Ennaan eo an Būreejtōnji eo Kein Kajuon, O̧kwōj 2012
Kūr eo an Rilo̧mo̧o̧r n̄an Jerbal
Aolep ro raar ekkatak kōn bōnbōn rejeļā ta eo common denominator. N̄an Armej ro Rekwojarjar ilo Raan-ko Āliktata, ewōr juon unin kōnono eo ej lukōj kōj ippān doon. Unin kōnono in ej kūr eo kajjojo iaad ej bōke n̄an kakūrm̧ool ijjitōn ko ilo aelōn̄ in kiin̄ eo an Anij ioon laļ in.
Em̧ōj ke ami en̄jake bōd kōn ellotaan n̄e juon kūr ej iwōj n̄an kom̧? Ak kom̧ij ke bōk kam̧oolol kajjojo iien em̧m̧an n̄an jerbal n̄an ro jeimi im jatimi, jeļā bwe Jemedwōj Ilan̄ enaaj kōjeram̧m̧an ro me Ej kūri?
Ij kōjatdikdik bwe jeban jerwaane lukkuun unin kōttōpar eo an iien ko ad rem̧m̧an aorōk n̄an jerbal. Kōttōpar eo, menin kōttōpar indeeo, ejja āinwōt ke kar kōnono kake jān Irooj im loe ilo Pearl of Great Price: Jemedwōj Ilan̄ eaar kwaļo̧k bwe jerbal im aiboojoj eo An—ej n̄an bōktok mour jab wabanban im mour indeeo an armej.1
Kōm̧m̧an bwe jān indeeo kememej bwe jerbal eo an membōr ilo Kabun̄ eo an Jisōs Kraist im Armej ro Rekwojarjar ilo Raan-ko Āliktata ejjab juon kein kaenōm̧m̧an ak ej juon jāljel in eddo. Jerbal eo ad, ilo kakobaba ļo̧k n̄an lo̧mo̧o̧ren kōj make, ej n̄an tōl ro jet n̄an aelōn̄ in jeļejtōļ an Anij.
Kōn kōņaan etetal ilo iaļ in jerbal eo an Anij, jeban ļo̧k n̄an jidik pād ilo jekjek eo an Cardinal Wolsey ilo Shakespear. An kar jako kajoor eo an ālkin juon mour in jerbal in jipan̄ n̄an kiin̄ eo an, eaar liājļōļ ilo būrom̧ōj:
Eļan̄n̄e Iaar jerbal wōt n̄an aō Anij kōn jimettan wōt itok limo
Iaar jerbal n̄an aō kiin̄, Eban kar āinwōt n̄e eaar rūtto in wōt n̄a
Kar likūt eō kelwaan n̄an rikōjdet ro aō.2
Jerbal in jipan̄ rōt eo lan̄ ej aikuji? Irooj, kōn Rikanaan Joseph Smith, kar ba bwe Eaar aikuji bōro im ļōmņak eo em̧ōņōņō im bwe eo em̧ōņōņō im pokake enaaj m̧ōn̄ā em̧m̧an in āne in Zaion ilo raan ko āliktata.3
Ij bōjrak n̄e Ij ļōmņak kōn naan ko an Būreejtōn John Taylor (1808-87): “Eļan̄n̄e kom̧ij jab kōļapļo̧k kūr ko ami, Anij enaaj ņa ruwōm̧ kōn ro me kom̧ maron̄ kar lo̧mo̧o̧ren er eļan̄n̄e kom̧ kar kōm̧m̧ane jerbal eo ami.”4
Āinwōt juon tōm̧a in kappok eo em̧m̧an an meram ej mour eo an Jisōs ke Eaar kwaļo̧k ilubwilijin armej ro. “A N̄a Ij pād ippemi āinwōt eo ej jerbal,”5 Jisōs eaar kwaļo̧k ke Eaar bōktok kajoor n̄an makoj ko an riajukuukuk, loļo̧kjeņ n̄an mejān ripilo, ron̄ļokjeņ n̄an lojiln̄in rijaron̄ron̄, im mour n̄an ānbwiin an rimej.
Kōn būrabōļ eo an RiSamadia eo em̧m̧an, M̧aajta eo eaar katakin kōj n̄an iakwe ro rutūrir āinwōt kōj make.6 Kōn uwaak eo An n̄an rim̧weie eo edik, Eaar katakin kōj n̄an joļo̧k ad ļōmņak kōn kōj make.7 Kōn najdik 5,000, Eaar katakin kōj n̄an lale aikuj ko an ro jet.8 Im kōn Kwaļo̧k eo ilo Toļ eo, Eaar katakin kōj n̄an pukōt m̧okta aelōn̄ in kiin̄ eo an Anij.9
Ilo Laļ eo Ekāāl, jerkakpeje Irooj eaar kwaļo̧k, “kom̧ jeļā men ko kom̧ij aikuj kōm̧m̧an ilo kabun̄ eo Aō; bwe jerbal ko kom̧ ar lo Aō kōm̧m̧an i kom̧ naaj barāinwōt kōm̧m̧an i.”10
Jej kōjeram̧m̧an ro jet ilo ad jerbal ilo aelorlor eo an “Jisōs ri Nazeret … Eo ej etetal im kōm̧m̧an em̧m̧an.”11 Anij ej kōjeram̧m̧an kōj n̄an pukōt lan̄lōn̄ ilo jerbal n̄an Jemedwōj ilo Lan̄ ilo ad jerbal n̄an ajri ro Nejin ioon laļ in.
© 2012 jen Intellectual Reserve, Inc. Aolep jim̧we rej pād ippān. Kar jeje ilo Amedka. Kōmālim ilo kajin English: 6/11. Kōmālim ukook eo: 6/11. Ukook eo an First Presidency Message, August 2012. Marshallese. 10368 874
Katakin jān Ennaan In
“[Irooj] ej jamin naaj kōtļo̧k bwe jān likjab eļan̄n̄e jej kōm̧m̧ane ijo kuņaad. Enaaj kōmaron̄ ļo̧k kōj eļapļo̧k jān tōļan im maron̄ ko ad make. … Ej juon iaan en̄jake ko rem̧m̧an tata me emaron̄ itok n̄an juon armej” (Ezra Taft Benson, in Teaching, No Greater Call [1999], 20). Ļōmņak in kwaļo̧k juon en̄jake n̄e kwe ak jabdewōt kwojeļā kajien me eaar en̄jake an Irooj kar kōļapļo̧k tōļan im maron̄ ko an. Karuwaineneik baam̧le eo n̄an kwaļok jet iaan en̄jake ko aer rem̧m̧an ilo aer kar uwaak e “kūr eo an Rilo̧mo̧o̧r n̄an jerbar.”