Poraus seni ewe Aewin Presetensi, September 2012
Aeafengen ewe Kapas Allim Netip ngeni Netip
Kot epwe emweni aramas mi monnota won anen Noun kewe chon angang mi monnota pwe ra mochen aea fengeni ewe kapas allim. Ena mettoch a fis non pwisin manauom. Fan fitu a anongonong won ammonatan tupuwom me netipom.
A wor emon chienei a iotek iteitan ran ne churi emon mi ammonata ne angei ewe kapas allim. A uwei echo Puken Mormon. Pwinin me mwen an epwe ekkis sai, a finata pwe esap uwei echo puk nge epwe uwei echo taropwen poraus. Nge nupwen a ammonata an epwene sai, a mefi ekkis pwarata: “Kopwe uwei echo Puken Mormon reom.” A wanong echo non an we chota.
Nupwen emon fefin a sinei a mommot arap ngeni won ewe sai, a ekieki, “Iei ewe emon?” Ewe fefin a fiti sefan won ar sai ne niwinno. A ekieki, “Ifa usun upwe poraus usun ewe kapas allim?”
Nge, ewe fefin a apasa ngeni, “Oua moni asoren eu ne engon ngeni om we mwichefen, ika met?” A apasa pwe ewer. A apasa pwe ita epwe moni asoren eu ne engon ngeni an we mwichefen nge ese fori. Mwirin a kapas eis, “Met ka tongeni ereniei usun ewe Puken Mormon?”
A awewe pwe ewe puk mi pukfel, pwan eu kapasen pwarat usun Jises Kraist, mi chiakuni me ren ewe Soufos Joseph Smith. A usun pwe a mochen kaeo, iwe a eitanong poun we me non an we chota me a apasa, “Ua angei pwarata ne uwei ei puk rei. Ai nuku kopwe nouni.”
A poputa ne anneani. Nupwen ra mufesen, a apasa, “Kich sipwap poraus usun ei.”
Met chienei we ese tongeni sinei—nge met Kot a sinei—pwe a kukutta eu mwichefen. Kot a sinei pwe a katon chienei me a ekieki pwata an we mwichefen a apwapwaiti i. Kot a sinei pwe epwe kapas eis usun ewe Puken Mormon me epwe mochen kaeo me ren ekkewe misineri. A ammonata. Iwe pwan chienei. Kich sia tongeni pwan ammonata.
Ewe ammonata mi namwot ina non tupuwach me netipach. Ewe fefin a rongorong me a chechemeni kapas usun ewe Puken Mormon, an ewe Samon we Mwichefen mi niwinsefanito, me ewe annuk ne asorano eu ne engon ngeni Kot. Me a mefi poputan ewe pwaratan ennet non netipan.
Ewe Samon a apasa pwe Epwe pwarata ennet ngeni tupuwach me netipach me ren ewe Ngun mi Fel (nengeni D&C 8:2). Napengeni ekkewe aramas oua churi repwe fen weri poputan ar ammonata. Ra rongorong are anneani usun Kot me An kapas. Ika netiper mi pwetete, ra mefi, ina mo ika mi chok ekkis, pungochun ennet.
Ewe fefin a monnota. Iwe pwan chienei, ewe Souneng ion mi kaeo ewe Puken Mormon. A mefi eu pwarata pwe mi ennet, me a esinna ewe emwen seni ewe Ngun mi Fel ne feino fan echo puk. A ammonata non tupuwan me non netipan.
Kot a ammonata aramas ne angei om kapasen pwaratan ennet mi niwinsefanito. A anamwota om nuku me mwirin om foffor ne aeafengen met a fakkun auchea ngonuk me ngeni ekkewe ir ka tongei.
Kopwe ammonata ne poporaus me ren om amasoua tupuwom iteitan ran ren ennetin ewe kapas allim. Nupwen ka anneasochisi ekkewe annuk me sufoniti om kewe pwon, kopwe mefi ewe kapasen pwaratan ewe Ngun mi Fel me pwan och tong seni ewe Chon Amanau fan itom me fan iten ekkewe ir ka churi.
Ika ka fori wisom, kopwe tufichin churi aramas ra ammonata ne rongorong om kapasen pwaratan ewe ennet—seni netip ngeni netip, seni netipom ngeni netiper.
© 2012 seni Intellectual Reserve, Inc. Meinisin pung mi kawor. A for non Merika. Kapungunon non fosun Merika: 6/11. Kapungunon chiakun: 6/11. Chiakun First Presidency Message, September 2012. Chuukese. 10369 901
Afanafan seni Ei Poraus
Kopwe ekiekin aneanifengen ewe poraus ren ewe famini me oupwe poraus usun ewe kinikin me mwen ewe saingon wokisin, minne Preseten Eyring a poraus usun napanapan apochokuna kapasen pwarata. Kopwe poraus fengen ren ewe famini usun auchean kapasen pwarata nupwen ka aporausa ewe kapas allim. Semirit me non ewe famini ra mefi pwe mi aninisoch ne sipai ifa usun repwe kapasen pwarata ngeni chieneir.