2012
Panangipakita iti Kinadisipulotayo babaen ti Ayat ken Panagserbi
July 2012

Mensahe iti Visiting Teaching, Hulio 2012

Panangipakita iti Kinadisipulotayo babaen ti Ayat ken Panagserbi

Sikakararag nga adalenyo daytoy a material ken, no maitutop, ilawlawagyo daytoy kadagiti kakabsat a babbai a sarungkaranyo. Usarenyo dagiti saludsod a mangtulong kadakayo a mangpapigsa kadagiti kakabsatyo a babbai ken mangaramid iti Relief Society nga aktibo a paset iti bukodyo a biag.

Pammati, Pamilia, Tulong

Iti unos ti mortal a biagna, impakita ni Jesucristo ti ayatna para kadagiti dadduma babaen ti panagministrona kadakuada. Kinunana, “Gapu itoy mailasindanto a dakayo ti adalak, no adda ayatyo iti maysa ken maysa” (Juan 13:35). Impakitana ti pagwadan ken kayatnatayo a “tumulong kadagiti makasapul iti tulong[tayo]” (Mosiah 4:16). Awaganna dagiti disipulona a makipagtrabaho kenkuana iti panagministrona, nga ik-ikanna ida iti gundaway nga agserbida kadagiti dadduma ken agbalinda nga ad-adda pay a kas Kenkuana.1

Ti panaserbitayo a kas visiting teacher ket dumani kapadpadanto ti panagministro ti Mangisalakan no ipakitatayo ti ayattayo kadagitay sarungkaran ken suruantayo babaen iti panangaramid iti sumaganad:2

  • Laglagipenyo dagiti naganda ken dagiti nagan dagiti miembro ti pamiliada ket makiam-ammokayo kadakuada.

  • Ayatenyo ida a saan a kedkedngan ida.

  • Bantayanyo ida ken papigsaenyo ti pammatida a “saggaysa,” kas iti inaramid ti Mangisalakan (3 Nephi 11:15).

  • Ipasdekyo dagiti napudno a pannakigayyem kadakuada ken sarungkaranyo ida iti pagtaenganda ken iti sadino man.

  • Ipategyo ti tunggal kabsat a babai. Laglagipenyo dagiti panagkasangay, panagturpos, panagkallaysa, panagbuniag, wenno dadduma pay a panawen a napnuan iti kaipapanan kenkuana.

  • Tulonganyo dagiti kabarbaro ken saan unay nga aktibo a miembro.

  • Tulonganyo dagiti malidlidayan wenno dagitay agkasapulan iti pannakaliwliwa.

Manipud kadagiti Nasantuan a Kasuratan

3 Nephi 11; Moroni 6:4; Doktrina ken Katulagan 20:47

Manipud iti Pakasaritaantayo

“Iraman ti Baro a Tulag dagiti pakasaritaan dagiti babbai, nanaganan ken saan a nanaganan, a nangaramat iti pammatida ken ni Jesucristo. … Nagbalin dagitoy a babbai a pagulidanan a disipulo. … [Isuda] ket nakipagdaliasat ken ni Jesus ken dagiti Sangapulo-ket-dua nga Apostolna. Intedda ti sanikuada a pangtulong iti panagministrona. Kalpasan ti ipapatay ken Panagungarna, intuloy[da] ti nagbalin a napudno a disipulo.”3

Insurat ni Pablo maipapan iti maysa a babai nga agnagan iti Febe, nga isu ti “diaconisa iti iglesia” (Taga Roma 16:1). Indawatna kadagiti tao a “tulongan[da] iti uray ania a banag a pakasapulanna kadakayo: ta isu timmultulong met kadagiti adu” (Taga Roma 16:2). “Ti kita iti serbisio nga impaay ni Febe ken dagiti dadduma pay a naindaklan a babai ti Baro a Tulag ket agtultuloy iti agdama kadagiti miembro ti Relief Society—dagiti dadaulo, visiting teacher, inna, ken dadduma pay—nga agak-akem a sumarsaranay, wenno tumultulong, kadagiti adu.”4

© 2012 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/11. Pannakaanamongna a maipatarus: 6/11. Pannakaipatarus ti Visiting Teaching Message, July 2012. Ilokano. 10367 864

Dagiti Nagadawan

  1. Kitaen iti Daughters in My Kingdom: The History and Work of Relief Society (2011), 105.

  2. Kitaen iti Handbook 2: Administering the Church (2010), 3.2.3.

  3. Daughters in My Kingdom, 3.

  4. Daughters in My Kingdom, 6.

Ania ti Maaramidko?

  1. Kasano ti panangpadur-asko iti kabaelak a mangaywan kadagiti dadduma?

  2. Ania ti ar-aramidek tapno masinunuok nga ammo dagiti kakabsat a babbai nga ay-aywanak nga ipatpategko ida?