Thawj Pawg Thawj Tswj Hwm tsab Xov, Peb Hlis Ntuj 2012
Yeej Mus Txog Ib Nrab Xwb
Nyob hauv ntau daim ntawv suav hnub, lub Xya Hli Ntuj yog ib nrab xyoos. Txawm peb pheej nco ntsoov thiab ua koob tsheej thaum tej yam pib los sis kawg, qhov nruab nrab los tib neeg tsis tshua nco txog.
Qhov pib yog lub sij hawm uas peb cuab hom phiaj, npaj thiab sib zog ua tej yam. Qhov kawg yog lub sij hawm npaj tsum tsis ua ntxiv thiab tej zaum yuav ua rau yus muaj tej kev xav tias yus ua tag lawm los yog muaj kev poob siab. Tiam sis yog peb xav raws li qhov yog, thiab xav tias peb mus txog ib nrabw xwb ces yuav pab peb to taub peb lub neej zoo dua thiab ua nej lub neej kom muaj lub ntsiab.
Qhov Mus Txog Ib Nrab ntawm cov Tub Txib tej Hauj Lwm
Thaum kuv nrog peb cov tub txib tham, ntau zaus kuv qhia lawv tias lawv tab tom ua tub txib mus txog ib nrab xwb. Txawm lawv nyuam qhuav tuaj ua tub txib los sis tshuav ib hnub xwb lawv yuav mus tsev, kuv hais kom lawv xav tias lawv ua tub txib txog ib nrab xwb.
Cov tub txib tshiab tej zaum yuav xav tias lawv tsis paub ntau txaus kom ua tau zoo, yog li ntawd lawv ncua sij hawm tsis hais lus los yog ua siab loj ua tej yam. Cov tub txib uas tsis ntev yuav ua lawv tej hauj lwm tiav tej zaum yuav nyuaj siab vim lawv tej hauj lwm ua tub txib yuav kawg, los yog lawv tsis ua hauj lwm ntau thaum lawv pib xav txog qhov uas lawv yuav ua li cas tom qab lawv ua tub txib tag lawm.
Txawm lawv ua hauj lwm pab lwm tus nyob qhov twg los xij, tus Tswv cov tub txib ua hauj lwm tshaj tawm txoj moo zoo txhua hnub. Yog lawv xav tias lawv ua tub txib mus txog ib nrab xwb ces yuav ua rau tus Tswv cov neeg sawv cev uas rau siab ntseeg ua siab loj thiab muaj zog. Peb los yeej zoo ib yam li cov tub txib.
Peb Yeej Mus Txog Ib Nrab
Qhov kev hloov peb tej kev xav tsis yog ib txoj kev dag peb tus kheej. Qhov uas peb yeej mus txog ib nrab xwb yeej yog ib qho tseeb. Yog tias peb saib peb qhov chaw nyob hauv ib daim phees thib, ces peb yuav xav tias peb nyob ntawm qhov pib. Tiam sis yog peb xav zoo zoo, ces qhov chaw peb nyob yeej yog qhov nruab nrab ntawm ib qho chaw loj zog.
Sij hawm los yeej zoo ib yam li ib qho chaw. Tej zaum peb xav tias peb lub neej nyuam qhuav pib los yog twb yuav tag, tiam sis yog peb xav txog qhov uas peb yuav nyob mus ib txhis—thaum peb paub tias peb tus ntsuj plig twb nyob ntev tshaj qhov peb xav, thiab vim Yexus Khetos ua kev txi thiab Theej Txhoj, peb tus ntsuj plig yuav nyob ntev mus ib txhis—ces peb yuav paub tias peb mus txog ib nrab xwb.
Tsis ntev tas los kuv txais kev tshoov siab kho daim pob zeb nyob rau ntawm kuv niam kuv txiv lub ntxa. Ntau xyoo dhau los es ua rau nkawd lub ntxa puas tas, thiab kuv xav tias yuav tsum muaj ib lub pob zeb tshiab thiaj tsim nyog ua ib lub cim txog nkawd lub neej zoo. Thaum kuv saib lub cim me me uas muab nkawd hnub yug thiab hnub tuag txuas ua ke txuag rau ntawm lub pob zeb ntawd, lub cim uas piv txog tag nrho nkawd lub neej ua rau kuv xav txog ntau yam hauv kuv lub siab lub ntsws. Txhua yam uas kuv nco txog yog ib lub sij hawm uas mus txog ib nrab ntawm kuv niam kuv txiv lub neej thiab mus txog ib nrab ntawm kuv lub neej.
Txawm peb laus npaum li cas los, txawm peb nyob qhov twg, thaum twg muaj xwm txheej hauv peb lub neej, twb mus txog ib nrab xwb. Tsis tas li ntawd xwb, yeej yuav nyob rau ntawm qhov nruab nrab tas mus li.
Kev Cia Siab ntawm Qhov uas Mus Txog Ib Nrab
Yeej yuav muaj lub sij hawm pib thiab sij hawm kawg nyob rau hauv tag nrho peb lub neej, tiam sis tej lub sij hawm ntawd yog tej lub cim ntawm txoj kev mus txog ib nrab ntawm peb lub neej nyob mus ib txhis. Txawm peb nyuam qhuav pib los sis peb yuav luag ua tag, txawm peb hluas los laus los yog, tus Tswv yeej yuav siv peb ua Nws lub hom phiaj yog peb yuav tso qhov uas peb xav tias peb pab tsis tau tseg thiab cia hloov peb lub neej kom ua raws li Nws lub siab nyiam.
Tus Sau Phau Nkauj hais tias, “Hnub no yog ib hnub uas tus Tswv tsim; peb cia li zoo siab thiab txaus siab rau hnub no” (Phau Nkauj 118:24). Amulej qhia peb tias “lub neej no yog lub caij rau tib neeg npaj mus ntsib Vajtswv; muaj tseeb tiag, saib seb lub caij ntawm lub neej no yog lub caij rau tib neeg ua lawv tej hauj lwm” (Amas 34:32; ntxiv qhov uas ntawv qaij). Thiab ib tug kws sau paj lug xav tias, “Yuav kom nyob tas mus li—yuav tsum pib tam sim no.”1
Qhov uas mus txog ib nrab xwb tas mus li txhais tau hais tias yeej muaj sij hawm ua, yeej muaj kev cia siab, qhov swb tsis yog qhov kawg. Tsis hais peb nyob qhov twg los yog peb raug xwm txheej dab tsi los, tseem muaj sij hawm pib thiab sij hawm kawg nyob mus ib txhis rau peb.
Peb yeej mus txog ib nrab xwb.
© 2012 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/11. Pub txhais ua lus Hmoob: 6/11. Kev txhais First Presidency Message, July 2012. Hmong. 10367 295
Qhia los ntawm tsab Xov No
Xav seb puas sib tham nrog tsev neeg txog qhov uas lawv “yeej mus txog ib nrab xwb,” txawm yog lawv nyuam qhuav pib los sis yuav luag xaus ua ib yam dab tsi. Yaum kom lawv ua zoo npaum lawv ua tau thaum lawv ua tej yam tam sim no, thiab tsis txhob xav txog yav tas los los sis tos kom mus txog thaum lwm yam yuav pib. Tej zaum koj yuav xav hais kom lawv xaiv ib qho lawv tsev neeg ua tau ua ke kom ua raws li cov lus qhia no thiab teem ib hnub uas lawv cia siab tias lawv yuav ua tau lub hom phiaj ntawd.