Mensahe ti Umuna a Panguluen, Hulio 2012
Kanayon nga Adda iti Tengnga
Segun iti adu a kalendario ti lubong, naisurat ti Hulio a nagtengngaan ti tawen. Idinto a marambakan ken malagip dagiti pangrugian ken paggibusan dagiti banag, masansan a saan a madlaw ti nagtengngaan dagiti banag.
Dagiti pangrugian ket panawen para iti panagaramid kadagiti resolusion, para iti panagparnuay kadagiti plano, para iti pangpabettak iti enerhia. Dagiti paggibusan ket panawen para iti panagsikko ket mabalin a pakairamanan dagiti rikna ti pannakaturpos wenno pannakapukaw. Ngem babaen iti umno a pannirigan, nga ibilbilangtayo dagiti bagitayo nga adda iti tengnga dagiti banag ket makatulong kadatayo saan laeng a tapno maawatantayo a nasaysayaat bassit ti panagbiag no di ketdi pay tapno agbiagtayo iti daytoy a napatpateg pay bassit.
Ti Tengnga ti Aramid ti Misionario
No agsaritaak kadagiti agtutubo a misionario, masansan nga ibagak kadakuada nga addada iti tengnga dagiti misionda. Kasangsangpetda man iti dayta nga aldaw kasakbayanna wenno pumanawda nga agawiden iti dayta nga aldaw kalpasanna, idawatko kadakuada a panunotenda ti bagida a kanayon nga addada iti tengnga.
Mabalin a marikna dagiti baro a misionario nga awan unay padasda tapno agbalinda a nasamay, ket iti kasta itantanda ti panagsao wenno panagtignayda nga addaan iti panagtalek ken kinatured. Dagiti addan padasda a misionario nga asidegen a makalpas iti misionda ket mabalin a mariknada ti liday gapu iti dumanin panaggibus ti misionda wenno mabalin nga agginadda bayat ti panangpampanunotda no anianto ti aramidenda kalpasan ti misionda.
Ania man dagiti kasasaad ken sadino man ti pagserbianda, ti kinapudnona ket inaldaw nga agmula dagiti misionario ti Apo iti di mabilang a bukel ti naimbag a damag. Ti panangpampanunotda iti bagbagida kas kanayon nga adda iti tengnga ti misionda ket mangpatured ken mangpapigsa kadagitoy napudno a pannakabagi ti Apo. Maipadatayo amin kadagiti full-time a misionario.
Kanayon nga Addatayo iti Tengnga
Daytoy a panagbalbaliw iti pannirigan ket ad-adda pay ngem iti simple a sikap ti panunot. Adda nangayed a kinapudno iti likudan ti kapanunotan nga addatayo a kanayon iti tengnga. No kitaentayo ti lugartayo iti maysa a mapa, masulisogtayo a mangisao nga addatayo iti pangrugian. Ngem no kitaentayo a naas-asideg, sadino man ti yantayo ket addatayo laeng iti tengnga ti dakdakkel a lugar.
Kas iti lugar, kasta met iti panawen. Mabalin a mariknatayo nga addatayo iti pangrugian wenno paggibusan ti biagtayo, ngem no kitaentayo no sadino ti yantayo iti lugar ti kinaagnanayon—no maamiristayo a nagbiagen ti espiritutayo iti panawen iti labes ti kabaelantayo a mangtukod ken, gapu iti naan-anay a sakripisio ken Pannubbot ni Jesucristo, nga agbiagto ti kararuatayo iti umay a kinaagnanayon—mabigbigtayo a pudno nga addatayo iti tengnga.
Itay kallabes naawis ti riknak a mangtarimaan iti lapida iti tanem dagiti nagannak kaniak. Saan a nasayaat ti panawen iti disso ti pagitaneman, ket nariknak nga ad-adda a maibagay ti maysa a baro a lapida kadagiti naipagwadan a panagbiagda. Idi kinitak dagiti petsa ti pannakayanak ken petsa ti ipapatayda iti lapida a pinagkonekta ti gagangay nga awan pategna a bassit nga uges, daytoy bassit a simbolo ti panagbiag ti kellaat a nangpunno iti panunot ken pusok iti adu a napapateg a lagip. Tunggal maysa kadagitoy maipatpateg a lagip ket mangyanninaw iti maysa a kanito iti tengnga ti panagbiag dagiti nagannak kaniak ken iti tengnga ti panagbiagko.
Ania man ti tawentayo, ania man ti lugartayo, no mapasamak dagiti banag iti biagtayo, addatayo a kanayon iti tengnga. Ania pay, agnanayonto nga addatayo iti tengnga.
Ti Namnama ti Kaadda iti Tengnga
Wen, addanto dagiti kanito ti panangrugi ken kanito ti panaggibus iti unos ti panagbiagtayo, ngem pagtanda laeng dagitoy iti panagdaliasattayo iti dalan ti dakkel a tengnga ti agnanayon a panagbiagtayo. Addatayo man iti pangrugian wenno iti paggibusan, ubingtayo man wenno nataengan, mabalinnatayo nga aramaten ti Apo kadagiti panggepna no ikkatentayo dagiti ania man a kapanunotan a mangpabassit iti kabaelantayo nga agserbi ket palugodantayo ti pagayatanna a mangsukog iti biagtayo.
Kuna ti Salmista, “Daytoy ti aldaw nga inaramid ni Jehova; [nasken a] pagragsakanmi ken pagragoanminto” (Salmo 118:24). Ipalagip ni Amulek kadatayo a “daytoy a biag ti panawen a panagsagana ti tao a sumabat iti Dios; wen, adtoy ti aldaw daytoy a biag ti aldaw nga agpaay kadagiti tao a mangaramid iti trabahoda” (Alma 34:32; nainayon ti panangyunay-unay). Ket kuna ti maysa a mannaniw, “Ti Agnanayon—ket naglaon kadagiti Agdama.”1
Ti kanayon a kaadda iti tengnga ket kaipapananna a saan a kaano man malpas ti ay-ayam, saan a kaano man mapukaw ti namnama, saan a kaano man maigibus ti pannakaabak. Gapu ta sadino man ti yantayo wenno ania man dagiti kasasaadtayo, mangyuna pay laeng kadatayo ti kinaagnanayon dagiti pangrugian ken kinaagnanayon dagiti paggibusan.
Kanayon nga addatayo iti tengnga.
© 2012 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/11. Pannakaanamongna a maipatarus: 6/11. Pannakaipatarus ti First Presidency Message, July 2012. Ilokano. 10367 864
Panangisuro iti Daytoy a Mensahe
Ibilangyo ti panangilawlawag iti pamilia no kasano ti panagbalinda a “kanayon nga adda iti tengnga,” uray no mangirugrugi wenno mangigibgibusda iti maysa a banag. Allukoyenyo ida nga aramidenda ti amin a kabaelanda kadagiti agdama nga aktibidadda, a saanda nga agtalinaed iti napalabas wenno manguray iti sumaruno nga aktibidad wenno proyekto. Mabalin a kayatyo nga isingasing a pilienda ti maysa a banag a mabalinda nga aramiden kas sangapamilia tapno maipatungpal daytoy a balakad ken mangituding iti maysa a petsa a pakanamnamaanda a maragpatda ti panggepda a tun-oyen.