2012
Aikuj ko Rejeno̧lo̧k im Jerbal in Jipan̄ eo kar Leļo̧k
Jeptōm̧ba 2012

Naan in Katak an Kōrā, Jeptōm̧ba 2012

Aikuj ko Rejeno̧lo̧k im Jerbal in Jipan̄ eo kar Leļo̧k

Lukkuun jar im ekkatak kōn kein katak in im, n̄e ekkar, ekōnono kake ippān jejtōr ro kom̧ij loļo̧k. Kōjerbal kajjitōk ko n̄an jipan̄ eok kōkajoorļo̧k jejtōr ro am̧ im n̄an kōm̧m̧an bwe Doulul eo an Kōrā en m̧ōttan eo emourur tata ilo mour eo am̧i make.

Jiiļ eo an Doulul eo an Kōrā

Tōmak, Baam̧le, Deeor

“Aikuj ko an ro jet eļapļo̧k aer waļo̧k,” Būreejtōn Thomas S. Monson eaar ba, “im kajjojo iaad jemaron̄ kōm̧m̧ane juōn men n̄an jipan̄ jabdewōt … Eļan̄n̄e jej joļo̧k ad mour ilo jerbal n̄an ro jet, ewōr jidik kōttōpar n̄an mour ko ad.”1

Āinwōt rūkaki in loļo̧k an kōrā ro jemaron̄ lukkuun itok n̄an jeļā im iakwe kajjojo sister ro jej loļo̧k. Jerbal in jipan̄ n̄an ro me jej loļo̧k naaj make itok waļo̧k jān iakwe eo ad n̄an er (lale Jon 13:34–35).

Ekōjkan ad maron̄ jeļā aikuj ko ilo jetōb im kanniōk an sister ro ad bwe jān maron̄ leļo̧k jerbal in jipan̄ eo n̄e aikuj i? Āinwōt rūkaki in loļo̧k an kōrā ro, ewōr ad maron̄ n̄an bōk im̧we eo n̄e jej jar kōn ro jej loļo̧k.

Kōm̧m̧ani wōt iien bwebwenato ko iien otemjeļo̧k ippān sister ro ad ej barāinwōt aorōk. Loļo̧k ko am̧ make, ikkūr ļo̧k ko ilo talboon, juon leta in kōketak, e-mail ko, jijet ippān, naan in nōbar eo em̧ool, pukōt ļo̧k e ilo m̧ōn jar eo, jipan̄ e ilo iien nan̄inmej ak aikuj ko, im jerbal ko jet an jerbal in jipan̄ aolep rej jipan̄ kōj mije im kōkajoorļok doon.2

Rūkaki in loļo̧k an kōrā ro kar kajjitōk ippāer n̄an ripoot e wāween an sister ro mour, jabdewōt aikuj ko rejeno̧lo̧k an sister ro, im leļo̧k jerbal in jipan̄ n̄an er. Kain ripoot kein im jerbal in jipan̄ eo ad n̄an sister ro ad ej kwaļo̧k kadkad in ad rikaļoor.3

Jān Jeje ko Rekwojarjar

Jon 10:14–16; 3 Nipai 17:7, 9; Moronai 6:3–4

Jān Bwebwenato eo Ad

Jerbal n̄an doon eaar iien otemjej jibadbad eo an katakin lo̧ļo̧k eo. Kōn jerbal in jipan̄ eo ej kōm̧m̧an jej bōkļo̧k jouj im jemjerā eo me eļapļo̧k jān loļo̧k ko allōn̄ otemjeļo̧k. Ej kea eo ad me ej aorōk.

“Ikdelel eo aō ej n̄an akweļap ippān sister ro aō n̄an bōjrak inepata kōn juon ikkūrļo̧k ilo talļboon ak juon loļo̧k ilo kuwōta otemjeļo̧k ak allōn̄ otemjeļo̧k,” Mary Ellen Smoot eaar ba, būreejtōn eo eutiej kein 13th an Doulul eo an Kōrā. Liin eaar kajjitōk ippān n̄an “kalimjōk wōt kōkkajiririk jetōb ko rem̧ōjņo̧.”4

Būreejtōn Spencer W. Kimball (1895–1985) eaar katakin, “Emenin aorōk bwe jān jerbal n̄an doon ilo aelōn̄ in kiin̄ eo.” Aaet eaar kile bwe ejjab aolep jerbal in jipan̄ ko aikuj eļļap. “Ekanooj emakijkij, an jerbal in jipan̄ ko ad kōm̧m̧an jān kōketak ko reddik ak leļo̧k … jipan̄ kōn jerbal rejjab oktak,” eaar ba, “ak ta eo elōn̄ aiboojoj emaron̄ waļo̧k … jān jerbal ko reddik bōtaab ļap tokjāer!”5

© 2012 jen Intellectual Reserve, Inc. Aolep jim̧we ko rej pād ippān. Kar jeje ilo Amedka. Kōmālim kajin English: 6/11. Kōmālim ukook eo: 6/11. Ukook eo an Visiting Teaching Message, September 2012. Marshallese. 10369 874

Kakeememej ko

  1. Thomas S. Monson, “Ta Em̧ōj Aō Kōm̧m̧ane n̄an Jabdewōt Rainin?” Kweilo̧k eo Eļap, Okt. 2009, 41.

  2. Lale Bok in Bōk Meļeļe 2: Tōl Kabun̄ eo (2010), 9.5.1.

  3. Lale Bok in Bōk Meļeļe 2, 9.5.4.

  4. Mary Ellen Smoot, in Daughters in My Kingdom: The History and Work of Relief Society (2011), 117.

  5. Teachings of Presidents of the Church: Spencer W. Kimball (2006), 82.

Ta Eo Imaron̄ Kōm̧m̧ane?

  1. Ij ke pukōt im̧we eo an juon make n̄an jeļā ekōjkan uwaake aikuj ko ilo jetōb im kanniōk an kajjojo sister ro Ij eddo n̄an mije er?

  2. Ekōjkan an sister ro Ij mije er jeļā bwe Ij kea kōn er im baam̧le ko aer?