iTukutuku ni Mataveiliutaki Taumada, Sepiteba 2012
Me ka Vakayalo na Wasei ni Kosipeli
Ena biuta mai na Kalou na tamata era sa vakarau ena nodra sala o ira na Nona dauveiqaravi ka ra gadreva mera na wasea na kosipeli. Ko sa sotava oti na ka o ya ena nomu bula. Ena vakatau na kena yaco wasoma na nomu vakavakarau ena nomu vakasama kei na yalomu.
E dua tiko na noqu itokani ka dau masu ena veisiga me sotava e dua sa vakavakarau tiko me rogoca na kosipeli. E dau salavata voli ga kei na dua na nona iVola iMomani. Ni vo e dua na bogi me lako vakagade, sa navuca me sa na kua ni kauta na nona ilavelave, ia me sa na kauta mada ga e dua na kadi soli. Ia, ni sa vakarau me biubiu, sa vaka me vakila ni tukuni vua: “Kauta tiko na nomu iVola iMomani.” Sa qai biuta e dua ena nona kato.
Ni mai dabe e yasana e dua na marama ena gauna sa vodo yani kina, e vakataroga e lomana, “Sa o koya beka oqo?” Ena gauna e lesu mai kina erau a vodo vata lesu tale mai. A vakananuma e lomana, “Meu kauta cake vakacava mai na kosipeli?”
Ia, a qai taroga mai na marama, “O iko o dau saumi ikatini ena nomu lotu?” A kaya ni vaka dina kina. Tukuna o koya ni dodonu me saumi ikatini ena nona lotu qai mani sega. Oti sa qai taroga, “Na cava e rawa ni ko tukuna vei au baleta na iVola iMomani?”
A vakamacalataka ni ivola oqo e ivolanikalou, e dua tale na ivakadinadina kei Jisu Karisito, ka vakadewataka na Parofita o Josefa Simici. A taleitaka sara o koya, sa qai tatara yani kina nona kato ka kaya, “Au a vakauqeti meu kauta tiko mai na ivola oqo. Au nanuma niu kauta tiko mai me nomu.”
Sa tekivu wiliwili sara o koya. Ni rau sa laki veitalatala,, sa kaya sara na marama, “Daru na qai veitalanoataka tale vakamalua na ka oqo.”
Na ka e sega ni kila o noqu itokani—ia na Kalou ga sa kila—ni o koya na marama sa vaqara tiko mai e dua na lotu. Sa kila tu na Kalou ni o koya sa vakaraici koya tiko mai vakabalavu ka dau vakataroga tiko se cava e dau vakamarautaki koya tu ga kina na nona Lotu. Sa kila tu na Kalou ni o koya ena taroga na ivola iMomani ka sa tu vakarau me rau laki vakavulici koya na daukaulotu. Sa vakarau rawa tu o koya. Sa vakatalega kina o noqu itokani. O iko kei au e rawa talega ni daru vakarautaki vaka o ya.
Na vakavakarau ga e gadrevi me daru cakava me na caka ena nodaru vakasama kei na yalodaru. Na marama sa rogoca oti ka nanuma mai na vosa e tukuni ena iVola iMomani, na Lotu vakalesuimai ni Turaga, kei na ivakaro me saumi na ikatini vua na Kalou. Sa vakila o koya na itekitekivu ni kena vakadinadinataki na ka dina e yalona.
Tukuna na Turaga, ni o Koya ena vakatakila na ka dina ena noda vakasama kei na yaloda ena kaukauwa ni Yalo Tabu (raica na V&V 8:2). Ena levu sara na tamata o sotava e vaka o ya na itekitekivu ni nodra vakavakarau. Era a sa wilika beka se rogoca na Nona vosa na Kalou. Kevaka me sa malumalumu tu na yalodra, era sa na vakila, vakalailai sara, na kena ivakadinadina.
Sa vakarau tu na marama. Sa vaka talega kina o noqu itokani, na Yalododonu Edaidai ka a sa wilika tiko mai na iVola iMomani. Sa vakila o koya ni dina, ka sa rawa ni raica na veidusimaki ni Yalotabu me kauta tiko e dua na ilavelave. Sa vakarau tu o koya ena nona vakasama kei na yalona.
Sa vakarautaka tu na Kalou na tamata me ra ciqoma na nomu ivakadinadina ni dina sa vakalesuimai. O Koya ena gadreva na nomu dina kei na nomu cakacaka mo na wasea ka sega ni tabonaka, na veika o sa mai vakamareqeta kei ira o dau lomana.
Vakarau mo wasea ena nomu vakasinaita na nomu vakasama ena veisiga kei na veika dina ni kosipeli. Ni ko sa talairawarawa kina ivunau ka dinata na nomu veiyalayalati, ko na qai vakila na ivakadinadina ni Yalotabu, ka sa na levu cake na nona lomani iko na iVakabula kei ira o dau lomana.
Ni ko sa vakayacora ga na nomu itavi, sa na tekivu mo sotava na kamikamica ni sotavi ira na tamata era sa vakarau tu mera rogoca na nomu ivakadinadina—ni wasei mai na yalo kina yalo, mai yalomu ki yalodra.
© 2012 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/11. Vakadonui me vakadewa: 6/11. Vakadewa ni First Presidency Message, September 2012. Fijian. 10369 858
Veivakavulici mai na iTukutuku Oqo
Vakasamataka mo wilika na itukutuku kei ira na matavuvale ka veivosakitaka na ikarua ni iotioti ni parakaravu, na vanua e tukuna kina o Peresitedi Eyring na sala ni kena vaqaqacotaki ni ivakadinadina. Veitalanoataka kei ira na matavuvale na bibi ni kena wasei na ivakadinadina ni wasei tiko na kosipeli. Era na raica na gone ena matavuvale ni na veivukei sara me vakatovotovotaki na icakacaka ni wasei ni ivakadinadina vei ira na itokani.