2012
Mwekmwekid nan Ansoun Anahn
August 2012

Iren Mahsen en Padahk en Pas, Oakos 2012

Mwekmwekid nan Ansoun Anahn

Onopiki ni kapakap iren mahsen wet oh, ni eh pahn konehng, koasoaiahkihieng lih akan me komw kin pwarek. Doadoahngki peidek kan pwehn seweseikomwi kakehlailih riomw lih akan oh pwehn elehieng Pwihn en Sawas en Lih en wiahla pali kesempwal en pein ahmw mour.

Kilel en Pwihn en Sawas en Lih

Pwoson, Peneinei, Sawas

Ni duwen sounpadahk kan en pas, ehu atail pwukoa keieu kesempwal iei en sawas kakehlailih peneinei kan oh ni ihmw. Lih akan me kitail kin pwarek konehng en kak nda, “Ma I tungoaleniki kahpwal, I ese me ahi sounpadahk en pas kan pahn kin sawas mwohn ahi pahn peki.” Pwehn papah, kitail ahniki pwukoa en kasawiada anahn akan en riatail lih akan me kitail kin pwarek. Ni atail kin rapahki kamarain, kitail pahn ese duwen apwaliala anahn akan en pali ngehn oh paliwar en emenemen riatail lih akan me kitail pwukoahki pwarek. Eri, ni atail pahn doadoahngki atail ansou, soahng kan me kitail mai en wia, koahiek kapai kan, kapakap kan en pwoson, oh sawas en pali ngehn oh pali me pid pepehm, kitail kak sawaskihda sawas en limpoak ni ansou en soumwahu, mehla, oh irair tohrohr teikan.1

Sang ni sawas en repwoht kan en sounpadahk kan en pas, presidensi en Pwihn en Sawas en Lih kin kilangada irail akan me tungoaleniki anahn tohrohr pwehki soumwahu en paliwar de pali en pepehm, anahn karuwaru, neitik, mehla, kahpwal en paliwar, loaloid, de kahpwal teikan. Kaun en Pwihn en Sawas en Lih eri kin uhd repwohtkihiong pisopo. Pahn kaweid en pisop, president en Pwihn en Sawas en Lih eri pahn koasoanehdi duwen kodahn sawas.2

Ni atail wia sounpadahk en pas kitail tungoaleniki kahrepe laud en peren pwehki kapai me pwilidier pohtail me iei me kitail wialahr dipwisoun doadoahk nin limen Koht pwehn kapwaiada doadoahk lap wet (Alma 26:1, 3).

Sang Pwuhk Sarawi Kan

Madiu 22:37–40; Luk 10:29–37; Alma 26:1–4; Doctrine and Covenants 82:18–19

Sang Atail Poadoapoad

Ni tepidahn Mwomwohdiso, towe kan malaulau oh re mihpene wasahtehkis. Towe kan kin kak mwadang sawas ni ansou me aramas emen kin anahne sawas. Rahn wet uwen tohtohn towe kan daulihier lopw pahrar oh re kousoan wasa koaros nan sampah. Padahk en pas wia kisehn sapwellimen Kauno koasoandi pwehn kihda sawas ong Sapwellime serihkan koaros.

“Koasoandi ehute me kak elehda kodahn sawas oh kaloalamwahu nan mwomwohdiso ehu me inenen laud nan sampah wet me wekpeseng laud wasa kan ie iei pahn sang rehn sounpapah kan me kin karanih aramas me anahne sawas,” President Henry B. Eyring, Sounsawas Keieu nan Presidensi Keieu mahsanih.

“… Pisop koaros oh president en prans koaros tungoaleniki emen president en Pwihn en Sawas en Lih pwehn kin koapwoaroapwoariki,” e doula. “President en Pwihn en Sawas en Lih tungoaleniki sounpadahk en pas akan, me wehwehki kahpwal oh anahn akan en lih koaros. Pwehki sounpadahk kan, e kak wehwehki mohngiong en emenemen oh peneinei kan. E kak apwaliala anahn akan oh sewese pisopo nan ah tungoal malipilip en apwalih keirdahn emenemen oh peneinei kan.”3

© 2012 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/11. Kamanaman ong kawehwe: 6/11. Kawehwehpen Visiting Teaching Message, August 2012. Pohnpeian. 10368 885

Iren Sawas Akan

  1. Tehk Handbook 2: Administering the Church (2010), 9.5.1; 9.6.2.

  2. Tehk Handbook 2,9.6.2.

  3. Henry B. Eyring, nan Daughters in My Kingdom: The History and Work of Relief Society (2011), 110.

Dahme I Kak Wia?

  1. Mehlel me I kin wie doadoahngki kisakis kan oh koahiek kan me kohieng ie pwehn kapaiada mehteikan?

  2. Riei lih akan me I kin tetehk kin ese me I kupwurki sewese irail ni ansou me mie arail anahn?