2012
Demontre Ou Se Yon Disip pa mwayen lanmou ak sèvis
jiyè 2012

Mesaj vizit nan fwaye, Jiyè 2012

Demontre Ou Se Yon Disip pa mwayen Lanmou ak Sèvis

Etidye materyèl sa a nan lapriyè epi, si sa apwopriye, diskite li avèk sè w ap vizite yo. Sèvi avèk kesyon yo pou ede w fòtifye sè w yo epi fè Sosyete Sekou a jwe yon wòl aktif nan pwòp vi pa w.

Lafwa, Fanmi, Sekou

Pandan tout lavi mòtèl Li a, Jezikri te montre lanmou L pou lòt moun nan sèvi yo. Li te di: “Si nou youn renmen lòt, lè sa a tout moun va konnen se disip mwen nou ye” (Jan 13:35). Li te bay egzanp la e li vle pou nou “sekouri moun ki bezwen sekou nan men nou” (Mozya 4:16). Li mande disip Li yo pou yo travay avèk Li nan Ministè l la, pandan li ba yo opòtinite pou yo sèvi lòt moun epi vin pi sanble avèk li.1

Sèvis nou kòm enstriktris nan fwaye ap sanble plis ak ministè Sovè nou an lè nou montre lanmou nou pou moun n ap vizite yo nan fè bagay sa yo:2

  • Sonje non yo ak non manm fanmi yo epi vin aprann konnen yo.

  • Renmen yo san nou pa jije yo.

  • Veye sou yo epi fòtifye lafwa yo “youn pa youn,” jan Sovè a te fè a (3 Nefi 11:15).

  • Etabli amitye sensè avèk yo epi vizite yo lakay yo ak lòt kote.

  • Pran swen chak sè. Sonje jou fèt yo, gradyasyon yo, maryaj yo, batèm yo, oswa lòt moman ki siyifikatif pou yo.

  • Lonje lamen bay nouvo manm yo ak manm inaktif yo.

  • Lonje lamen bay moun ki pou kont yo oubyen moun ki bezwen rekonfò yo.

Apati Ekriti yo

3 Nefi 11; Mowoni 6:4; Doktrin ak Alyans 20:47

Apati Istwa Nou

“Nouvo Testaman an gen istwa kèk fi, non yo site ak sa non yo pa site, ki te egzèse lafwa nan Jezikri. … Fi sa yo te vin tounen disip modèl [Yo] te vwayaje avèk Jezi ak Douz Apot li yo. Yo te bay tout sa yo te genyen pou te ede nan ministè L la. Apre lanmò li ak Rezirèksyon L, [yo] te kontinye rete disip fidèl.”3

Pòl te ekri yon fi ki te rele Febe, ki te “yon sèvant nan legliz la” (Women 16:1). Li te mande moun yo pou yo te “ ede li nan tout sa li ka bezwen, paske li menm li deja ede anpil moun” (Women 16:2). “Kalite sèvis Febe ak lòt gwo fi sa yo nan Nouvo Testaman an te rann nan kontinye jodia avèk manm Sosyete Sekou yo—dirijant yo, enstriktris nan fwaye yo, manman yo, ak lòt—ki ap aji kòm moun k ap pote sekou, oswa moun ki ap pote èd bay anpil moun.”4

© 2012 pa Intellectual Reserve, Inc. Tout dwa re Tout dwa rezève Enprime nan Etazini Damerik. Apwobasyon anglè: 6/11. Apwobasyon tradiksyon: 6/11. Tradiksyon Visiting Teaching Message, July 2012. Haitian Creole. 10367 036

Nòt

  1. Gade Daughters in My Kingdom: The History and Work of Relief Society (2011), 105.

  2. Gade Handbook 2: Administering the Church (2010), 3.2.3.

  3. Daughters in My Kingdom, 3.

  4. Daughters in My Kingdom, 6.

Kisa m Ka Fè?

  1. Kijan m ap ogmante kapasite m pou nouri lòt moun?

  2. Kisa m ap fè pou asire m ke sè m ap vizite yo konnen mwen renmen yo?