Mulwol ni Ngan Fil ni Ngan Nang, August 2012

Mu Mithmith ko Ngiyal’ nib Tu’uf

Mu fil e re n’ey, ma rogon nib mangil, mag weliy ko boech e walagey nib ppin ni gabe guy. Mu murwel ko pi duwer ni nge ayuweg nem ni nge gel nag e pi walagem nib ppin man fal’eg fare Relief Society e bang ko yafas rom nib mangil.

Mich, Tabinaew, Ayuw

Gadad ni cha’ nima yani nang salpen be’, e reb fa dad e ngad ayuw gaed ni ngad pi’yed gelngin e tabinaew. Pi walagdaed nib ppin ni gamad ma yani guy e thingari yog ni nge ga’ar, “Fa’anra bay e magawon, ma gumanang e pi cha’ nima yani nang salpen be’ ni ra pi e ayuw ni dar ma soen ni ngan fith.” Ra ngan pigpig, ma ngeyog e tin nib mil fan ngodad ni ngad nanged e tin nib tu’uf ko pi sister ni gadad be guy. Napan ni gadad ra gay e gonop, ma gadad ra nang rogon ni ngad mithmith gaed ko tin nib tu’uf ko pi sister ni kan pi’ dad ngoraed ni ngad guyed. Me arame, gadad murwel ko taym rodad, pin’en ni gadad be cheg riy, tin ni gadad be salap riy, meybil u fithik e mich, nge ayuw u fithik e yul’yul’, rayog ni ngad pi’yed e ayuw nib mangil napan e ngiyal’ nike m’ar, ke yim’, nge kuboech e magawon.¹

U fithik e ayuw ko pi report ko pi cha’ nima yani nang salpen be’, fare Relief Society presidency e ma yog e picha’an nib tu’uf e ayuw roraed ya bachane ke m’ar fa ke magawon, nge pi n’en nib tu’uf nib machrag, gargel, yam’, sam’arm’ar, yigo’ ir, nge kuboech e magawon. Me aram me yoeg fare president ko Relief Society e picha’an nike pir’eg ngak fare bisof. N’en nike yoeg, ma ir e ma yarmeg e ayuw.²

Cha’ nima yani nang salpen be’ e rayog ni ngeyog e “rin ga’fan … ni ngad falfalen’ gaed” ya bachane “tawa’ath ni kan gagyeg nag nga dakeandaed, ni nge yog ni ngad manged talin e muruwel u pa’ Got ni ngad mugu’uliyed e re muruwel ney ni th’abi fel’” (Alma 26:1, 3).

Ko fapi Chep nib Thothup

Matthew 22:37–40; Luke 10:29–37; Alma 26:1–4; Doctrine and Covenants 82:18–19

Chippin Rodad

Napan kafram u Galasia, ma boch’uw e gidii’ ma ta’abang e gin ni bay riy. Pi memba e rayog ni ngar mithmith gaed nib papey napan nib tu’uf e ayuw rok bee’. Urngin e memba e daba’ e pag e 14 million ma ke garer u dakean e fayleng. Visiting Teaching e bang ko tunom rok Somoel ni nge pi’ e ayuw ni fan ko gubin e pi Fak.

“Ra system ni kemus ni rayog ni nge pi’ e ayuw nge gapas ko gubin e galasia ni gathi bachig u fayleng nib thilthil e dakean e pi tapigpig nib chuchgur ngak e gidii’ nib tu’uf e ayuw rok,” e ke yoeg President Henry B. Eyring, Bin Somm’on e Counselor u lane Bin Somm’on e Presidency.

“… Gubin e bisof nge gubin e branch president ma bay e president ko Relief Society ni yibe pagan’ ngak,” “Bay e pi cha’ nima yani nang salpen be’, ni yaed manang e magawon nge tin nib tu’uf ko gubin e pi walagdaed nib ppin. Rayog, u dakean raed, me nang gumircha’en e gidii’ nge pi tabinaew. Rayog ni nge guy e tin nib tu’uf me ayuweg fare bisof ko call rok ni ngan duruw’iy e gidii’ nge pi tabinaew.”³

© 2012 ko Intellectual Reserve, Inc. Gubin ni mat’won ma bay. Nni yoloy u Mariken. Kan micheg nag ko thin nu Ngalis: 6/11. Micheg nag i pilyeg: 6/11. Pilyeg ko Visiting Teaching Message, August 2012. Yapese. 10368 905

Mange Rayog Nggu Rin?

Gube murwel ko pi tawa’ath rog nge tin ni gub cheg riy ni ninge fal’eg wa’athan boech e gidii’?
Manang fapi walagdaed nib ppin ni guma guy e manang ni gu ba adag ni ngug ayuweg raed napan nib tu’uf e ayuw roraed?