Pweng sin Prestuhnsi Se Met, Septempuh 2012
Akacsruhi ke Wosasuc ke Inse Fototo
God El fah fihliyac mwet ahkoeyucklac uh nuh ke inkacnek luhn mwet kuhlwacnsap ahkoeyucklac Lal suc luhngse in akacsruhi ke wosasuc uh. Ma ingacn sikyak nuh sum ke moul lom sifacna an. Fususiyen sikyak la an wiwina ahkoo luhn nuhnak lom ac insiyom an.
Oasr kawuck se luhk suc pruhe lwen nuh kwewa in ohsun nuh sin sie mwet suc ahkoeyucklac in eis wosasuc uh. El us weluhl sie kapi ke Puk luhn Mormon uh. Ke fong met liki sie muhtwacta fototo lal, el sulaclah in tiac us sie kapi weluhl tuhsruhk sahyacna in us sie ipin pwepuh in kihtakat. Tuhsruhk ke el ahkolah in som ah, sie mokleyuck ke nguhn tuhkuh nuh sel: “Us sie Puk luhn Mormon an wi kom.” El sang sie nuh lun pack lal ah.
Ke sie muhtwacn el etuh muhta siskacl ke muhtwacta sac, el nuhnkuh, “Kuh pa inge mwet sac?” El sifilpac weluhl fohlohk ke muhtwacta sac. El nuhnkuh, “Kuh nga ac sruhmuhn wosasuc uh fuhkah?”
Sahyacna, el fahk nuh sel, “Kom moli sie tahfuh singucul nuh ke alu lom ah, pwacye?” El fahk lah el moli. El fahk lah el enenuh in moli sie tahfuh singucul nuh ke alu lal ah tuhsruhk el tena. Na el siyuck, “Meac kom kuh in fahk nuh sihk ke Puk luhn Mormon?”
El ahkuhtweyac lah puk sac pa ma suhmuhslah, sie pac mwe lohoh ke Jisus Kraist, luhngasyucklac sel Mwet Pahluh Joseph Smith. El atacn luhngkihn, oruh el saplakyang nuh lun pack se lal ah ac fahk, “Mokleyuck nga in us puk se inge wiyuc. Nga muh ma nuh sum.”
El muhtwacwacack in riti. Ke eltahl fahsrwelihk ah, el fahk, “Nga kom ac fah sulpac sramsram ke ma inge.”
Ma kawuck se luhk ah tiac kuh in etuh—tuhsruhktuh ma God El etuh—pa lah el suk ke sie alu. God El etuh lah el liye kawuck se luhk ah ac ke etuh lah efuh alu se lal ah oruh el arlac engan. God El etuh lah el ac fah siyuck ke Puk luhn Mormon ac lah el ac fah insese in lutiyuck sin misineri uh. El ahkoeyucklac. Oacpacna kawuck se luhk ah. Nga kom kuh pac in ahkoeyucklac.
Ahkoo se kuht enenuh uh oasr ke nuhnak lasr ac insiyacsr. Muhtwacn sac lohng ac esamwack kahs ke Puk luhn Mormon, Alu fohlohkyak luhn Leum, ac masap in moli sie tahfuh singucul nuh sin God. Ac el puhlahack muhtwacwacyacn mwe lohoh pwacye uh ke insiyacl.
Leum El fahk lah El ac fah ahkkahlwemye ma pwacye nuh ke nuhnak lasr ac insiyacsr sin Nguhn Muhtahl (liye D&C 8:2). Inkaiyen mwet kom ac fah ohsun nuh se uh ac oasr muhtwacwacyacn ahkolah sac la. Elos lohng kuh riti ke God ac kahs Lal. Fin insiyaclos fihsracsrsracsr fal, eltahl ac puhla, finne srihklac, sie mwe ahkpwacye ke ma pwacye uh.
Muhtwacn sac ahkoeyucklac. Kawuck se luhk ah pac, Mwet Luhlahlfongi ke Lwen-sahflah suc ma lutlutkihn Puk luhn Mormon. El puhlakihn sie mwe loh lah ma se pwacye, ac el akihlen mwe kolyuck sin Nguhn in us sie kapi weluhl. El ahkoeyucklac ke nuhnak lal ac insiyacl.
God El ahkoo mwet uh in eis fahkwack luhlahlfongi lowos ke ma pwacye fohlohkyak uh. El enenuh luhlahlfongi lowos ac tok muhkwikwi lowos in tiac sahngweng in akacsruhi ma suc arulacna yohk srihpac nuh suwos ac nuh sin mwet kowos luhngse an.
Ahkolah in akacsruhi in nwacklah nuhnak lowos lwen nuh kwewa ke ma pwacye luhn wosasuc uh. Ke kowos liyacacng masap ac ahkfuhlwactye olwelah lowos uh, kowos ac fah puhla fahkwack luhlahlfongi luhn Nguhn ac yohkna nuh ke luhngse luhn Mwet Lango nuh suwos ac mwet kowos sun an.
Kowos fin oruh ip lowos an, ac fah yohkwaclihk eisyacn puhlakihn wowo lowos ke ohsun nuh sin mwet suc ahkoeyucklac in lohng fahkwack luhlahlfongi lowos ke ma pwacye—ituckyang ke inse fototo, lowos nuh selos.
© 2012 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/11. Ahkkweyeyucklac ke lweng: 6/11. Lwenglah luhn First Presidency Message, September 2012. Kosraean. 10369 868
Luti ke Pweng Se Inge
Nuhnkuh in riti pweng se yurin sucu an ac sramsramkihn pohloh kahs se tohkoh nuh ke ma sahflah se, ma Prestuhn Eyring el sramsramkihn ohiyac in ahkfokokoye fahkwack luhlahlfongi luhn sie mwet. Sramsramkihn yurin sucu an yohk srihpaciyacn oruh fahkwack luhlahlfongi ke akacsruhi ke wosasuc uh. Tuhlihk ke sucu an kuh in sokwack arlac kahsruh in srihke ohiyac oruh fahkwack luhlahlfongi nuh sin kawuck uh.