iVaqa ni Veisiko, Sepiteba 2012

Veika Uasivi e Gadrevi kei na Veiqaravi e Soli

Wilika ka masulaka na itukutuku oqo, ke gadrevi, mo veivosakitaka kei ira na marama o sikova. Vakayagataka na taro me vukei iko mo vaqaqacotaki ira kina na marama oqo me yaco na iSoqosoqo ni Veivukei me dua na tiki bulabula ni nomu bula vakai iko.

Vakabauta, Matavuvale, Veivukei

“Sa dau tu ga na veivuke era na gadreva na tani,” kaya o Peresitedi Thomas S. Monson, “ka sa na rawa meda cakava e dua na ka meda vukea kina e duatani tale. … Vakavo meda veiqaravi vagumatua vei ira na tani, ena sega soti ni vakaibalebale na noda bula.”¹

Ni da dauveisiko sa na rawa ni da na kilai ira vinaka cake sara na marama eda sikovi ira tiko. Na veiqaravi vei ira eda sikova ena muria ga mai na noda lomani ira dina sara (raica na Joni 13:34–35).

Eda na kila vakacava na veika era na gadreva ena nodra bula vakayago kei na bula vakayalo na marama, me rawa ni da na sotava na veika ena ganiti ira? Ni da dauveisiko, sa noda na ilesilesi meda na vakauqeti ka ciqoma na veivakayarayarataki ena noda dau masu baleti ira eda sikova tiko.

Sa ka bibi sara meda na dau veitaratara tikoga kei ira na marama oqo ena veigauna kece sara. Na veisiko yadudua, qiri ena talevoni, dua na ivola lekaleka sara, meli livaliva, dabe vata kei koya, dua na vosa ni veivakabekabei, dau kauwaitaki koya e valenilotu, sikovi koya ni tauvi mate, se gauna ni leqa, kei na veivuke tale eso, ena rawa ni na veivuke sara vakalevu ena noda dau veivakaukauwataki.²

Mera dau mai ripotetaka na dauveisiko na nodra bula o ira era sikovi, na ka era leqa tiko kina, kei na veivuke ena gadrevi mai vei ira. Na mataqali ripote vakaoqo kei na noda sa veiqaravi tiko vei ira na tacida ena vukei keda ena noda bula vakatisaipeli.³

Mai na iVolanikalou

Joni 10:14–16; 3 Nifai 17:7, 9; Moronai 6:3–4

Mai na Keda iTukutuku Makawa

Sa vaka me uto tu ni bula ni dauveisiko na veiqaravi vei ira na tani. Na veisiko ena veivula ena ulabaleta sara na inaki ni laki sikovi ira na marama. ena veigauna. Ena dau bibi toka na noda kauwai.

“Sa noqu gagadre meu kerekere vei kemuni na marama mo ni kakua soti ni taqayataka e dua na talevoni se veisiko vakatikina ena dua na vula,” kaya o Mary Ellen Smoot, na ika 13 ni peresitedi raraba ni iSoqosoqo ni Veivukei. O koya a kerea vei keda “meda vakanamata ga kina karoni ni yalo vakayadua.”⁴

E a vakavulica o Peresitedi Spencer W. Kimball (1895–1985), “Sa ka bibi sara meda dau veiqaravi ena matanitu.” Ia, e qai raica ni sega ni sa lelevu kecega na veiqaravi e dau vakayacori. “Ena levu sara na gauna, na veiqaravi eda cakava sa ikoya ga na veika lailai eda tuvakarau meda solia, … veivuke ena veika lalai sara,” e a kaya o koya, “ia na mataqali veivuke cava e na lako mai … ena veika lailai e dau nakiti me qaravi!”⁵

© 2012 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/11. Vakadonui me vakadewa: 6/11. Vakadewa ni Visiting Teaching Message, September 2012. Fijian. 10369 858