2012
Qhia tias Peb Yog Neeg Pab Coj Los ntawm Kev Hlub thiab Kev Pab Lwm Tus
July 2012

Cov Mus Saib Xyuas Tom Tsev tsab Xov, Xya Hli Ntuj 2012

Qhia tias Peb Yog Neeg Pab Coj Los ntawm Kev Hlub thiab Kev Pab Lwm Tus

Ua tib zoo thov Vajtswv kawm tej yam no thiab, thaum tsim nyog ua, sib tham txog tej no nrog cov viv ncaus uas koj mus xyuas. Siv tej lus nug no pab koj txhawb koj cov viv ncaus lub zog thiab ua kom lub Koom Haum Niam Tsev muaj feem hauv koj lub neej.

Kev Ntseeg, Tsev Neeg, Kev Pab

Hauv Nws lub neej hauv lub ntiaj teb no, Yexus Khetos qhia tias Nws hlub lwm tus thaum Nws ua hauj lwm pab lawv. Nws hais tias, “Yog nej ib leeg hlub ib leeg, sawv daws thiaj yuav paub hais tias nej yog kuv cov thwj tim” (Yauhas 13:35). Nws coj yam ntxwv zoo thiab xav kom peb “yuav pab cov uas xav tau [peb txoj] kev pab” (Mauxiyas 4:16). Nws hu Nws cov pab coj ua hauj lwm nrog Nws, muab cib fim rau lawv pab lwm tus thiab rais los ua neeg zoo li Nws.1

Peb tej hauj lwm mus saib xyuas tom tsev yuav zoo li tus Cawm Seej txoj hauj lwm qhuab qhia thaum peb qhia tias peb hlub cov uas peb mus xyuas thaum peb ua tej yam no:2

  • Cia li nco qab lawv lub npe thiab lawv tsev neeg tej npe thiab paub lawv zoo.

  • Cia li hlub lawv tsis txhob txiav txim rau lawv.

  • Cia li saib xyuas lawv thiab ntxiv dag zog rau lawv txoj kev ntseeg “ib tug dhau ib tug” raws li tus Cawm Seej ua (3 Nifais 11:15).

  • Ntaus kev ua phooj ywg nrog lawv tiag tiag thiab mus xyuas lawv nyob hauv lawv lub tsev thiab lwm qhov chaw.

  • Saib xyuas txhua tus viv ncaus. Nco qab txog lawv hnub yug, hnub kawm ntawv tiav, hnub sib yuav, hnub ua kev cai raus dej, los sis lwm lub sij hawm uas muaj nqi rau nws.

  • Ncav tes los pab cov mej zeej tshiab thiab cov uas tsis tshua muaj siab ntseeg.

  • Ncav tes los pab cov neeg uas kho siab los yog cov uas xav tau kev nplij siab.

Los ntawm cov Vaj Lug Kub

3 Nifais 11; Maulaunais 6:4; Doctrine and Covenants 20:47

Los ntawm Peb zaj Keeb Kwm

“Phau Tshiab qhia txog tej poj niam uas muab siab rau ntseeg Yexus Khetos, tsis hais cov uas muaj npe thiab cov uas tsis muaj npe los yog. … Cov poj niam no tau rais los ua cov pab coj zoo heev. … [Lawv] nrog Yexus thiab Nws Kaum Ob tug Thwj Tim mus. Lawv muab lawv tej khoom kom pab tau Nws txoj hauj lwm qhuab qhia. Tom qab nws tuag thiab Sawv Rov Los, [lawv] tseem ua nws cov pab coj uas muaj siab ntseeg.”3

Pov Lauj sau txog ib tug poj niam hu ua Fenpes, uas yog “ib tug ua hauj lwm pab pawg ntseeg” (Loos 16:1). Nws thov kom cov neeg “cia li pab nws txawm nws thov nej ua dab tsi los xij; rau qhov nws tau pab sawv daws” (Loos 16:2). “Fenpes thiab lwm tus poj niam zoo hauv Phau Tshiab tau pab lwm tus ib yam li cov mej zeej ntawm lub Koom Haum Niam Tsev—cov thawj coj, cov neeg saib xyuas tom tsev, cov niam tsev, thiab lwm tus—uas yog cov neeg tsom kwm saib xyuas thiab pab ntau tus neeg niaj hnub no.”4

© 2012 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/11. Pub txhais ua lus Hmoob: 6/11. Kev txhais Visiting Teaching Message, July 2012. Hmong. 10367 295

Lus Cim

  1. Saib Daughters in My Kingdom: The History and Work of Relief Society (2011), 105.

  2. Saib Handbook 2: Administering the Church (2010), 3.2.3.

  3. Daughters in My Kingdom, 3.

  4. Daughters in My Kingdom, 6.

Kuv Yuav Pab Li Cas?

  1. Kuv ua dab tsi kom kuv haj yam txawj pab lwm tus?

  2. Kuv ua dab tsi qhia cov viv ncaus uas kuv saib xyuas kom lawv paub hais tias kuv hlub lawv?

Luam