Mesaj Premye Prezidans lan, Out 2012
Apèl Sovè a pou Sèvi
Tout moun ki te etidye matematik konnen sa yon denominatè komen ye. Pou Sen Dènye Jou yo, gen yon denominatè komen ki makònen nou ansanm. Denominatè komen sa a se apèl nou chak resevwa pou nou ranpli tach nou nan wayòm Bondye a sou tè a.
Èske ou konn tonbe nan mimire lè w resevwa yon apèl? Oubyen èske w aksepte avèk rekonesans chak opòtinite pou sèvi frè w ak sè w yo, paske ou konnen Papa nou ki nan Syèl la ap beni moun Li aple yo?
Mwen espere ke nou pa p pèdi vrè objektif bèl okazyon nou jwenn pou nou sèvi yo. Objektif sa a, bi etènèl sa a, se menm sa Senyè a te pale a ke nou jwenn nan Pèl Gran Pri a: “Paske, gade, sa a se travay mwen ak laglwa mwen — pou m reyalize imòtalite ak lavi etènèl lòm.”1
Se pou nou toujou sonje ke manto manm nan Legliz Jezikri pou Sen Dènye Jou yo se pa yon manto konfò men se yon manto responsablite. Devwa nou, se pa sèlman pou n sove tèt nou, men pou nou gide lòt moun pou yo ale nan wayòm selès Bondye a tou.
Lè nou dispoze pou nou mache sou chemen sèvis Bondye a, nou pap janm nan pozisyon Kadinal Wolsey ki nan Shakespeare la. Lè li te pèdi pouvwa li apre li te fin pase vi l ap sèvi wa l la, li te kriye avèk tristès:
Si m te sèvi Bondye m nan avèk sèlman mwatye zèl
M te sèvi wa m nan, nan laj mwen ye a li pa t ap janm
kite m toutouni devan enmi m yo.2
Ki kalite sèvis syèl la mande? “Senyè a mande yon kè ak yon lespri byen dispoze; epi yon moun ki gen bon volonte epi ki obeyisan ap manje bon bagay ki nan peyi Siyon an nan dènye jou sa yo.”3
Mwen reflechi lè m panse ak pawòl Prezidan John Taylor (1808–87) yo: “Si nou pa mayifye apèl nou, Bondye ap mande nou kont pou moun nou te ka sove si nou te ranpli devwa nou yo.”4
Lavi Jezi lè l tap sèvi pami lèzòm te tankou yon pwojektè byen klere. Jezi te deklare “Mwen nan mitan nou tankou moun k ap sèvi a,”5 pandan l t ap geri moun ki te kokobe, fè avèg wè, fè moun soud tande, epi leve moun ki te mouri.
Avèk parabòl Bon Samariten an, Mèt la te anseye nou pou nou renmen pwochen nou menmjan nou renmen tèt nou.6 Avèk repons li te bay jenòm rich la, Li te anseye nou pou nou kite egoyis.7 Lè l te bay 5,000 moun yo manje a, Li te anseye nou pou nou chèche konn bezwen lòt moun.8 Epi avèk Diskou sou Mòn nan, Li te anseye nou pou nou chèche wayòm Bondye a an premye.9
Nan Nouvo Mond lan, Senyè resisite a te deklare: “Nou konnen ki bagay nou dwe fè nan legliz mwen an; paske nou dwe fè zèv nou te wè m fè yo, paske se sa nou te wè m fè, nou dwe fè.”10
Nou beni lòt moun lè nou sèvi selon egzanp “Jezi Nazarèt la … ki tap mache fè byen.”11 Bondye ba nou benediksyon pou nou jwenn lajwa nan sèvi Papa nou ki nan Syèl la pandan n ap sèvi pitit Li yo sou tè a.
© 2012 pa Intellectual Reserve, Inc. Tout dwa rezève. Enprime nan Etazini Damerik. Apwobasyon anglè: 6/11. Apwobasyon tradiksyon: 6/11. Tradiksyon First Presidency Message, August 2012. Haitian Creole. 10368 036
Ansèyman Ki Soti nan Mesaj Sa a
”[Senyè a] pap kite nou echwe si nou fè pati pa nou an. L ap mayifye nou menm odela talan nou ak kapasite nou. … Se youn nan pi bèl eksperyans yon kretyen vivan kapab fè” (Ezra Taft Benson, nan Ansèyman, pa gen pi gwo apèl [1999], 20). Panse pou ou pataje yon eksperyans kote ou menm oubyen yon moun ou konnen te santi ke Senyè a mayifye talan li ak kapasite li. Envite fanmi an pou pataje kèk nan eksperyans pozitif pa yo lè yo te reponn ak “apèl pou sèvi Senyè a te ba yo.”