Mesaj Premye Prezidans, Septanm 2012
Pataje levanjil la
Bondye ap mete moun ki prepare sou wout sèvitè prepare l yo ki vle pataje levanjil la. Sa te rive nan pwòp lavi pa nou. Osi souvan sa ap rive depann sou kondisyon preparasyon lespri nou ak kè nou.
Mwen gen yon zanmi k ap priye chak jou pou l rankontre yon moun ki prepare pou resevwa levanjil la. Li toujou mache avèk yon Liv Mòmon. Yon jou swa anvan l ta pral fè yon ti vwayaj, li te deside pou l pa ale avèk yon liv Mòmon men olyesa li te deside pou l mache avèk yon ti kat misyonè yo konn bay yo. Men pandan l t ap prepare pou l ale, li te gen yon enpresyon espirityèl ki te vin sou li: “Mache avèk yon Liv Mòmon.” Li te mete youn nan valiz li.
Lè yon fi li te konnen te vin chita bò kote li pandan vwayaj la, li te mande tèt li: “èske se li menm?” Fi a te vwayaje avèk li ankò lè yo t ap retounen. Li te panse: “Kijan m ta pale l de levanjil la?”
Men, fi a te di li: “Ou peye dim nan legliz ou a?” Li te reponn wi. Fi a te di ke l ta sipoze peye dim nan legliz pa l la men li pa t fè sa. Epi apre li te mande: “Kisa w ka di m sou Liv Mòmon an?”
Li te eksplike ke liv la se ekriti, yon lòt temwayaj konsènan Jezikri, ki te tradui pa Pwofèt Joseph Smith. Fi a te parèt enterese, konsa, li te foure men nan valiz li epi l te di: “Mwen te santi m pouse pou m te mache avèk liv sa a. M panse ke se pou ou.”
Li te kòmanse li l. Lè yo t ap separe, li te di: “Ou menm avèk mwen pral oblije gen plis konvèsasyon sou bagay sa a.”
Sa zanmi m nan pa t ka konnen — men ke Bondye te konnen — sete ke dàm nan t ap chèche yon legliz. Bondye te konnen ke li te konn obsève zanmi m nan epi mande tèt li poukisa legliz li a te fè l gen kè kontan konsa. Bondye te konnen ke li ta pral poze kesyon sou Liv Mòmon an epi li t apral dispoze pou kite misyonè yo anseye li. Li te prepare. E zanmi m nan te prepare tou. Ou menm avèk mwen kapab prepare tou.
Preparasyon nou bezwen an se nan lespri nou ak nan kè nou. Fi a te tande epi l te sonje pale sou Liv Mòmon, sou Legliz retabli Senyè a, ak sou kòmandman peye Bondye dim nan. Epi li te santi kòmansman temwayaj konsènan laverite a nan kè li.
Senyè a di ke L ap revele verite a nan lespri nou ak nan kè nou pa mwayen Sentespri a (gade D&A 8:2). Pifò moun n ap gen pou n rankontre te gen kòmansman preparasyon sa a. Yo te tande oubyen li konsènan Bondye ak pawòl Li. Si kè yo te adousi ase, yo te santi yon konfimasyon verite a, menmsi l te piti.
Fi a te prepare. Menmjan ak zanmi m nan, Sen Dènye Jou a ki te etidye Liv Mòmon an. Li te santi yon temwayaj ke se laverite, epi li te rekonèt direksyon l te resevwa nan men Lespri a pou l te mache avèk yon Liv Mòmon an. Li te prepare nan lespri li ak nan kè li.
Bondye ap prepare moun pou resevwa temwayaj nou sou verite retabli a. Sa mande lafwa nou epi apresa pou nou aji pou pataje san krent sa ki vin si presye pou nou an ak pou moun ki pwòch nou yo.
Prepare pou pataje nan ranpli lespri nou chak jou avèk verite levanjil yo. Si nou respekte kòmandman yo epi nou onore alyans nou yo, n ap santi temwayaj Lespri a ak plis nan lanmou Sovè a pou nou menm ak pou moun n ap rankontre yo.
Si nou fè pati pa nou an, n ap vin plis anplis fè bèl eksperyans ki se rankontre moun ki prepare pou koute temwayaj nou konsènan laverite a — nou ofri sensèman, soti nan kè pa nou al nan kè pa yo a.
© 2012 pa Intellectual Reserve, Inc. Tout dwa rezève. Enprime nan Etazini Damerik. Apwobasyon Anglè: 6/11. Apwobasyon tradiksyon: 6/11. Tradiksyon First Presidency Message, September 2012. Haitian Creole. 10369 036
Ansèyman Ki Soti nan Mesaj Sa a
Panse pou w li mesaj la avèk fanmi w ap vizite a epi pale sou pwochen paragraf la rive nan dènye a, kote Prezidan Eyring diskite sou fason pou yon moun fòtifye temwayaj li a. Pale avèk fanmi an sou enpòtans pou yo rann temwayaj yo lè y ap pataje levanjil la. Timoun yo ki nan fanmi an kapab twouve sa itil pou yo eseye jwe wòl sou fason pou rann temwayaj bay zanmi yo.