2012
Tekem Aksen long Taem blong Nid
Ogis 2012

Visiting Tijing Mesej, Ogis 2012

Tekem Aksen long Taem blong Nid

Wetem prea, stadi long toktok ia, mo olsem we i stret, toktok raon long hem wetem ol sista we yu stap visitim. Yusum ol kwestin blong helpem yu blong mekem ol sista blong yu oli kam strong moa mo blong mekem Rilif Sosaeti i kam wan aktiv pat long laef blong yu.

Rilif Sosaeti sil

Fet, Famle, Help

Olsem ol visiting tija, wan long ol stamba tingting blong yumi i blong helpem ol famle mo ol hom oli kam strong moa. Ol sista we yumi visitim, oli mas save talem: “Sapos mi gat ol problem, mi save se visiting tija blong mi bae i helpem mi, mo i no nid blong mi askem olgeta.” Blong givim seves, yumi gat responsabiliti blong tingbaot ol nid blong ol sista we yumi visitim. Taem yumi lukaotem insperesen, bae yumi save olsem wanem blong ansa long ol nid long saed blong spirit mo blong wol blong wanwan sista we yumi stap visitim. Afta, taem yumi yusum ol taem, ol skil, ol talen, ol prea blong fet, mo sapot blong spirit mo filing blong yumi, bae yumi save help blong givim ol seves wetem lav mo sore long ol taem blong sik, ded, mo ol narafala spesel situesen.1

Tru long help blong ol ripot we oli kam long ol visiting tija, Rilif Sosaeti presidensi i faenem olgeta we oli gat ol spesel nid from ol sik long saed blong bodi mo filing, imejensi, bebi i bon, ol ded, handikap, olgeta we oli stap olgetawan, o ol narafala jalenj. Afta, Rilif Sosaeti presiden i ripotem ol samting we hem i faenem long bisop. Anda long daereksen blong bisop, hem i oganaesem help.2

Olsem ol visiting tija, yumi save gat ol “bigfala stamba tingting … blong stap glad” from “blesing we oli bin givim long yumi, blong God i bin mekem yumi ol tul long ol han blong hem blong mekem bigfala wok blong hem i hapen” (Alma 26:1, 3).

I Kamaot long Ol Skripja

Matiu 22:37–40; Luk 10:29–37; Alma 26:1–4; luk long Doctrine and Covenants 82:18–19

I Kamaot long Histri blong Yumi

Long ol fas yia blong Jos, membasip i smol mo i bin stap long wan ples nomo. Ol memba oli save ansa kwiktaem taem wan i stap long nid. Tedei, membasip blong yumi i ova 14 milian mo i go long evri ples long wol. Visiting tijing i pat blong plan blong Lod blong givim help long evri pikinini blong Hem.

“Wan sistem ia nomo i save givim help mo givim kamfot truaot wan jos we i bigwan olsem, long wan wol we i gat fulap samting, hem i tru long wanwan wokman we i stap kolosap long ol pipol we oli stap long nid,” Presiden Henri B. Aering, Fas Kaonsela long Fas Presidensi i talem.

“ … Evri bisop mo evri branj presiden oli gat wan Rilif Sosaeti presiden we oli save dipen long hem,” hem i gohed. “Hem i gat ol visiting tija, we oli save ol hadtaem mo ol nid blong evri sista. Hem i save, tru long olgeta, ol hat blong wanwan woman mo ol famle. Hem i save help long ol nid mo helpem bisop long koling blong hem blong fidim wanwan woman mo ol famle.”3

© 2012 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/11. Oli letem translesen: 6/11. Translesen blong Visiting Teaching Message, August 2012. Bislama. 10368 852

Ol Not

  1. Luk long Handbook 2: Administering the Church (2010), 9.5.1;9.6.2.

  2. Luk long Handbook 2,9.6.2.

  3. Henri B. Aering, insaed long Daughters in My Kingdom: The History and Work of Relief Society (2011), 110.

Wanem Mi Save Mekem?

  1. Mi stap yusum ol presen mo ol talen blong blesem ol narawan?

  2. Ol sista ia we mi stap lukaotem, oli save se bae mi glad blong helpem olgeta taem oli gat wan nid?