijian. 10367 858
Vakavulici ni iTutukutuku Oqo
Vakasamataka mo veivosakitaka vata kei na matavuvale na nodra “na dau tu ga e lomadonu,” veitalia ga ke ra se qai tekivutaka tiko se ra sa tinia tiko e dua na ka. Vakauqeti ira me ra gumatuataka na ka era sa vakayacora sara tiko ga oqo, ka kakua ni tiko ga ena gauna sa oti se waraka me tekivu na itaviqaravi se sasaga vakacakacaka ka tarava. O na gadreva beka mo vakatututaka me ra digia e dua na ka e rawa me ra vakayacora vata vakamatavuvale me vakayacori kina na ivakasala oqo ka navuca e dua na tikinisiga ka ratou nuitaka me sa na rawati kina na nodratou navunavu.