Mesaj Premye Prezidans, Jiyè 2012
Toujou nan Mitan
Selon anpil kalandriye mond lan, Jiyè se mitan ane a. Pandan ke yo toujou sonje ak selebre kòmansman ak fen bagay yo, mitan bagay yo souvan pase inapèsi.
Kòmansman yo se moman pou pran rezolisyon, pou kreye plan, pou eklatman enèji. Fen yo se moman pou rilaks e yo ka enplike santiman akonplisman oswa pèt. Men avèk bon jan pèspektiv, konsidere tèt nou kòm nan mitan bagay yo kapab ede nou non sèlman konprann lavi a yon ti jan pi byen men tou viv li yon fason ki yon ti jan pi siyifikatif.
Mitan Travay Misyonè a
Lè m ap pale avèk jèn misyonè nou yo, souvan mwen di yo ke yo nan mitan misyon yo. Ke yo fèk rive jou anvan an ke yo gen pou retounen lakay yo jou apre a, mwen mande yo pou yo konsidere tèt yo kòm moun ki nan mitan misyon yo.
Nouvo misyonè yo gen dwa santi yo twò manke eksperyans pou yo efikas, epi konsa yo pran tan anvan yo pale oswa aji avèk konfyans ak konviksyon. Misyonè eksperimante ki prèske fini misyon yo gen dwa santi yo tris dèske misyon yo ap fini, oubyen yo gen dwa ralanti lè y ap panse ak sa yo pral fè apre misyon yo.
Kèlkeswa sikonstans yo e kèlkeswa kote yo sèvi, laverite sèke misyonè Senyè a yo ap simen semans bòn nouvèl enkalkilab chak jou. Panse ak tèt yo kòm moun ki nan mitan misyon yo ap bay reprezantan fidèl Senyè sa yo kouraj ak enèji. Menmjan sa ye pou misyonè aplentan yo, se menm jan sa ye pou nou tout tou.
Nou Toujou nan Mitan
Chanjman nan pèspektiv sa a plis pase yon senp atrap nan lespri a. Gen yon gwo verite dèyè ide ke nou toujou nan mitan an. Si nou gade ki kote nou sitiye sou yon kat, nou tante pou di ke nou nan yon kòmansman. Men si nou gade pi byen, kèlkeswa kote nou ye se senpleman nan mitan yon pi gwo plas.
Menmjan sa ye nan zafè espas, se konsa sa ye avèk tan tou. Nou kapab santi nou nan kòmansman oswa nan fen lavi nou, men lè nou gade kote nou ye nan kontèks letènite — a, lè nou rann nou kont ke lespri nou egziste pandan yon tan ki depase kapasite nou pou nou mezire epi, akozde de sakrifis pafè ak Ekspyasyon Jezikri a, ke nanm nou ap egziste pou yon etènite k ap vini an—nou kapab rekonèt ke nou reyèlman nan mitan.
Dènyèman mwen te santi m pouse pou refè plak ki te sou tonm paran m yo. Tan an pa t bon nan zòn tonm nan, epi m te santi ke yon nouvo plak t ap pi bon pou lavi egzanplè yo. Lè m te gade dat nesans yo ak dat lanmò yo sou plak la ki te relye pa ti trèdinyion ensiyifyan an, ti senbòl sa a ki reprezante tout yon vi te ranpli lespri m ak kè m toudenkou avèk yon bann bèl souvni. Chak nan bèl souvni sa yo reflete yon moman nan mitan lavi paran m yo ak nan mitan lavi m.
Kèlkeswa laj nou, kèlkeswa kote nou ye, lè bagay yo rive nan lavi nou, nou toujou nan mitan. Sa nou ka ajoute sèke n ap toujou nan mitan.
Espwa pou nou nan Mitan
Wi, ap gen moman kòmansman ak moman fen pandan tout lavi nou, men moman sa yo se sèlman makè yo ye sou wout gwo mitan lavi etènèl nou. Ke nou nan kòmansman an oubyen nan fen an, ke nou jèn oswa aje, Senyè a kapab sèvi avèk nou pou bi li si nou senpleman mete akote kèlkeswa panse ki limite kapasite nou pou sèvi ak pèmèt volonte li fòje lavi nou.
Salmis la di: “Ala yon bèl jounen Senyè a ban nou; nou [dwe] ap fè fèt, epi fè kè nou kontan” (Som 118:24). Amilèk raple nou ke “lavi sa a se lè pou lèzòm prepare yo pou rankontre Bondye; wi, reyèlman jou lavi sa a se jou pou lèzòm fè travay yo” (Alma 34:32; anfaz ajoute). Epi yon powèt ekri: “Pou tout tan—konpoze ak yon bann Kounyeya.”1
Toujou nan mitan vle di ke jwèt la pa janm fini, espwa pa janm pèdi, defèt pa janm final. Paske kèlkeswa kote nou ye oubyen kèlkeswa sikonstans nou, yon etènite kòmansman ak yon etènite fen layi te devan nou.
Nou toujou nan mitan.
© 2012 pa Intellectual Reserve, Inc. Tout dwa rezève. Enprime nan Etazini Damerik. Apwobasyon anglè: 6/11. Apwobasyon tradiksyon: 6/11. Tradiksyon First Presidency Message, July 2012. Haitian Creole. 10367 036
Anseye Mesaj sa a
Panse pou diskite avèk fanmi an jan yo “toujou nan mitan,” menm si yo nan kòmansman oswa nan fen yon bagay. Ankouraje yo pou yo fè pi byen posib nan aktivite yo genyen kounyeya, pou yo pa rete sou lepase ni tann aktivite oswa pwojè ki ap vini an. Ou gen dwa sigjere pou yo chwazi yon bagay yo kapab fè an fanmi pou aplike konsèy sa a epi fikse yon dat kote yo espere atenn bi sa a.