Rongorongon Reirei ni Kakawari, Aokati 2012

Karaoan te Mwakuri n Tain te Kainano

Tataro mwaaka ni kamatebwaia te bwai n reirei aei, n arona ae riai, maroroakinna ma aine ake ko kawariia. Kabonganai titiraki bwa a na buokiko ni kakorakoraia aine ao ni karaoa te Bootaki n Aine bwa iteran maium ae kakawaki.

Onimaki, Utu, Buoka

Ngkai ngaira taan kakawara te mweenga, teuana aan ara kakawari aio bon buokan kakorakoran te utu ao te mweenga. Aine ake ti kawariia a na riai ni kona n taekina, “Ngkana iai au kangaanga, I ataia bwa taan kakawara te mweenga a na buokai n aki tataninga titirakinaia.” Bwa ti aonga ni mwakuri, iai tabera bwa ti na ata kainanoia aine ake ti kawariia. Ngkana ti ukoukora te kairi ma ieta, ti na ataia bwa ti na kangaa ni kaeka kainanoia n tamnei ao n rabwata aine ake ti katabeaki bwa ti na kawariia. Imwiina, ni kamanena ara tai, rabakaura, tarena, tataro n onimaki, ao te boutoka ibukin te tamnei ao te namakin, ti kona n ibuobuoki n anga te mwakuri n rainanoanga inanon tain te aoraki, te mate, ao taai aika onoti.¹

Rinanon aia ibuobuoki ribooti mairouia taan kakawara te mweenga, te beretitentii n te Bootaki n Aine e na kinaia ake iai kainanoia aika onoti ibukin aorakiia n rabwataia ke n aia namakin, kabuanibwai aika karina, bung, mate, toaraaia, maroaaia, ke kakaewenako riki tabeua. Te Beretitenti man te Bootaki n Aine ngkanne e na ribootina ana kukune nakon te bitiobi. Iaan ana kairiiri te bitiobi, ngaia e na ibuobuoki n tararua.²

Ngkai taan kakawari mweenga ngaira ti kona ni iai “mwaitira bukin … ni kimareirei” ibukin te kakabwaia are e a tia ni katokaaki iaora, bwa ti a tia ni karikaki bwa bwainimwakuri inanon bain te Atua ni kakoroa bukin te mwakuri ae kakannato aio” (Aramwa 26:1, 3).

Man Koroboki aika tabu

Mataio 22:37‒40; Ruka 10:29‒37; Aramwa 26:1‒4; Doctrine ao Covenants 82:18‒19

Man Ara Rongorongo ni Kawai

Inanon ana moan ririki te Ekaretia, kaain te aro e uarereke ao a bootaki n te tabo ae ti teuana. Membwa a kona n ibuobuoki n te aro ae tawe ngkana iai ae kainnano. N te bong aio mwaitiia membwa e raka iaon 14 te mirion ao e maenako ni kabuta te aonaaba. Te kakawari n reirei bon mwakoron ana babaire te Uea ni karekea te ibuobuoki ibukiia Natina ni kabane.

“Ti te tititem are e kona ni karekea te buoka ao te karaunano ni kabuta te ekaretia ae e rangi ni bubura n te aonaaba ae e rangi ni bati arona e na reke irouia taan beku ake a kaan ma te aomata are e kainnano,” e taku Beretitenti Henry B. Eyring, te Moan Kauntira n te Moan Beretitentii.

“… N tatabemaniia nako bitiobi ao beretitenti n te mwaanga iai aia beretitenti n te Bootaki n Aine ni katan iaana,” e reitia. “Iai ana taan kakawara te mweenga, ake a atai kakatai ao kainnanoia aine n tatabemaniia nako. E kona, rinanoia, n atai nanoia n tatabemaniia nako ao n utu. E kona ni katokii kainnano ao ni buoka te bitiobi n ana wewete ni karikirakeia aomata ao utu.”³

© 2012 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki i USA.Kariaiakaki n te Ingiriti: 6/11. Kariaiakaki rairana: 6/11. Rairakin te Visiting Teaching Message, August 2012. Kiribati. 10368 859

Tera ae I Kona ni Karaoia?

I kamanenai au bwaintangira ao taarena ni kakabwaiaia tabeman?
A ataia aine ake I tararuaia bwa I tauraoi ni buokiia ngkana iai kainnanoia?