Fas Presidensi Mesej, Ogis 2012
Sevya I Singaot blong Givim Seves
Evriwan we i bin stadi long ol matematik, oli save wanem nao wan denomineta. Blong ol Lata-dei Sent, i gat wan denomineta (moto) we yumi save gud long hem we i fasem yumi tugeta. Moto ia we yumi save gud long hem, i wanwan koling we wanwan long yumi i kasem blong tekemap wok long kingdom blong God, long ples ia, long wol ia.
Yu bin gilti blong stap komplen taem wan koling i bin kam long yu? O yu bin akseptem wetem tangkyu long wanwan janis we yu bin kasem blong givim seves long ol brata mo sista blong yu, mo save se bae Papa long Heven bae i blesem olgeta we Hem i singaotem olgeta?
Mi hop se bae yumi no lusum ol tru stamba tingting blong ol janis we yumi lavem blong givim seves. Stamba tingting ia, gol ia we i no save finis, i semmak long wanem we Lod i bin tokbaot mo i stap insaed long Perel blong Bigfala Praes. Papa long Heven i talem se wok mo glori blong Hem i blong mekem man i nomo save ded mo givim laef we i no save finis long man.1
Bae oltaem, yumi tingbaot se wok blong membasip insaed long Jos blong Jisas Kraes blong ol Lata-Dei Sent i no wan kot blong stap harem gud be i wan klos blong responsabiliti. Diuti blong yumi, antap long hemia blong sevem yumiwan, i blong lidim ol narafalawan i go long selestial kingdom blong God.
Taem yumi wantem blong wokbaot folem rod blong givim seves long God, bae yumi neva stap long posisen blong Sekspia Kadinal Wolsi. Hem i bin lusum paoa blong hem afta givim laef blong hem blong givim seves long king blong hem, hem i harem nogud mo talem:
Sapos mi bin givim seves long God blong mi nomo wetem haf taem
we mi bin stap givim seves long king blong mi, bae Hem i no save, wetem yia we mi gat,
Lego mi stap neked long fored blong ol enemi blong mi.2
Wanem kaen seves nao heven i wantem? “Lod i wantem hat mo wan maen we i wantem; mo olgeta we oli wantem mo oli obei bae oli kakae ol gud samting long graon blong Saeon long ol las dei ia.”3
Mi stop smol taem, taem mi tingbaot ol toktok blong Presiden Jon Teila (1808– 87): “Sapos yu no stap mekem gud koling blong yu, God bae i mekem yu responsibol long olgeta we yu bin save sevem sapos yu bin mekem diuti blong yu.”4
Wan laet we i saen from ol gud samting i laef blong Jisas taem Hem i stap tij long medel blong ol man. “Mi stap long medel blong yufala olsem Hem we i bin givim seves,”5 Jisas i talem taem Hem i karem paoa i go long olgeta we oli no save wokbaot, mekem olgeta we oli no save lukluk blong oli lukluk bakegen, olgeta we oli no save harem blong oli harem, mo karem laef i go long bodi blong ol dedman.
Wetem parabol blong gudfala Man Sameria, Masta i tijim yumi blong lavem ol neiba blong yumi olsem yumiwan.6 Wetem ansa blong Hem long yangfala rij man ia, Hem i tijim yumi blong lego ol fasin blong selfis blong yumi.7 Taem Hem i givim kakae long ol 5,000 man, Hem i tijim yumi blong lukluk long ol nid blong ol narawan.8 Mo wetem Toktok blong Hem antap long Hil, Hem i tijim yumi blong lukaotem faswan kingdom blong God.9
Long Niu Wol, Lod we i bin laef bakegen long ded i bin talem: “Yufala i save ol samting we yufala i mas mekem long jos blong mi; from ol wok we yufala i bin lukim mi mi mekem, samting ia bae yufala i mas mekem tu; from ol samting we yufala i bin lukim mi mi mekem, samting ia bae yufala i mas mekem.”10
Yumi blesem laef blong ol narawan taem yumi stap givim seves folem eksampol blong “Jisas blong Nazaret … we i stap go olbaot mo mekem ol gud samting.”11 God i blesem yumi blong faenem glad long fasin blong givim seves long Papa we i stap long Heven, taem yumi stap givim seves long ol pikinini blong Hem long wol ia.
© 2012 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/11. Oli letem translesen: 6/11. Translesen blong First Presidency Message, August 2012. Bislama. 10368 852
Yusum Mesej Ia blong Tij
“[Lod] bae i no save letem yumi blong foldaon sapos yumi mekem pat blong yumi. Bae Hem i givhan long yumi iven bitim wanem we yumi save mekem. … I wan long ol swit eksperiens we i save kam long wan man” (Ezra Taft Benson, insaed long Teaching, No Greater Call [1999], 20). Tingbaot blong serem wan eksperiens taem yu o wan narawan we yu save, i bin filim Lod i givhan long hem long ol samting we hem i save mekem. Invaetem famle blong serem sam long ol gud eksperiens blong olgeta taem oli ansa taem Sevya i singaot blong givim seves.”