Mensahe sa Visiting Teaching, Agosto 2012

Pag-aksyon sa Tion sang Panginahanglan

Tun-i ining materyal sing mainampuon kag, kon nagakabagay, hambali ini upod sang mga sisters nga inyo ginabisita. Gamita ang mga pamangkot agud buligan kamo sa pagpabakod sang inyo mga sisters kag himuon ang Relief Society nga aktibo nga bahin sang inyo mismo kabuhi.

Pagtuo, Pamilya, Bulig

Bilang mga visiting teachers, isa sang aton mga katuyuan amo ang pagpabakod sang mga panimalay kag mga puluy-an. Ang mga sisters nga aton ginabisita dapat makasiling, “Kon may mga problema ako, nakahibalo ako nga ang akon mga visiting teachers magabulig sa akon nga indi na kinahanglan nga hambalon pa.” Agud nga makaalagad, may responsibilidad kita nga mahisayran ang mga panginahanglan sang mga sisters nga aton ginabisita. Kon mangayo kita sing inspirasyon, aton mahibal-an kon paano magsabat sa espiritwal kag temporal nga mga panginahanglan sang tagsa ka sister nga gintakay sa aton nga bisitahan. Dayon, nga nagagamit sang aton tion, mga abilidad, mga talento, mga pangamuyo sang pagtuo, kag espiritwal kag emosyunal nga suporta, sarang kita makabulig hatag sing maluluy-on nga pag-alagad sa mga tinion sang balatian, kamatayon, kag iban pa nga pinasahi nga mga sirkumstansya.¹

Sa bulig sang mga report gikan sa mga visiting teachers, ang panguluhan sang Relief Society nagakilala sa sinang may mga pinasahi nga mga panginahanglan tungod sang pisikal kag emosyunal nga mga balatian, mga emerhensya, mga pagpanganak, mga kamatayon, kasablagan (sa lawas), pagbatyag sing kapung-aw, ukon iban pa nga mga hangkat. Dayon ang pangulo sang Relief Society nagareport sang iya mga natukiban sa bishop. Sa idalom sang iya pagbulut-an, sia [ang pangulo sang Relief Society] magapatigayon sing bulig.²

Bilang mga visiting teachers sarang kita makaangkon sang “dako nga kabangdanan … nga magkasadya” bangud sang “bugay nga ginhatag sa aton, nga ginhimo kita nga mga galamiton sa mga kamot sang Dios sa paghuman sining dako nga buluhaton” (Alma 26:1, 3).

Gikan sa Balaan nga mga Kasulatan

Mateo 22:37–40; Lucas 10:29–37; Alma 26:1–4; Doctrine and Covenants 82:18–19

Gikan sa Aton Kasaysayan

Sang damlag pa nga mga tinuig sang Simbahan, ang mga miyembro diutay pa lang kag natingob. Ang mga miyembro makaresponde sa gilayon kon may yara sang nagakinahanglan. Sa karon ang aton mga miyembro masobra na 14 ka milyon kag nagalinapta sa bilog nga kalibutan. Ang visiting teaching kabahin sa plano sang Ginuo agud magpatigayon sing bulig para sa tanan Niya nga mga kabataan.

“Ang nagaisahanon nga sistema nga sarang makahatag sing bulig kag kaumpawan sa kabug-osan sang isa ka simbahan nga tuman kadako sa isa ka kalibutan nga tuman katuhay amo ang paagi sa indibidwal nga mga alagad nga malapit sa mga tawo nga nagakinahanglan,” siling ni Pangulong Henry B. Eyring, Unang Manuglaygay sa Unang Panguluhan.

“… Ang tagsa ka bishop kag tagsa ka pangulo sang branch may yara sang isa ka pangulo sang Relief Society nga masandigan,” padayon niya. “May yara sia sing mga visiting teachers, nga nakahibalo sang mga pagtilaw kag mga panginahanglan sang tagsa ka sister. Paagi sa ila, sarang niya mahibal-an ang mga tagipusuon sang mga indibidwal kag mga panimalay. Sarang niya masabat ang mga panginahanglan kag mabuligan ang bishop sa iya panawagan nga atipanon ang mga indibidwal kag mga panimalay.”³

© 2012 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/11. Petsa sang pagtugot sa paglubad: 6/11. Paglubad sang Visiting Teaching Message, August 2012. Hiligaynon. 10368 861

Ano ang Sarang Ko Mahimo?

Ginagamit ko bala ang akon mga dulot kag mga talento sa pagbugay sa iban?
Ang mga sisters bala nga akon ginabantayan nakahibalo nga handa ako sa pagbulig sa ila kon kinahanglan nila?