Iren Mahsen en Presidensi Keieu, Oakos 2012
Sapwellimen Sounkomouro Malipilip en Papah
Koaros me kasukuhlkihier wahntuhke wehwehki dahkot common denominator de nempe me kin anahne duwepenehte rehn nempe riau pwe ren kak dokpene nan wahntuhkeo. Ong Souleng en Imwin Rahn Akan, mie mehkot me kitail koaros ahniki me kin kolkitailpene. Met iei malipilip me emenemen kitail kin alehdi pwehn alehda pwukoa kan nan Sapwellimen Koht wehi pohn sampah.
Komw kin iang dipikihda lokaia tohtohki ni ansou me malipilip kin kohdohng komwi? De komw kin alehda ni kalahngan ansou mwahu koaros en papah riomw ohl oh lih akan, ni omw kin wehwehki me Samatail Nanleng pahn ketin kapaiada koaros me E ketin malipe?
I koapwoaroapwoariki me kitail sohte pahn katiasang kahrepe keieu en atail ansou mwahu kesempwal kan en papah. Kahrepe wo, kahrepe poatoapoato, duwehte me Kauno mahsanih oh me sansal nan Pearl of Great Price. Sahm Nanleng mahsanih me sapwellime doadoahk oh klohri—iei en kapwaiada mour poatoapoat oh mour soutuk en aramas.1
Kitail en kin tamataman me en alehda wia tohn Mwomwohdiso en Sises Krais en Souleng en Imwin Rahn Akan sohte wehwehki en nsinsenamwahu ahpw e wia pwukoa ehu. Atail pwukoa, me patehng en pein kamourala pein kitail, iei en kahluwa aramas teikan ong nan wehi celestial en Koht.
Ni atail pahn pein inengieng kekeid nan ahl en papah Koht, kitail sohte pahn kak duwehla Cardinal Wolsey me sansal sang Shakespeare. Ni ah manaman eh pwokpwokasang mwurin eh papah nanmwarkio erein eh mour, e ahpw pahtoula oh kahski:
Ma I kin papahkihte ahi Koht elep en ngoang me
I papahki ahi nanmwarkio, E sohte pahn nan ahi sounpar wet
Ketkihiengie en kilisou mwohn ahi imwintihti kan.2
Soangen papah dah me anahn ong nanleng? Kauno, sang rehn soukohp Joseph Smith mahsanih me e kupwurki mohngiong oh madamadau me peik oh me ihr me peik oh opampap pahn tungoale me mwahu kan en Zion nan imwin rahn akan.3
I kin uhdi mahs ni ei kin medewehda lepin mahsen kan en President John Taylor (1808–87): “Ma ke sohte kapwaiada mwahu ahmw pwukoa malipilip kan, Koht pahn kepwukoahkinuhk irail koaros me ke mwein kakete kapitala ma ke uhdahn wiahda ahmw pwukoa.”4
Mour en Sises ni eh ketin kalohk rehn aramas duwehte dengki linglingan me kin serehda me mwahu. “Ngehi I kin mihmi rehmwail duwehte papah men,”5 Sises mahsanih ni ansou me E ketkihieng me mwator roson, me masukun en kilang wasa, me salengepon en rong wasa, oh mour ong me melahr akan.
Nan karasaras en ohlen Sameria mwahuo, Kauno ketin padahkiong kitail en poakohng mehn mpatail kan duwehte pein kitail.6 Nan Sapwellime pasapeng ong mwahnakapw kepwehpweo, E ketin padahkiong kitail en pwilikihdi atail mehwo.7 Ni Eh ketin kamwenge meh 5,000, E ketin padahkiong kitail en pohnese anahn en mehteikan.8 Oh nan Kapahrek en pohn Dohlo, E ketin padahkiong kitail en rapahki mahs wehin Koht.9
Nan Sampah Kapw de America, Kaun kaiasadahro ketin mahsanih, “Kumwail kin ese mehkan me kumwail en wiahda ei mwomwohdiso; pwe kumwail en pil wiahda doahngkan me kumwail kilang I wiahier; pwe me kumwail kilangehr I wia iei me kumwail en kin wia.”10
Kitail kin kapaiada mehteikan ni atail kin wie papah pahn edin “Sises mehn Nasaret … e ketiseli wasa koaros, ketin wiahda me mwahu.”11 Koht en ketin kapaikitailda en diar peren ni atail papah Samatail Nanleng ni atail pahn wie papah Sapwellime serihkan pohn sampah.
© 2012 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/11. Kamanaman ong kawehwe: 6/11. Kawehwehpen First Presidency Message, August 2012. Pohnpeian. 10368 885
Padapadahk sang Iren Mahsen Wet
“[Kauno] sohte pahn ketin mweidohng kitail en sohte pweida ma kitail pahn wia atail pali. E pahn ketin kakehlailihkitailda daulih pein atail koahiek oh kak koaros. … Met wia ehu irair kesempwal me kin kak lelohng aramas men” (Ezra Taft Benson, nan Teaching, No Greater Call [1999], 20). Medewe ehukihda ehu irair me komw lelohng ni ansou me komwi de emen me komw ese kehnehr duwen Kauno ah ketin kalaudehla ah koahiek oh dahme e kak kapwaiada. Luke peneineio en ehukihda ekei irair mwahu kan me re pein lelohngehr ni arail kin mwekidki “Sapwellimen Sounkomouro malipilip en papah.”